Marku 2

1A dat unji 'nang 'nang Yeesu koysa a Kafernahum. Aw rage dii a àay. 2A nit ây dèy aw kimjige a àay maan, koo a ɓeeri gin tâarra cen. Yeesu sak dawrre yèk Fay. 3A nit ây de dàaran, de 'maaran nit wuta isi. A nit ây naan tokuwa. 4Ye tâa aw kpàa orri kày gaw tîiw a ɗàm kpees Yeesu ba ngam mûsa nit ây, de naan de kpulin kpiiri a fak àay a gin tâa ey gi. De cinin a kpongna gi nit wuta isi nà ni jingi gin kûurra wàa. 5Yeesu ye rabe goosum waw, de gàaw di nit wuta isi: Hàm mum, jàk maarra wey yaafige. 6A nit còycum ây aw tâarre ton a farra. De dànin a tinîir waw de gàan: 7Ngam jâ ey yèerre hûy ya? Ey maasi nîir Fay. Wun ge kpàa orri yaafum jàk maarra ya? Sey Fay gbè. 8Kòsòng Yeesu cèngnige dànda waw. De gàa daw: Ngam jâ dànnu hûy a tinîir wun ya? 9Jàk jâ hòmge àyrra, to mi gàaw go di nit wuta isi «jàk maarra wey yaafige», koo mi gàaw go «an mu at jingi wey, mu digi» ya? 10Ndika un cèngni, Hàm nirri dii ni mbinum ha e yaafi jàk maarra a deesi. De gàaw di nit wuta isi: 11Mi gàamde, ani at jingi wey, mu koyi! 12Nit wuta isi nà de ane, de arre jingi wàa yaale, de yuu a nis nit ây pî, ha de tâa daw 'nang pî. De 'misin nîir Fay. De gàan: Ot haa kpàarra jày kà yey ba. 13Yeesu diksi bak a cewci sòo ɓèl. A nit ây pî aw dàara a gin wàa. Ey kàlnji dawrre. 14Ye furre a orri, de rabe Lewi hàm Alfa tâarre a àay gin jomnum. De gàaw: Furrimi! De ane de furruwa. 15Yeesu de lege a àay Lewi e rii nàam. A nit ngota jomorrgol ây, ni nit makta ây dèy aw riinjirre ni Yeesu, ni lor ta wàa. Ngam aw dii dèy a nit ây futku gi. 16A nit còycum ây a tîim ni-Farisa ây a ye rabuwan riinjirre ni nit makta ây ni nit ngota jomorrgol ây, de gunin da lor ta wàa: Ngam jâ ey riinji ni nit ngota jomorrgol ây ni nit makta ây ɗa ya? 17Yeesu ye rage de gàa daw: A nit ây tâage kpèw aw cen ni gayam dikta a gin nit ndòosum ba, sey a nit ây tâage ni àyci. Mi dàara ha mi 'naasi nit ây tâage ɗèm ba, amma nit ây tâage ni jàk maarra. 18Unji kana a lor ta Yuhanna, ni ni-Farisa ây aw coorre riirra tiriici ngam nîir Fay. A nit ây de dàaran, de gunin di Yeesu: Ngam jâ a lor ta Yuhanna, ni lor ta ni-Farisa ây aw coorre riirra tiriici, amma a lor ta wey aw coorre riirra ba ya? 19Yeesu de goosi de gàa daw: A nit 'naasum ây a siir ata maanji gaw kpàa coorra riirra tiriici, to nit ata maanji tâanjirre go ni aw gi yi? Gaw coo riirra ba, ye tâan ni nit ata maanji gi. 20Amma unji dàa ge dàara ye gaw at nit ata maanji a gin waw. Unji maan coo gaw coo riirra tiriici. 21Cen nirri ge còosi ɗolnji jàk joorra woy fûuya a lurra mgbanti ba. Gàa go nirri mbir go hûy, ɗolnji jàk joorra fûuya dàng go, sûu ge sûunji lurra mgbanti, gin còosum ii ge iisirra ngata. 22Cen nirri ge duk mbàl fâarra a jòong woy mgbuurra ba. To nirri mbir go hûy, fâarra mbàl wa ge walsifa jòong. Jòong ni mbàl ɗa cuk mbo gaw mboyi. Sey nirri e duk fâarra mbàl a jòong mbâra. 23Yeesu ni lor ta wàa aw hòmde a tîim hèmna ây unji wuysum. A lor ta wàa de hòyin tirri aw tufi. 24A ni-Farisa ây de gunuwan di Yeesu: Kà kà tèen lor ta wey jày njangge yèk mgbèngda a unji wuysum gi ya? 25Yeesu de gàa daw: Un haa janggum a defterre Fay jày mbire Dawda ni nit tâanjum ta wàa ba yi? Ngam ye ày daw fey amma tiriici cenda daw ba, 26de legin a àay Fay, de kûnggin tàarri woy yey hîin hîiri a farra gi. Tàat maan sey a nit daprum ây gbè gaw kûnggi. Amma Dawda de kûngge, hîiye da nit ta wàa ɗa. Mgbàr maan Abiyata tâage nit ɓèl daprum a àay Fay. 27Yeesu de gàa daw bak: Fay ii unji wuysum ngam mbâr nirri. Amma ti mbangsi nirri ngam unji wuysum gbè ba. 28Hû go ɗi, Hàm nirri tâage nit ɓèl a unji wuysum ɗa.

will be added

X\