Matta 11

1Yeesu ye gbèesi mgbèngda yèk ây gi da lor ta wàa ra sàm cuk, de ane a farra e dik e kàlnji da nit ây a riiy ta waw, e sagi daw yèk Fay. 2Yuhanna nit iirra baptisma tâage a kultuma ye rage yèk tèem Kristu gi, de tèe da lor ta wàa kana a gin wàa 3ngam aw gunuwa: Muy tâage nit yey ge dàara nà gi yi, koo ot waarre nit kana yi? 4Yeesu de goosi de gàa daw: Digin un kàlu di Yuhanna jày raknu gi, rapnu gi: 5A nit râay ây aw rapɗe, a nit èskum ây aw dikɗe mbâra, a nit rak is ây aw kpàarre ndòosum, a gbukrum ây aw rakɗe, a nit ây wutke gi aw gûysirre, da nit èca ây ɗa aw sak dawrre Yèk Kâwrra. 6Kâwum dii di nit yey tâa ti ir u daarri ngam mum ba. 7A lor ta Yuhanna ye koyin gi, Yeesu de yèe daw da mûsa nit ây yèk Yuhanna, de gàa: Ji yuunu raptum a nûri ya? Samsi yey yûusu hiski gi yi? 8Koo ji yuunu raptum a nûri ya? Nit mgbapta lurra della yi? Aw rri yey a nit ây mgbapke lurra della aw dii a àay wûun ây. 9Koo ji yuunu raptum a nûri ya? Nit lònum yèk Fay yi? Mi gàanurre, takundi un rabe nit yey hòmgi daw da nit ây lòni yèk Fay gi. 10Yuhanna tâage nit yey kèrin nà yèk hak wàa gi, ye gàa Fay: E rri yey mi tèefarre nit tèer mum a ɗàm kpees wey, ha e mgbar ot wey. 11Takundi mi gàanurre: A nikin ây aw haa kpàarra nirri hòmgu 'mita di Yuhanna nit iirra baptisma ba. Amma nit yey hòmge luurra a wûun Fay a faktiturum gi, ey hòmgu 'mita di Yuhanna. 12Diga mgbàr Yuhanna nit iirra baptisma ha niyey aw ndaksi dawrre da nit ây yèk wûun Fay a faktiturum. A nit ndakta ây ngaa aw ngotɗe yèk maan ni kpèw kpèw. 13A nit lònum ây pî ni yèk mgbèngda Muusa ɗa aw lònirre yèk wûun Fay, ha mgbàr dàarra Yuhanna. 14Un yiɗi go ngota yèk mum, mi gàanurre: Yuhanna ey tâage Eliya nit yey ge dàara nà gi. 15Nit yey tâage ni tuk rakni, sey e ragi! 16Ni ji gim getnjini yòot nit ây tâarra yey ya? Aw rèenji ni hàm ây tâage a luumu 'naasin da hàm ây kana, 17aw gàa: Ot urfa dunge jàk ti uta, amma un sii ba. Ot 'naasi ndûu wurra, amma un taasi ba. 18Ngam Yuhanna dàarage, ti riirre nàam ba, ti njoorre njoori ba, aw gàarre: Ey dii ni tindòom. 19Hàm nirri dàarage, ey riirre njoorre, aw gàarre: E rri yey nit riirra tiriici dèy, tinjoorgum mbàl, soob waw da nit ngota jomorrgol ây ni nit makta ây. Amma còycum Fay cèngnumya ɗi ni tèem ta wàa. 20Yeesu de kpâni daw da riiy ây, a gin tèe nà tèem kayeefi hòmge mûurra gi, ye tâa a ni-riiy ây maan aw ini tinîir waw ba, de gàa: 21'Màari waamde, dum riiy Korajin! 'Màari waamde, dum riiy Betsayda! Ngam tèem kayeefi ây mbirge nà a tîim nit ta wun gi, to tâa go ngin tèerriya a Tiiru ni Sidon, i gaw ini ngin tinîir waw ni mgbapta lurra buhu, ni lèerra tangsama a is waw. 22Mi gàanurre, a unji gbèeni, kiita wun hò ge hòm àyrra di kiita Tiiru ni Sidon. 23Muy mu riiy Kafernahum, mu dànde aa gaw aanjum ha a faktiturum yi? Yaa gaw yaanum ha a gook yengdiya a gin tâam nit ây wutke gi. Ngam tèem kayeefi ây mbirge nà a tîim nit ta wey gi, to tâa go ngin tèerriya a Sodom, riiy maan tâa ge tâa ngin ha kòsòng. 24Mi gàanurre, a unji gbèeni kiita wey hò ge hòm àyrra di kiita Sodom. 25Mgbàr maan Yeesu de gàa: Tooy faktiturum ni deesi, mi gàamde mbew, ngam mu fûuni jàk ây gi da nit ây tâage còycumya, ni nit ây cèngni jày, amma mu lòni jàk ây maan da hàm ây. 26Hû go rri Tooy, ngam kà yey delum dum. 27Jày pî Too mum hîigimi. Cen nirri cèngnu di Hàm gi ba, sey Tooy. Hû go ɗa cen nirri cèngnu di Tooy ba, sey Hàm ni nit yey Hàm yiɗi e lònu gi. 28Dàaran a gin mum, un nit loca ây toke titokri bûtiya, kpàa gun kpàa wuysum a gin mum. 29Arrin juk mum a hak wun, un èngni a gin mum, ngam miy tâage ni fetkum tinîiri, ni ûunum hay. Kpàa gun kpàa wuysunum hak wun. 30Ngam juk mum ti sun ba, titokri mum ɗa ti bûr ba.

will be added

X\