1 Yeesu de ane a farra, de taye a riiy yey 'mirre gi. A lor ta wàa aw taynjige ni ey. 2 A unji wuysum de kàlnje a àay gin kimjum. Mûsa nit ây dii a farra. Yèk wàa kpul daw jungci isi, de gàan: Nit yey u hâ kpàara jàk ây gi, ni còycum yey ya? Kay, nit yey mbine tèerra jàk kayeefi! 3 Naa ey tâage nit hewrum kpiiri gi naa? Ti tâa hàm wàa di Mariya, ɓèl waw da Yakuba, ni Yose, ni Yuda, ni Simon ba yi? A say rra wàa ɗa aw dii ni orro ay gi ba yi? Ngam maan aw hàwu goosum di Yeesu. 4 Ey de gàa daw: Di nit lònum yèk Fay aw coorre koo u hâ pî, sey a riiy wàa ni tîim kor ta wàa, ni nit àay rra wàa tâa gaw coow ba. 5 Ey ti kpàa tèerra kayeefi a riiy wàa koo kpolo ba, sey iirra daw kàn da nit àyci ây kpolo kpolo, e ndòosi daw. 6 De tâaw 'nang, ngam a nit ây aw goosi koo jâ ba. Yeesu dige a cewci riiy maan pî, kàlnji dawrre da nit ây. 7 De kimje da lor ta wàa ra sàm cuk. De tèe daw cuk cuk. De hîi daw mbinum aw yuuni tindòom makta ây da nit ây. 8 De njanggi daw, ta aw mòo koo jâ ngam diknum a orri ba, koo tiriici, koo kurra tiriici, koo seede, sey suu gbè gaw mòo, 9 aw lekni naan a nay, amma ta aw mgbap lurra cuk ba. 10 Yeesu de gàa daw bak: Un lek go a àay nirri, tâan a farra ha mgbàr yey gun an un taysi gi. 11 To a gin kana a nit ây aw hàwnu go ngota, aw rak dun ba, woofan riiy maan, yuun un gbòsi sèerrèm a nak wun, ngam kàlnum daw jàk maarra waw mbirin gi. 12 A lor ta wàa de tayin. De kàlin da nit ây aw ini tinîir waw. 13 Aw yuuni tindòom ây dèy da nit ây. De fingjirran num da nit àyci ây dèy, aw ndòosi dawge. 14 Yèk Yeesu kpèrre a gin Herode wûun ni-Yude ây, ngam yèk wàa gîre koo u hâ. A nit ây kana ye ragin yèk maan, de gàan: Yuhanna nit iirra baptisma gûysige. Ngam maan dii ni mbinum tèerra tèem kayeefi ây gi. 15 A nit ây kana aw gàarre: Ey Eliya ɗi. A nit ây kana ngaa aw gàarre: Ey nit lònum yèk Fay ɗi, a tîim nit ây lòni yèk Fay mgban. 16 Herode ye rage yèk maan, de gàa: Ey Yuhanna nit iirra baptisma ɗi. Mi njaa mgban hak wàa, amma e gûysige. 17 Ngam mgbàr kana Herode tèeye aw mòow di Yuhanna, aw 'mèmu aw leknu a kultuma. Ey mbire nà kà yey ngam yèk Herodiya, kin yey ngore a gin kaa wàa Filip. 18 Unji kana Yuhanna gàawe nà di Herode: Ti gesum mu at kin kaa wey ba. 19 Yòo jày Herodiya dii ni ngòlnji a gin Yuhanna. Kàmde e ɓàruwa, amma ti kpàa orri ba. 20 Ngam Herode tolurre di Yuhanna, cèngnuge dii nit ɗèm ni takundi, delliya a ɗàm kpees Fay. Herode faawe mbâra. A ye rage yèk Yuhanna, tinîir wàa taaye, ti sumni kày ge mbir ba. Koo hû go yiɗirre rakta yèk wàa. 21 Amma unji della kpèrre di Herodiya a unji ɓaysum kpàarra wûun. Herode 'naase nit raknjum ta wàa, nit ɓèl sooje ây, ni nit ɓèl ây a dees Galile, de ii daprum. 22 Sapri wàa di Herodiya de lege a gin tâa wûun ni nit ta wàa. De sii siiri, delu di Herode ni nit tâanjum ta wàa. De gàaw di sapri: Gunim jày yiɗum pî, hîi gim hîimu. 23 Herode hàa ni tihàani de gàa: Hîi gim hîim jày pî, koo jày tâagim mîi got mîinji. 24 Sapri nà de yuuye, de dige e gun di nuu wàa: Jàk jâ gim gunuwa? De goosi de gàaw: Gun hak Yuhanna nit iirra baptisma. 25 Sapri de isa digèrrige a gin wûun, de gàaw: Mi yiɗi mu hîim kòsòng hak Yuhanna nit iirra baptisma kuru a gàngna. 26 Yèk yey àyuge di Herode wûun. Amma ngam hàaye a tuk nit ây, ti yiɗi hàwrra ba. 27 De tèe sooje e 'maara hak Yuhanna. Sooje nà taye a kultuma, de lege a gin Yuhanna de njaa hak wàa, 28 de 'maara hay a gàngna, de hîiw di sapri nà. Ey ngaa de hîiw di nuu wàa. 29 A lor ta wàa di Yuhanna ye ragin yèk yey, de dàaran de arrin is wàa, de siptuwan a gebi. 30 A lor ta Yeesu aw koyrage, aw kimji ni ey. De kàluwan jày mbirin gi kàlnjin gi pî. 31 Yeesu de gàa daw: Dàan ot dik orro kpolo worro a tîim nûri, un wuysi càa. Ngam a nit ây dèy aw dàararre aw tayrarre, ha Yeesu ni lor ta wàa aw kpàa tâarra aw rii koo tiriici ba. 32 De tayin ni koombowal aw kpolo waw a gin tâam baak baak. 33 A ye tayin, a nit ây dèy aw rap dawge aw cèngsi dawge. A nit ây a riiy ɓèl ây pî aw yuuye aw 'nòo a cewci sòo, de ɗàan daw kpeesi, de kimjin ni aw. 34 Yeesu ye yuu a koombowal, de rabe nit ây dèy gi. Tinîiri de àyu, ngam aw dii kà mgbâay ây hàm faaci cen. De kàlnji daw jày dèy. 35 Unji ye ciiye, a lor ta wàa aw hèewrrage de gàawan: Ay gi tîim nûri ɗi, unji ɗa ciiye. 36 Was daw da nit ây gi aw dik a riiy ây, aw sàa jàk tiriici aw rii. 37 Yeesu de goosi de gàa daw: Un gun hîi daw tiriici! De gàawan: Ot dik ot sàara tàarri ngam kurra ra cuk, ot hîi da nit ây kà yey aw rii yi? 38 De gun daw: Tàarri mèn diinu ya? Digin un gopra! Ye kpàan, de gàawan: Tàarri kèrèw, ni cîici cuk. 39 De hîi daw orri, aw tâani daw pî kim kim a bàsi jèngrèng. 40 De tâan ton ton nit ây temèrre temèrre, nit ây ra kèrèw ra kèrèw. 41 Yeesu de arre tàarri kèrèw ni cîici cuk nà. De toole nisi u faktiturum, de gàa mbew di Fay. De cèenje tàarri, de hîi daw da lor ta wàa, ha aw mîinji daw da nit ây. De gèlnje daw ɗa cîici cuk nà da nit ây pî. 42 Aw pî aw riiye, aw ole. 43 De atin yaatum tàarri, de mûunin tuuni ra sàm cuk, ni ngirra cîici ɗa. 44 A nit ây riige tàarri aw dii nihun ây ujinè kèrèw, cen sakta nikin ây ni hàm ây. 45 A dat maan Yeesu gàa da lor ta wàa, aw lek a koombowal ngam aw ɗàaw aw yewsi a taga sòo ɓèl, a cewci riiy Betsayda, ha e wasra da mûsa nit ây. 46 Ye was daw gi, de taye a gopri ngam e waa Fay. 47 Ye cii mbona, a lor ta wàa aw dii a tîim sòo ni koombowal waw. Yeesu dii a deesi ey kpolo wàa. 48 De rabe lor ta wàa aw riirre 'màari a kûta koombowal, ngam hiski wâarre a ɗàm kpees waw. Tuma ndamji Yeesu dàararre a gin waw, nafrarre a fak sòo. Dii mu gàa hò hòm daw. 49 A lor ta wàa ye rabuwan nafrarre a fak sòo, de dànin ey nit gebi ɗi, de taasin. 50 Aw pî aw rabu, de tolin. De gàa daw yaale: Miy ɗi, ta un tol ba, mòosin tinîir wun! 51 De lekfa a gin waw a koombowal. Hiski de woofa wâarra. De tâa daw 'nang. 52 Ngam ha mgbàr maan aw cèngni yèk kayeefi tàarri nà ba. Tinîir waw dii ndèktiya bak. 53 A ye kpèrrin a taga dees Genesaret, de gbalin koombowal a cewci sòo. 54 Ye yuun a koombowal gi, kòsòng a nit àyci ây aw cèngsu di Yeesu. 55 Aw ana a dees maan pî, aw 'nòorarre a gin Yeesu. Ye ragin a gin tâa ey, aw 'maararre nit àyci ây ni aari. 56 Koo u hâ pî dige Yeesu gi, a riiy kaa ây ni riiy ɓèl ây, ni gbaa gbaa, a nit ây aw iirre nit àyci ây a tîim luumu. De waawan ha nit àyci ây aw bangda a pètki lurra wàa. Koo wun banggurra ya, àyci wàa ndòowe.
