Marku 3

1Yeesu lege bak a àay gin kimjum. Nit wuta kàn dii a farra. 2A nit ây aw gopɗe di Yeesu, to ey ndòo ge ndòosu go a unji wuysum, ngam aw kàm yèy a hak wàa. 3De gàaw di nit wuta kàn: An mu gòy a tîim! 4De gun daw: Gesi mbita jàk mbâri a unji wuysum yi? Koo mbita jàk makta yi? Gesi saanum jungci nirri koo ɓàta nirri yi? Aw tâa baak baak. 5Yeesu gînirre nis wàa a gin waw ni ngòlnji, ngam ndèkta tinîir waw àyuge. De gàaw di nit wuta kàn: Pat kàn wey! De parre. Kàn wàa ndòoye. 6A ni-Farisa ây de yuun, de digin aw yèenji ni nit ta Herode kày gaw ɓàru di Yeesu. 7Yeesu woo gin maan, de taye ni lor ta wàa ot sòo ɓèl a Galile. Mûsa nit ây dèy aw furrurre. Aw anage a dees Galile, ni dees Yude. 8Aw anage ɗa a dees Yerusalem, a dees Idumaya, a riiy ây a dat sîirra Yurdun, ni cewci Tiiru ni Sidon. Mûsa nit ây aw dàarage a gin Yeesu, ngam aw rage jày mbire ey. 9Yeesu de gàa da lor ta wàa: Digin un kàmma hàm koombowal, mi gòy a sòo ngam ta nit ây aw èwnjim ba. 10Ndòosi nà nit ây dèy. Yòo jày a nit àyci ây pî aw hâtɗe dikta a gin wàa ngam aw banggurra. 11A nit tindòom ây ye rabuwan, aw yaa a ɗàm kpees wàa. Aw bimde aw gàa: Muy mu Hàm Fay ɗi! 12De njanggi daw dèy, ta aw lònu ey wun ɗi go ba. 13Yeesu naa a gopri. De 'naase nit ây yiɗi gi aw dàara a gin wàa. 14De carre nit ây ra sàm cuk ngam aw tâanji ni ey, ngam e tèe daw a tèem yèerra yèk Fay, 15ha aw kpàa mbinum aw yuuni tindòom makta ây ɗa. 16Aw rri yey a nit cata ây ra sàm cuk: Simon nit yey Yeesu 'naasu Piyèr kà gàarra kpata, 17Yakuba ni Yuhanna kaa wàa, a hàm ta Jebede, Yeesu 'naasi daw Bowanèrge kà gàarra a nit dûurra kà buun, 18ni Andere, ni Filip, ni Bartolomi, ni Matta, ni Toma, ni Yakuba hàm Alfa, ni Tadde, ni Simon nit yiɗum dees wàa, 19ni Yuda Iskariyo, nit mòorra Yeesu ni gâra. 20Yeesu ye ire a àay, mûsa nit ây aw kimjasa bak a gin wàa, ha ey ni lor ta wàa aw kpàa riirra tiriici ba. 21A kor ta wàa dàaran ay ye ragin yèk maan, de hèeran aw arruwa. Ngam aw gàarre: Ey doogige. 22A nit còycum ây aw anage a Yerusalem, de gàan: Yeesu dii ni Belsebu wûun tindòom makta ây. Ey hîigu mbinum e yuungi tindòom ây gi. 23Yeesu de 'naasi daw, de yèe daw ni rèenjum yèy de gàa: Kà kà Seyɗan ge mànsi hak wàa ya? 24To wûun ɗòlnji go ni nit ta wàa, wûun maan ge gòy ba. 25A nit àay kpolo aw ɗòlnji go a tîim waw, àay maan ge gòy ba. 26Hû go ɗa, to Seyɗan haa go gbàaci ni hak wàa, ɗò ge ɗòlnji cuk, mbinum wàa lòo ge lòo. 27Cen nirri ge kpàa lekta a àay nit kpèw kpèw e at jàk wàa ba. Sey to ɗàaw go 'mèmda nit kpèw kpèw gi, a dat maan kpàa ge kpàa ata jàk ta wàa tâagu a àay gi. 28Yeesu de gàa: Takundi mi gàanurre, nirri kpàa ge kpàa jàk yaafum a jàk maarra wàa ni yèk maasum pî. 29Amma nit yey maase Jungci Delliya gi, ge kpàa jàk yaafum ba sam, ngam ey tèeye jàk maarra woy yey tâa ge lòo ba gi. 30Yeesu gàa kà yey, ngam aw gàawe nà ey dii ni jungci tindòom. 31Nuu wàa ni kaa rra wàa di Yeesu aw dàarage, aw gòye a gbaa. Aw tèe nirri ngam e 'naasuwa. 32Mûsa nit ây aw tâarre a cewci Yeesu. De gàawan: Goosi, nuu wey ni kaa rra wey aw gòyrre a gbaa, aw 'naasumde. 33Yeesu de goosi daw de gàa: Wun tâage nuu mum ya, ni kaa rra mum gi ya? 34De gîne nis wàa a gin nit ây mgbaagu dèy, de gàa: Aw rri yey a kaa rra mum ni nuu mum. 35Ngam koo wun tèege jày yiɗi Fay gi, ey tâage kaa mum, koo say mum, koo nuu mum.

will be added

X\