Marku 13

1Yeesu ye yuu a àay Fay, nirri kpolo a tîim lor ta wàa de gàaw: Nitkàlnjum, gop jâarra àay yey ni gòok ây delliya! 2Yeesu de goosu: Mu rabe jâarra kpaksum àay yey yi? Gòoy kpolo ge ngasɗa a fak gòok kana ba, kpu gaw kpulgifa pî a deesi. 3Yeesu tâarre a gopri korrom, ini nis wàa a cewci àay Fay. Piyèr, ni Yakuba, ni Yuhanna, ni Andere aw gbè tâanji ni ey. De gunuwan: 4Kàlna, ningàa ge mbir jàk yey yèemu gi ya? Ji ge lòni kpèta jàk ây gi ya? 5Yeesu de gàa daw: Faasin hak wun, ta koo wuna e rûfnu ba. 6Ngam a nit ây dèy dàa gaw dàara ni nîir mum, gaw gàa: Miy mi Kristu ɗi. Rû gaw rûfi nit ây dèy. 7A ye gun rak tapnjum bàpri ni yèk bàpri, ta jungci isi e kpulnu ba. Sey jàk ây gi e mbiri, amma lòorra kparri ɗà kpèrra ba. 8Nit dees ây a gaw an a gin nit dees ây kana. Wûun a ge an a gin wûun kana aw tapnji bàpri. Deesi yûu ge yûu a gin kana 'nang 'nang. Fek ɓèl ii ge ii. A jàk ây gi pî tâa ge tâa kà ɗaarra 'màari a ciisum hàm. 9Amma un faasin hak wun! Ngam 'maa gaw 'maanu a kiita nit ɓèl raknjum ây, lu gaw lutnu a àay gin kimjum ta waw. Gò gaw gòynunu a ɗàm kpees ngomna ây ni wûun ây ngam yèk mum, ha un lòni seedamku a gin waw. 10Amma màrra sey aw sak Yèk Kâwrra da nit dees ây pî. 11Ye gaw 'maanu a ɗàm kpees nit hiitum ây, ta un dànji kà gun yèe ya ba. Amma unji maan kpèrra go, yèen yèk yey kpàanu gi. Ngam yèk yey ge ana a gin wun ba, amma a ge ana a gin Jungci Delliya. 12Nirri hîi ge hîi kaa wàa koo ɓèl wàa aw ɓàruwa. Hû go ɗa tooy hàm hîi ge hîi hàm wàa. A hàm ây ngaa a gaw anda daw da too rra waw ni nuu rra waw, aw ɓàri daw. 13A nit ây pî yii gaw yiinu ngam nîir mum. Amma nit yey èfke tinîir wàa ha gbèeni gi, kpàa ge kpàa saarra. 14Yeesu de gàa bak: Ye gun rap jàk kpulla jungci isi, ni mboysum jàk ây tâarre a gin yey tâa ti gesu ba, sey nit janggum yèk yey a cèngni jàk ây gi! Mgbàr maan a nit ây tâage a dees Yude gi, sey aw ɗul aw 'nòo a gopri. 15Nirri dii go a fak àay, ta e cir ngam ata jàk ta wàa ba. 16Nirri dii go a hèmna, ta e ir u gbaa e at lurra wàa ba. 17Amma 'màari dii daw da kin himni ây, ni nikin ây âwsi hàm ây a mgbàr maan! 18Waan Fay ngam ta jàk ây gi e mbir a cot ngisim ba. 19Mgbàr maan 'màari dèy ii ge ii, kà yey tâa ti haa iirra ba diga Fay ɗaa mbangsum jày ha kòsòng. Ge haasirra iirra hû go ba. 20To Tooy Ɓèl atnjifa go ngin a unji 'màar ây gi ba, koo nirri kpolo ge kpàa saarra ba. Amma atnjifage unji ây maan yèk nit ta wàa carre gi. 21To nirri dàara go e gàanu «e rri yey Kristu ay gi», koo «e rri yey go Kristu ay go», ta un goosu ba. 22Ngam Kristu rèengda rèeng ây, ni nit lònum yèk rèeng ây a gaw ani, aw lòni jàk kayeefi ây ngam rûfnum da nit ây carre Fay gi, to gaw kpàa go orri. 23Faasin hak wun! E rri yey mi ɗàanu kàlla jàk ây gi pî diga màrra. 24Amma mgbàr maan a dat 'màari nà, unji ku ge kupti yiriya kurrum, corri ɗa woo ge woofa kayngum. 25A tibiskum ây a faktiturum yaa gaw yaari, kpèw kpèw jàk ây gòyni faktiturum gi yûu gaw yûu. 26A dat maan ra gaw rap Hàm nirri dàararre a titurum ni 'mita wàa, ni mbinum dèy. 27Tèe ge tèera malayka ta wàa a gbèeni deesi pî, ha aw kimji da nit ta wàa carre gi. 28Engnin a yèk futifay. A jalnji ây aw baararre go, aw gosi waasi, un cèngnige cot iiy hèerage. 29Hû go un ngaa a ye gun rap jàk ây gi aw mbitɗe go, cèngnin Hàm nirri hèera a nin. 30Takundi mi gàanurre, a nit ây tâarra yey gaw wut ba, sey to jàk ây gi pî mbir go. 31Faktiturum ni deesi lòo ge lòo, amma yèk mum ge lòo ba sam. 32Amma koo wuna ti cèngni mgbàr maan ni unji maan ba, koo a malayka ây a faktiturum, koo Hàm nirri aw cèngni ba, sey Tooy Ɓèl gbè. 33Mûyin, un faasi hak wun! Ngam un cèngni unji kpèta jàk ây gi ba. 34Tâa ge tâa kà nirri tay go kpâarriya woo àay wàa, e hîi orri da nit tèem ta wàa koo wuna ni tèem wàa. E gàaw di nit waatum àay e waati mbâra. 35Hû go mûyin, ngam un ɗa un cèngni mgbàr koyrra nit àay ba, koo ni mbona, koo tîim tuma, koo tuma ndamji, koo ndamji birit. 36To ey koyra go a ye tâa un cèngni ba, ta e kpàanu un kûurre ba. 37Jày gàam dun gi, mi gàarre da nit ây pî: Mûyin!

will be added

X\