Matta 13

1Mgbàr maan Yeesu de yuu a àay, de dige e tâa a cewci sòo ɓèl. 2Mûsa nit ây dèy de kimjan a gin wàa, ha de lege a koombowal e tâa a farra. Mûsa nit ây pî de gòyin a cewci sòo. 3Yeesu de yèe daw jày dèy ni rèenjum yèy, de gàa: Nit yòorra yòoci tayge ngam yòorra yòoci. 4A ye yòo gi, yòot kana de yaa a cewci orri. A jooy ây de dàan de atin. 5Yòot kana yaa a gòok ây a gin tâa soori càa. De ɓuge yaale ngam soori ti yeng ba. 6Unji ye mâaye larruge, de kòyrre ngam sisi wàa ti cir ba. 7Yòot kana ngaa yaa a fur cikci. Cikci ye 'mirre, de èwnjuwa. 8A yòot ây kana aw yaa a soor mbâra. De ɓugin de 'mirrin, de njòrin woy yey yòoci temèrre woy kana yòoci ra yira, woy kana ngaa yòoci ra taan. 9Nit yey tâage ni tuk rakni, sey e ragi! 10A lor ta Yeesu de hèewrran de gunuwan: Ngam jâ yèenum ni rèenjum yèy ya? 11De goosi de gàa daw: Un un kpàa ot cèngnum jày tâage fûurriya a yèk wûun Fay a faktiturum. Amma a nit ây kana gi gaw kpàa cèngnum maan ba. 12Ngam koo wun tâage ni jày, kpàa ge kpàasirra jày dèy. Amma nit yey èege jày, a gaw arri koo jày tâagurra càa gi. 13Hû go de yèenim daw ni rèenjum yèy gi, ngam koo ye tâa aw rapɗe ni nisi aw rap jày ba, koo ye tâa aw raksirre ni tuy aw rak jày ba, aw cèngsi ba. 14Kà yey gbèe a hak waw jày gàa nà Fay ni mgbelyèk Isaya nit lònum: Ra gun raksi ni tuy, amma gun cèngsi ba. Ra gun rap ni nisi, amma gun rap jày ba. 15Ngam tinîir nit ây gi dèbe, tuk waw bûre rakta, nis waw jèmsige, ngam ta aw rap ni nis waw ba, aw rak ni tuk waw ba, aw cèngsi ni tinîir waw ba, ngam ta aw ira a gin mum ha mi ndòosi daw ba. 16Amma un kâwum diinu, ngam nis wun rapɗe, tuk wun ɗa rakɗe. 17Takundi mi gàanurre, a nit ây dèy lòni yèk Fay, ni nit ây gòyge ɗèm gi, aw yiɗi nà rapta jày rapnu gi, amma aw rap ba. Aw yiɗi nà rakta jày raknu gi, amma aw rak ba. 18Kòsòng sey un rak jày yiɗi gàarra rèenjum yèk yòorra yòoci gi. 19A nit ây rake yèk wûun Fay to aw cèngsirre go ba, Tooy mamji dàa ge dàara e atfa jày tâage yòorriya a tinîir waw gi. Hû go aw rèenji ni cewci orri a gin yaa yòoci gi. 20Nit kana rèenji ni soor yey tâage càa a gòok ây, a gin yaa yòoci gi. Ey tâage nit rakta yèk Fay, ngorge yaale ni tinîir kâwrra. 21Amma ye tâa yèk maan ii sisi a gin wàa ba, e gòyrra unji càa. Ye ge kpàa ɗàari koo 'màari ana go ngam yèk Fay, mgbò ge mgbòl yaale e yaa. 22Nit kana rèenji ni gin yey yaa yòoci a fur cikci gi. Ey ɗa rage yèk Fay. Amma ye tâa jàk kparri, ni rûfta yèk bèebi aw loosurre tinîiri gi, è gaw èwnjufa yèk Fay a tinîir wàa, ge rep koo jâ ba. 23A nit ây kana aw rèenji ni soor mbâra a gin yaan yòot ây gi. Aw rake yèk Fay, cèngse gi, aw repɗe jàk mbâri kà yòot ây woy yey temèrre, woy kana ra yira, woy kana ngaa ra taan. 24Yeesu de yèe daw ni rèenjum yèk kana, de gàa: Wûun Fay a faktiturum rèenji ni nirri còke yòot mbâra a hèmna wàa. 25Amma ye kûun a nit ây gi, nit yiir wàa de dàara e yòorra yòot gbikci a tîim tirri nà. De taye. 26Tirri ye 'mirre, aase njòre gi, gbikci de lòrre. 27A nit tèem ta wàa di nit hèmna gi de dàaran de gàawan: Nitcoorra, naa yòot mbâra cògum a hèmna wey naa? Amma u hâ ana gbikci gi ya? 28De gàa daw: Nit yiiri mbirge jàk yey gi. A nit tèem ta wàa de gunuwan: Mu yiɗi ot dik ot uffa gbikci gi yi? 29De goosi de gàa daw: Oow, ngam to un ufɗe go gbikci gi, aa gun aanjiti sisi tirri ɗa. 30Woon daw ɗa cuk aw 'mitnji ha naarra wakli. A unji ripta gàa gim gàa da nit njaarra ây: Uffan màrra gbikci, un 'mèmi un aksifa. Amma tirri sey un kimji un duk a dooy mum. 31Yeesu de yèe daw ni rèenjum yèk kana, de gàa: Wûun Fay a faktiturum rèenji ni yòot mutar, yey arre nirri e còk a dâw wàa gi. 32Yòot maan hòme luurra da yòot ây pî, amma to ɓuk go, hò ge hòm daw 'mita da waas ây pî ha e tâa futifay. A jooy ây ngaa aw dàara aw iirra àay waw a farra. 33Yeesu de yèe daw bak ni rèenjum yèk kana, de gàa: Wûun Fay a faktiturum rèenji ni njàngna yey arre nikin, e hamji a tigeni ɗèeri taan ha de fâase pî. 34Yeesu yèe daw jàk ây gi pî da mûsa nit ây ni rèenjum yèy. Ti yèe daw jày ba, sey ni rèenjum yèk ây 'nang 'nang. 35Mbire kà yey ngam ha e gbèe jày gàa nà nit lònum yèk Fay: Hàa gim hàangi mgbelyèk mum mi yèe daw ni rèenjum yèy, kà gim kàl daw jày tâage fûurriya diga ɗaarra deesi gi. 36Yeesu ye woo daw da mûsa nit ây, de koye a àay. A lor ta wàa de hèewrran de gàawan: Lònina rèenjum yèk gbikci a hèmna nà. 37De goosi de gàa daw: Nit còkta còke yòot mbâra gi, ey tâage Hàm nirri. 38Hèmna gi tâage kparri. A yòot mbâr ây gi aw tâage a hàm ta wûun Fay. Amma a gbikci ây aw tâage a hàm ta Tooy mamji gi. 39Nit yiiri yòoge yòot gbikci gi, ey tâage Seyɗan. Naarra wakli tâage gbèerra kparri. A nit njaarra ây a malayka ây ɗi. 40Kà yey ufin gbikci aksifan ni ebi gi, hû go ge tâa ɗa a gbèerra kparri. 41Hàm nirri tèe ge tèe malayka ta wàa aw kimji daw a wûun wàa da nit ây pî iige timgbòlnji da nit ây kana, ni nit ây tèege tèem makta gi, 42aw 'màktifa daw a eb ɓèl, a gin tâa umda rîsim ni riisum temgi. 43A dat maan a nit ây gòyge ɗèm gi, ka gaw kayngi kà unji a wûun Too waw. Nit yey tâage ni tuk rakni sey e ragi! 44Wûun Fay a faktiturum rèenji bak ni bèebi tâage fûurriya a hèmna. Nirri ye kpàa gi, de fûuni. Kâwu tinîir wàa dèy, de dige e sàani jày tâagu gi pî, ha e ir e sàa gin maan lang. 45Wûun Fay a faktiturum rèenji bak ni nit sàangum jày kàmge tiɗoon ây delliya. 46Ye kpàa tiɗoon woy àyrra sàari dèy, de dige e sàani jày tâagu gi pî, ha e sàa tiɗoon maan. 47Wûun Fay a faktiturum rèenji ɗa ni tidepni cîici yey 'màktin a nit ây a sòo ɓèl gi, mòo koo cîit hâ pî. 48Ye mûu gi, a nit depta ây de nàrran a cewci sòo. De tâan aw cat cîit della ây aw ii a tuuni. Amma cîit makta ây de 'màktifan u gbaa. 49Hû go ge tâa a gbèerra kparri. A malayka ây dàa gaw dàara aw cat nit makta ây a tîim nit ây gòyge ɗèm gi, 50aw 'màktifa daw a eb ɓèl, a gin tâa umda rîsim ni riisum temgi. 51Yeesu de gun daw da lor ta wàa: Jàk ây gi pî un rage mbâra yi? De goosuwan: Eeye. 52De gàa daw: Hû go koo nit còycum hâ irge nit èngnum a yèk wûun Fay ya, ey rèenji ni too gbaa yuuni a àay wàa jàk fûuya ni jàk mgbantiya. 53Yeesu ye gbèese yèerra yèy ni rèenjum yèk ây gi, de hèese a farra, 54de dige a riiy yey 'mirre gi. De kàlnji daw da nit ây a àay gin kimjum waw, ha de kpul daw jungci isi da nit ây, de gàan: Nit yey u hâ kpàara còycum kà yey ni mbinum tèerra tèem kayeefi gi ya? 55Naa ey tâage hàm nit hewrum kpiiri gi naa? Mariya tâage nuu wàa gi ba yi? Yakuba, ni Yosef, ni Simon, ni Yuda aw tâage kaa rra wàa ba yi? 56Naa a say rra wàa ɗa pî aw dii ni orro ay gi naa? Hû go u hâ kpàara mbinum pî kà yey gi ya? 57Ngam maan de hàwuwan goosum di Yeesu. Ey de gàa daw: Di nit lònum yèk Fay aw coowrre koo u hâ pî, sey a riiy wàa ni tîim kor ta wàa tâa gaw coow ba. 58Ngam èca goosum waw Yeesu ti tèe jàk kayeefi ây dèy a farra ba.

will be added

X\