1 Aw kpèrre a taga sòo ɓèl a riiy ni-Gerasina ây. 2 Yeesu ye cire a koombowal, nit tindòom yuura a gook geb ây, de dàara a gin wàa. 3 Nit maan gin tâam wàa dii a gook geb ây. Koo wuna ti get e cîiw ni yuma titefki ba. 4 Ngam aw cîiwe nak mûsi jày ni titefki a nay, ni yuma titefki a kàn. Ey 'nunsifarre yuma titefki, hòysifarre titefki a nak wàa. Cen nirri ni kpèw kpèw wàa ti get e ûunu ba. 5 Tuma ni unji tâarre a gook geb ây, ni fak gopri ây. Taasirre, ngòsirre is wàa ni gòok ây. 6 Ye rabe di Yeesu kpâarriya, de 'nòo e yaa a ɗàm kpees wàa. 7 De bime ni tibimni ɓèl de gàa: Ji tâanjina ni muy ya, Yeesu Hàm Fay hòmge pî? Mi waamde ni nîir Fay, ta mu riisim 'màari ba. 8 Yèe kà yey ngam Yeesu gàawe: Jungci tindòom, yuu a gin nit yey! 9 Yeesu de gunu: Kà tâam nîir wey ya? De goose de gàaw: Nîir mum Mûsa ɗi, ngam ot mûuye dèy. 10 De waaw di Yeesu dèy, ta e màn daw da jungci tindòom ây a riiy maan ba. 11 Mûsa gicim ây dèy aw dii a kpàang gopri, aw faarre. 12 A tindòom ây de waan di Yeesu, de gàawan: Tèena a gin gicim ây, ot lek a is waw. 13 Yeesu de hîi daw orri. A tindòom ây de yuun a is nirri nà, de legin a is gicim ây gi. A gicim ây de lamran a kpàang gopri, de yaan a sòo ɓèl de wutkin a farra. Aw dii jày ge kpèt ujinè cuk. 14 A hàm faat gicim ây de 'nòon. De kàlin yèk yey da nit ây tâage a riiy ɓèl ni riiy kaa ây. A nit ây de digin gopta jàk yey mbirge gi. 15 De dàaran a gin Yeesu. De kpàawan nit yey tâage nà ni mûsa tindòom ây tâarre ton, mgbabe lurra, dànde mbâra. Aw tole pî. 16 A nit rapta jàk yey de sagin da nit ây yèk nit tindòom nà, ni gicim ây gi. 17 De waawan di Yeesu e yuu a riiy waw. 18 Ye yiɗi lekta a koombowal, nit tindòom nà de waaw, aw tâanji ni ey. 19 Yeesu ti goosu ba. Amma de gàaw: Koy a gin nit ta wey, mu kàl daw kày mbire Nitcoorra a hak wey, kày gobum 'maton ɗa. 20 De dige, de ɗaa kàlla a dees maan înin riiy ra kày mbiru Yeesu gi. Da nit ây pî tâa daw 'nang. 21 Yeesu yewsage ni koombowal a taga sòo ɓèl gi. Mûsa nit ây aw kimjage a gin wàa a cewci sòo. 22 Wûun a àay kimjum de dàara, nîir wàa Yayru. Ye rabu di Yeesu, de ûu a ɗàm kpees wàa. 23 De waaw dèy de gàa: Hàm mum hàm nikin gàarre e wurri. Ndògòn, dàara mu banggurra kàn ha mu ndòosuwa, ta e wut ba. 24 Yeesu de diknji ni Yayru. Mûsa nit ây dèy furre mu gàa aw èwnjurre. 25 Kin kana dii ni àyci yuurra njîim yeri ra sàm cuk. 26 Ey riiye nà 'màari a gin nit ndòosum ây 'nang 'nang, lòosige bèeb wàa pî. Amma àyci wàa ti ndòo ba, dikɗe ɗàm kpeesi. 27 A ye rage yèk Yeesu, de lege a mûsa nirri, e dàara a dat wàa. De mâaw a lurra wàa. 28 Ngam ey dàne, to mi mâa go koo lurra wàa gbè, ndòo gim ndòo. 29 Kòsòng yuurra njîim wàa gbèeye. Kin nà rage, is wàa ndòoye. 30 Yeesu ye rage, kpèw kpèw atnjige a is wàa, de dûre a tîim mûsa nit ây, de gune: Wun mâage lurra mum ya? 31 A lor ta wàa de goosin de gàawan: Mu kpàa kày èwnjum aw a nit ây, mu gun: Wun mâagim ya? 32 Amma Yeesu gopɗe, ha e kpàa nit mbita jàk yey gi. 33 Kin maan tolle, malle, ngam cèngnige jày mbirgu gi. De dàara e yaa a ɗàm kpees wàa. De sagu jày mbirgu pî. 34 Yeesu de gàaw: Hàm mum, goosum wey ndòosumge. Taysi mbâra, 'màari wey lòoye! 35 Ye tâa Yeesu yèerre kà yey, a nit ta wàa di Yayru nà aw dàarage. De kàluwan: Hàm wey wurre, ta mu loosu di Nitkàlnjum ba. 36 Yeesu ti ii tuy a yèk waw ba. De gàaw di Yayru: Mi yiɗi mu tol ba, sey mu goosi gbè! 37 Ti woo da nit ây aw diknji ni ey ba, sey Piyèr, ni Yakuba, ni Yuhanna kaa wàa di Yakuba. 38 Ye kpèrrin a àay Yayru, Yeesu de kpàa mûsa nit ây aw yèerre unggunggung. Aw umde dèy, aw taasirre. 39 De lege a àay de gun daw: Ngam jâ gbaanu yèy umnu ya? Hàm ti wut ba, amma kûu kûuye. 40 De wâskuwan. De yuuni daw pî. De arre too wàa ni nuu wàa di hàm, ni nit tâanjum ta wàa. De legin a gin tâa hàm gi. 41 De mòow di hàm nà a kàn, de gàa: Talita kumi, kà gàarra hàm mum, mi gàamde, ani! 42 Kòsòng hàm nikin nà de ane. De ɗaa gîta. Yer wàa dii ra sàm cuk. De tâa daw 'nang. 43 Yeesu de njang daw dèy, ta aw sak yèk maan koo di wuna ba. De gàa daw: Kàmin tiriici, un hîiw di hàm gi e rii!
