Marku 7

1A ni-Farisa ây ni nit còycum ây anga a Yerusalem de kimjan a gin Yeesu. 2De rabin lor ta wàa kana aw riirre ni kàn 'miskumya, aw kòl ba. 3Ngam a ni-Farisa ây ni ni-Yude ây pî aw futɗe yèk hàar waw. Aw riirre nàam ba, sey aw kòl go kàn. 4Aw koyrra go luumu, gaw riiy jày ba sey aw poo go sòo. Aw mòo hàar kana dèy ɗa kà kòlla sey, ni taang, ni taasaw. 5A ni-Farisa ây ni nit còycum ây de gunuwan di Yeesu: Ngam jâ a lor ta wey yewin yèk hàar wosom ây ya? Kà kà riin aw ni kàn 'miskum gi ya? 6Yeesu de goosi de gàa daw: Isaya nit lònum yèk Fay yèe nà takundi a hak wun, un nit tibiw ây ɗi, ye kère kà yey: A nit ây gi aw coomde ni mgbelyèy, amma tinîir waw kpâanji ni miy. 7Aw daprimde ɓa hû go, ngam aw kàlnjirre jày gàan a nit ây. 8Yeesu de gàa: Un un woofa yèk mgbèngda Fay ngam mòorra yèk hàar nit ây. 9Kay, un mbine hàwrra yèk mgbèngda Fay ngam un fut yèk kàlnjum wun! 10Muusa gàa: Coo too wey ni nuu wey. Nit yey njàmge too wàa ni nuu wàa, kpàa ge kpàa kiita wurra. 11Amma un un kàlnjirre, nirri kpàa go mgbaanjum di too wàa koo di nuu wàa e gàa «jàk yey korban ɗi, kà gàarra jàk yey gesi ngin mi hîim gi, hîi gim hîi di Fay», 12hû go un njangguge mgbaanjum di too wàa ni nuu wàa. 13Kà yey un mboysirre yèk Fay ni yèk hàar wun. Un tèerre jàk ây kana dèy hû go ɗa. 14Yeesu de 'naasi mûsa nit ây aw hèera a gin wàa, de gàa daw: Raksimin un pî ha un cèngni jàk yey. 15Cen jàk yey leke a mgbelyèk nirri e 'miskunu ba. Amma jàk yey yuuga a mgbelyèk nirri gi, ey ge 'miskunuwa. ( 16Nit yey tâage ni tuk rakni, sey e ragi!) 17Yeesu ye ɗòlnjin ni mûsa nit ây, de lege a àay. A lor ta wàa de gunuwan e lòni daw yèk maan. 18De goosi de gàa daw: Kay, un ɗa un kpàawrre cèngnum jày ba yi? Ndika un cèngni, jày pî lek go a mgbelyèk nirri ge 'miskunu ba. 19Ngam jàk yey ge lek a tinîir wàa ba, sey a himni, ge yuunufa a ɓutki. Yeesu gàa kà yey ɗa ngam e mbârsi tiriici pî. 20De gàa bak: Jàk yey yuuga a mgbelyèk nirri ey ge 'miskunuwa. 21Ngam a tinîir nirri ana dànda maktiya, yey ge 'maaw a mboysum lori ni sapri, ni oori, ni ɓàta nirri, 22ni njeenu, ni gayrum jàk ây, ni kperrem, ni gâra, ni haanum tuy, ni ngèeri, ni maasum yèy, ni 'misum hay, ni ray ɗa. 23Maarra yey pî ge ana a tinîiri, ge 'miskunu di nirri. 24Yeesu ane a farra, de taye a cewci riiy Tiiru. De lege a àay nirri, ti yiɗi koo wuna e cèngni a gin tâa ba. Amma ey ti kpàa fûurra ba. 25Kin kana dii ni hàm nikin. Hàm maan tâa ni tindòom. Ye rage yèk Yeesu, de dàara de ûu a ɗàm kpees wàa. 26Kin maan ni-èca yèk Fay ɗi, a yòot ni-Siriya Feniki ây. De waaw di Yeesu e yuunu tindòom di hàm wàa. 27Yeesu de gàaw: Woo daw da hàm ây aw ol ɗà ɗa. Ti del ata tiriit waw aw còoni da dun ây ba. 28Kini nà de goosi de gàaw: Hû go ɗi, Nitcoorra. Amma a dun ây hû riin woy yaatum hàm ây a deesi. 29Yeesu de gàaw: Ngam yèk yey yèem gi koyi, tindòom yuuwe di hàm wey. 30Kini nà ye kpèrre a àay, kpàawe di hàm wàa kûurre kpu a jingi. Tindòom yuuwe di hàm. 31Yeesu ane a dees Tiiru. De jòle a riiy Sidon, e isa a cewci sòo ɓèl a Galile. De arre ot dees yey înin riiy ra. 32A nit ây de 'maawran nit gbukrum, ti kpàawrre yèerra ɗa ba. De waawan e banggurra kàn di nit yey. 33De digin aw cuk ni Yeesu, de kpâan a mûsa nit ây. Yeesu de lekni mbèerri kàn wàa a tuk nirri nà. De yîme ticèkti, de mâaw a rèeng wàa. 34De toole nisi a faktiturum, de bage de gàa: Effata, kà gàarra faari! 35Kòsòng tuk ta wàa di nirri nà pole. Jày cîigu rèeng wàa ɗa patige. Ey yèerre mbâra. 36Yeesu de njanggi daw, ta aw sak yèk maan di nirri ba. Koo ye njanggi daw dèy, aw iisirra yèerra dèy. 37A nit ây ye ragin, jungci isi kpul dawge, de gàan: Jàk yey tèe gi pî, mbâriya tèeye. Mbire ha a nit gbukrum ây aw ragi, ni nit ây tâa nà aw yèerre yèy ba, kòsòng ɗa aw yèerre.

will be added

X\