Luka 7

1Yeesu ye gbèese yèerra yèk wàa pî a tuk nit ây, de dige a Kafernahum. 2Nit tèem wàa di nit ɓèl sooje ây dii ni àyci, kèle wucu. Nit ɓèl sooje ây yiɗurra di nit maan dèy. 3Ye rage yèk Yeesu, de tèefa toonji ni-Yude ây a gin wàa, aw waawa e dàara, e ndòosu di nit tèem wàa. 4Ye kpèrran a gin Yeesu, de waawan de gàan: Ndògòn, nit ɓèl sooje ây yey gesi mu mgbaanjuwa. 5Ngam ey yiɗi da nit ta worro, ey jâagina àay gin kimjum gi. 6Yeesu de taynji ni aw. Ye hèera a àay, nit ɓèl sooje ây de tèefa soob ta wàa, de gàawan: Nitcoorra, nit ɓèl sooje ây gàa, ta mu loosi hak wey ba. Ngam mi get ha mu lek a àay mum ba. 7Hû go mi raptu di hak mum, mi get mi difa a gin wey ba. Amma yèe yèy kpolo, ha àyci nit tèem mum e ndòo. 8Ngam miy mi dii a kàn nit ɓèl kana, mi dii ɗa ni sooje ây a kàn mum. Mi gàaw go di nirri “digi”, di ge digi. Mi gàaw go di nit kana “dàara”, dàa ge dàara. Mi gàaw go di nit tèem mum “tèe jàk yey”, tèe ge tèe hû go. 9De tâaw 'nang di Yeesu ye rage yèk yey. De dûre a gin mûsa nit ây futku gi, de gàa daw: Mi gàanurre, koo a tîim ni-Israyel ây mi haa kpàarra goosum kà yey a tinîir nirri ba. 10A nit ây tèefa daw nit ɓèl sooje ây ye iran a àay, de kpàawan àyci wàa ndòowe di nit tèem nà. 11Yeesu de dige a riiy kana înuwan Nayin. A lor ta wàa ni mûsa nit ây dèy aw diknji ni ey. 12Ye hèeran a nin riiy maan, e rri yey a nit ây aw tokrarre wurra ha aw sipti, hàm kpolo ɗi gbè di kin wurra. A nit ây dèy aw furrurre di nuu wàa. 13Yeesu Nitcoorra ye rabu di kin maan, tinîir wàa de àyuwa, de gàaw: Ta mu um ba! 14Yeesu de hèera e mâaw di titokni wurra. A nit ây toke wurra de gòyin. De gàa: Lori, mi gàamde, ani! 15Wurra nà de ane de tâa ton, de ɗaa yèerra yèy. Yeesu de gàaw di nuu wàa: Ngosi hàm wey! 16Tolnji de mòo daw da nit ây, de 'misin nîir Fay de gàan: Nit lònum ɓèl kpèrra a tîim worro. Fay dàara e mgbaanji da nit ta wàa. 17Yèk Yeesu yeski a dees Yude ni riiy ây a cewci dees maan pî. 18A lor ta wàa di Yuhanna de saguwan yèk Yeesu pî. Yuhanna de 'naasirra nit ây cuk a tîim lor ta wàa, 19de tèe daw a gin Yeesu Nitcoorra ngam aw gunuwa: Muy tâage nit yey ge dàara nà, koo ot waarre nit kana yi? 20A nit ây nà cuk gi ye kpèrran a gin Yeesu, de gàawan: Yuhanna nit iirra baptisma tèega dorro a gin wey, gàa: Muy tâage nit yey ge dàara gi, koo ot waarre nit kana yi? 21Mgbàr maan Yeesu ndòosi nit ây dèy a àyci waw ni 'màar ta waw, yuuni tindòom ây, ɓelsi daw nisi da nit râay ây dèy. 22Yeesu de goosi de gàa daw da lor ta Yuhanna: Digin, un kàlu di Yuhanna jày rapnu gi, raknu gi: A nit râay ây aw rapɗe, a nit èskum ây aw dikɗe mbâra, a nit rak is ây aw kpàarre ndòosum, a nit gbukrum ây aw rakɗe, a nit ây wutke gi aw gûysirre, da nit èca ây aw sak dawrre Yèk Kâwrra. 23Kâwum diiw di nit yey tâa ti ir u daarri ngam mum ba. 24A nit ây tèera daw Yuhanna ye koyin gi, Yeesu de yèe da mûsa nit ây yèk Yuhanna, de gàa: Ji yuunu raptum a nûri ya? Samsi yey yûusu hiski gi yi? 25Koo ji yuunu raptum ya? Nit mgbapta lurra woy mbâra yi? A nit mgbapta lurra delliya, ni nit tiɗèpsum ây aw dii a àay wûun ây. 26Koo ji yuunu raptum ya? Nit lònum yèk Fay yi? Mi gàanurre: Takundi, un rabe nit yey hòmgi daw da nit ây lòni yèk Fay. 27Yuhanna ey tâage nit yey kèrin nà yèk hak wàa gi, ye gàa Fay: E rri yey mi tèefarre nit tèer mum a ɗàm kpees wey, ha e mgbar ot wey. 28Mi gàanurre, a nikin ây aw haa kpàarra nirri hòmgu 'mita di Yuhanna ba. Amma nit yey hòmge luurra a wûun Fay gi, ey hòmgu 'mita di Yuhanna. 29A mûsa nit ây ni nit jomnum ây ye ragin nà yèk Yuhanna, aw kàlni takundi a yèk Fay ni mbâr wàa, aw ngore nà baptisma a gin wàa. 30Amma a ni-Farisa ây ni nit còycum ây a yèk mgbèngda Muusa, aw hàwe jày yiɗi Fay a hak waw, ngam aw ngor baptisma a gin Yuhanna ba. 31Yeesu de gàa bak: Ni ji gim getnjini yòot nit ây tâarra yey ya? Ni ji rèenjin ya? 32Aw rèenji ni hàm ây tâage a luumu, ye 'naasnjin aw gàa: Ot urfa dun jàk uta, amma un sii ba, ot 'naasi ndûu wurra, amma un um ba. 33Ngam Yuhanna nit iirra baptisma dàarage, ti riirre nàam ba, ti njoorre mbàl ba, un gàa: Ey dii ni tindòom. 34Hàm nirri dàarage, ey riirre njoorre, un gàarre: E rri yey nit riirra tiriici dèy ni tinjoorgum mbàl, soob waw da nit ngota jomorrgol ây ni nit makta ây. 35Amma còycum Fay cèngnumya ɗi a gin nit ây ngorge gi pî. 36Nirri kpolo a tîim ni-Farisa ây 'naasuge di Yeesu aw riinji ni ey. De lege a àay ni-Farisa nà, de tâa ton ha e rii nàam. 37Kin kana mbirge jàk maarra dii a riiy maan. Ye rage, Yeesu tâa a àay ni-Farisa nà riirre nàam, de 'maara kîrnga ni num mgbirgumya. 38De lekfa a àay, de gòye a dat Yeesu a nak wàa, de ume. De dàngsu nak Yeesu ni rîsim wàa. De pirrufa nay nà ni gimsi hak wàa, de pèwurra tipèwni, e fòogurra num mgbirgumya a nak Yeesu. 39Ni-Farisa ye rabe jàk yey, de yèe a tinîir wàa de gàa: Nit yey to tâa go ngin nit lònum yèk Fay, cè ge cèngni ngin kin yey banggurra gi, kin makta ɗi. 40Yeesu de gàaw di ni-Farisa nà: Simon, mi dii ni yèy ha mi kàlum. Simon de gàaw: Kàlimi, Nitkàlnjum. 41Yeesu de gàa: A nit ây cuk aw arre nà kiri a gin nit bèebi. Nit kpolo arre seede jày ge ii kurra ra kèrèw, nit cukti ɗa jày ge ii kurra kèrèw. 42Ye tâa jày ceni daw aw jinggu ba, nit maan de woofa daw pî. Kà yey kàlim, wun ge hòmu yiɗum di nit bèebi a tîim waw ɗa cuk ya? 43Simon de goosi de gàaw: Mi dànde, nit yey woowfa dèy gi. Ey ge hòmu yiɗum di nit bèebi gi. Yeesu de gàaw: Hû go ɗi, mu dàni mbâra. 44De dûri cewci kini nà, de gàaw di Simon: Mu rabu di kin yey yi? Ye lekma a àay wey, mu èenim sòo kòlni nay. Amma ey dàngsim nak mum ni rîsim, pirrimfa ni gimsi hak wàa. Muy mu kabim tikapni kà hàar worro ba. 45Amma ey ye lekra gi, ti woofa coorra ni pèwrra tipèwni a nak mum ba. 46Muy mu fòogimda num a hak mum ba. Amma ey fòogimda nak mum ni num mgbirgumya. 47Hû go mi gàamde: Yiide kin yey dii dèy, kàlnige jàk maarra ta wàa dèy tâagu gi, yaafige. Amma nit yey kpàage yaafum càa, yiide wàa ɗa dii càa. 48De gàaw di kini nà: Jàk maarra wey yaafige. 49A nit ây riinji ni ey de yèen a tinîir waw de gàan: Wun ɗi nit yey ha e yaafi jàk maarra ya? 50Yeesu de gàaw di kin maan: Goosum a tinîir wey saanumge. Taysi mbâra!

will be added

X\