1 Yeesu de 'naasi daw da lor ta wàa ra sàm cuk aw dàara a gin wàa. De hîi daw mbinum a hak tindòom makta ây, ha aw yuuni daw a gin nit ây, ha aw ndòosi daw àyci ây koo ni jàk jâ loosi daw gi pî. 2 E rri yey nîir nit ây ra sàm cuk tèe daw Yeesu gi: Simon înuwan Piyèr ni Andere kaa wàa, Yakuba ni Yuhanna kaa wàa a hàm ta Jebede, 3 ni Filip, ni Bartolomi, ni Toma, ni Matta nit ngota jomorrgol, ni Yakuba hàm Alfa, ni Tadde, 4 ni Simon nit yiɗum dees wàa, ni Yuda Iskariyo nit mòorra Yeesu ni gâra. 5 Yeesu tèegi daw da nit ây ra sàm cuk gi, de mgbènggi daw de gàa: Ta un jòl a ot nit ây èege yèk Fay ba, ta un lek ɗa a riiy ni-Samariya ây ba. 6 Amma ndika un dik a gin ni-Israyel ây tâage kà mgbâay gbeerra ây. 7 Un dikɗe go, kàlin da nit ây gàan daw: Wûun Fay a faktiturum hèerage. 8 Ndòosin daw da nit àyci ây ni nit rak is ây, gûysin nit ây wutke gi, yuunin daw tindòom makta ây da nit ây. Un kpàa jàk ây gi ɓa hû go, hîin daw ɗa ɓa hû go. 9 Ta un ngor kangeerri koo sarrdi koo seede, un ii a jiiba wun ba. 10 Ta un mòo kurra tiriici, koo lurra cukti, koo naan, koo suu ngam diknum a orri ba. Ngam nit tèerra tèem gesi e kpàa tiriit wàa. 11 A riiy ây pî gun leki, koo a riiy ɓèl koo a riiy kaa, kàmin a farra nit yey getke e ngotnu gi. Tâan a àay nit maan ha mgbàr yey gun an un taysi gi. 12 Un lekɗe go a àay nirri, gàan da nit ây: Ot lekfarre, ta un tol ba. 13 To a nit ây a àay maan aw ngotnu go, mbâr kèpri wun tâa ge tâa a hak waw. To aw ngotnu go ba, mbâr kèpri wun i ge ir a gin wun. 14 To a gin kana aw hàwnu go ngota koo rakta yèk wun gi, yuun a àay maan malla a riiy maan, gbòsin sèerrèm a nak wun. 15 Takundi mi gàanurre: A unji gbèeni àyrra kiita riiy yey hàwgunu ngota gi, hò ge hòm daw da kiita Sodom ni Gomorra. 16 Yeesu de gàa daw bak: E rri yey mi tèenurre kà mgbâay ây a tîim jàk mòorgum ây. Ngam maan tâan ni gâra kà jòoy ây, tâan ɓet ɓet kà tigurfi ây. 17 Faasin hak wun a gin nit ây, ngam 'maa gaw 'maanu a kiita nit ɓèl raknjum ây, lè gaw lèfnu ni timbii a àay gin kimjum ta waw. 18 'Maa gaw 'maanu a ɗàm kpees ngomna ây ni wûun ây ngam yèk mum, ha un lòni seedamku a gin waw ni gin nit ây èege yèk Fay gi. 19 Aw 'maanu go a ɗàm kpees nit hiitum ây gi, ta un loosi tinîir wun un dànji kà gun yèe ya ba. Ngam kpàa gun kpàa yèk yey gun yèe gi unji maan. 20 Ngam yèk yey ge ana a gin wun ba, amma a ge ana a Jungci Too wun yey ge yèe a tinîir wun gi. 21 Amma nirri hîi ge hîi kaa wàa koo ɓèl wàa aw ɓàruwa, tooy ɗa hîi ge hîi hàm wàa aw ɓàruwa. A hàm ây ngaa a gaw anda daw da too rra waw ni nuu rra waw, aw ɓàri daw. 22 A nit ây pî yii gaw yiinu yèk nîir mum. Amma nit yey èfke tinîir wàa ha gbèeni gi, kpàa ge kpàa saarra. 23 Aw ɗàanu go ɗàari a riiy yey, 'nòon a riiy kana. Takundi mi gàanurre, gun kpàa gbèesum tèerra tèem wun a riiy ây pî a dees ni-Israyel ây ba, ɗoko Hàm nirri e dàara gi. 24 Nit èngnum ge hòmu di nit kàlnjum wàa ba. Hû go ɗa nit tèem ge hòmu di nit ɓèl wàa ba. 25 Gerre ha nit èngnum e tâa kà nit kàlnjum wàa, nit tèem ɗa e tâa kà nit ɓèl wàa. Ye tâa aw 'naasu Belsebu di nit àay, sakko kà ge tâa ni nit àay rra wàa ya? 26 Ta un tol daw da nit ây ba. Jày pî tâage kuptumya, ku ge kupli. Jày pî tâage fûurriya, tâa ge tâa cèngnumya. 27 Jày yèemi dun a kulpi gi, yèen a kayang! Yèk tiyaynjum raknu gi, bimin a fak àay! 28 Ta un tol da nit ây gaw ɓàr isi gi ba, ngam gaw kpàa ɓàta jungci wun ba. Amma tolin di Fay, tâage ni mbinum e gbeesi jungci wun ni is wun ɗa cuk a eb ɓèl gi. 29 A hàm ticîit ây cuk sàanin dalla kpolo ba yi? Amma koo kpolo a tîim waw ge yaa a deesi ba, sey to Too wun yiɗi go gi. 30 Koo gimsi hak wun pî saktiya ɗi kpolo kpolo. 31 Ngam maan ta un tol ba! Un un hòm daw da ticîit ây ba yi? 32 Koo wun lònim a ɗàm kpees nit ây, gàage nit mum ɗi gi, miy ɗa lò gim lòni yèk wàa a ɗàm kpees Too mum tâage a faktiturum. 33 Amma koo wun hàlgim a ɗàm kpees nit ây, miy ɗa hà gim hàlu a ɗàm kpees Too mum tâage a faktiturum. 34 Ta un dàn mi dàara ha mi 'maara tâam mbâri a deesi. Mi dàara ngam mi 'maara tâam mbâri a deesi ba, amma ɓet ɓèl. 35 Mi dàara ha mi ɗòlnji hàm nihun ni too wàa, hàm nikin ngaa ni nuu wàa, waanji ɗa ni nuu maa wàa. 36 A nit gbaa rra wàa di nirri tâa gaw tâa nit yiir ta wàa. 37 Nit yey yiɗi too wàa ni nuu wàa hòmgim dim gi, ti get 'mèmsum ni miy ba. Nit yey yiɗi hàm wàa hàm nihun koo hàm nikin hòmgim dim gi, ti get 'mèmsum ni miy ba. 38 Nit yey tâa ti tok minjum kpiir wàa e furrim ba, ti get 'mèmsum ni miy ba. 39 Nit yey faage jungci wàa gi, gbee ge gbeesi. Amma nit yey gbeesi jungci wàa ngam yèk mum gi, kpàa ge kpàasi. 40 Nit yey ngorgunu gi, ngorim dim ɗa. Nit yey ngorgim gi, ngoru di Tooy tèegima gi ɗa. 41 Nit yey ngorgu di nit lònum yèk Fay ngam nit lònum yèk Fay ɗi gi, kpàa ge kpàa bèeb tèem kà yey kpàa nit lònum yèk Fay. Nit yey ngorgu di nit gòyrra ɗèm ngam nit gòyrra ɗèm ɗi gi, kpàa ge kpàa bèeb tèem kà yey kpàa nit gòyrra ɗèm. 42 Takundi mi gàanurre, nit yey hîige koo sòo toynji di hàm kpolo a tîim nit ta mum ngam ey lor mum ɗi gi, bèeb tèem wàa ge gbee ba sam.
