Luka 6

1Yeesu hòmde a tîim hèmna ây unji wuysum. A lor ta wàa de hòyin tirri, de karin ni kàn aw tufi. 2A nit ây kana a tîim ni-Farisa ây de gàan: Kà kà tèenu jày njangge yèk mgbèngda a unji wuysum gi ya? 3Yeesu de goosi de gàa daw: Un haa janggum a defterre Fay jày mbire Dawda ni nit tâanjum ta wàa ba yi? Ngam ye àyu fey, 4de lege a àay Fay, e at tàat yey hîin hîiri a farra gi. E kûngge, de hîi da nit tâanjum ta wàa ɗa. Tàat maan sey a nit daprum ây gbè gaw kûnggi. 5Yeesu de gàa daw: Hàm nirri ey tâage nit ɓèl unji wuysum. 6A unji wuysum kana Yeesu de lege a àay gin kimjum, de kàlnji daw. Nit kana dii a farra, kàn riina wutiya. 7A nit còycum ây ni ni-Farisa ây aw faawrre di Yeesu, to ey ndòo ge ndòosi go nirri a unji wuysum gi, ngam ha aw kpàa yèy a hak wàa. 8Amma Yeesu ye cèngni jàk dànda waw, de gàaw di nit wuta kàn nà: An mu gòy a tîim! De ane de gòye ti. 9Yeesu de gàa daw: Mu gunurre jày kpolo: Gesi nirri e tèe jàk mbâri a unji wuysum koo jàk maarra yi? E saani jungci nirri, koo e ɓàr nirri yi? 10De gîni nis wàa a gin nit ây pî, de gàaw di nit wuta kàn: Pat kàn wey! De parre. Kàn maan de tâasi kà kàn cukti. 11Ngòlnji de mûu a tinîir nit ây kana. De yèenjin a tîim waw kày gaw mbiru jày di Yeesu. 12Mgbàr maan Yeesu naa a gopri ngam e waa Fay. De waa tuma tuma ha ndamji. 13Ye kayge gi, de 'naase da lor ta wàa. De catɗa a tîim waw nit ây ra sàm cuk, de în daw nit tèerra ây a tèem wàa. 14Di Simon de înu Piyèr, ni kaa wàa Andere, ni Yakuba ni Yuhanna, ni Filip, ni Bartolomi, 15ni Matta, ni Toma, ni Yakuba hàm Alfa, ni Simon nit yiɗum dees wàa, 16ni Yuda hàm Yakuba, ni Yuda Iskariyo nit yey irge nit mòorra Yeesu ni gâra. 17Yeesu ye cisa a gopri, de gòye a beey. A nit futa ta wàa dèy, ni mûsa nit ây anga a dees Yude pî, ni Yerusalem, ni Tiiru ni Sidon riiy yey tâage a cewci sòo ɓèl, aw dii a farra. 18Aw dàarage ngam aw rak yèk wàa, ha e ndòosi daw da nit àyci ây. Da nit ây riige 'màari ni tindòom makta, Yeesu yuuni dawge ɗa. 19A nit ây pî aw hèesa ha aw banggurra, ngam mbinum yuura a gin wàa, ndòosi dawge a àyci waw pî. 20Yeesu de ine nis wàa a gin lor ta wàa, de gàa daw: Kâwsin tinîir wun un nit èca ây, ngam gin tâam wun dii a wûun Fay! 21Kâwsin tinîir wun un nit fek ây, ngam Fay o ge olsunu. Kâwsin tinîir wun un nit ây umri gi, ngam wàa gun wâasi. 22Kâwsin tinîir wun, to a nit ây aw yiinu go, aw ɗòlfa dun go ni aw, aw lètnu go, aw yuununu go kà nit makta ây yèk Hàm nirri. 23Mgbàr maan tâan ni tinîir kâwrriya, siin ni ɗotkum a tinîir wun. Ngam bèeb tèem wun dii dèy a faktiturum. A wosom ta waw aw mbire nà maarra kà yey da nit ây lòni yèk Fay gi. 24Amma 'màari waanurre dun nit bèeb ây, ngam un kpàa nà kâwum wun mgban. 25'Màari waanurre dun nit oca ây, ngam fey à ge àynu! 'Màari waanurre dun nit ây wâase gi, ngam bi gun biri, un umi. 26'Màari waanurre, to a nit ây pî aw yèerra dun go delliya. Ngam kà yey mbirin wosom ta waw da nit lònum yèk rèeng ây. 27Amma mi gàanurre, un nit ây rakim gi: Yiɗin nit bàpri ta wun, mbirin daw jàk mbâri da nit yiir ta wun. 28Mbârsin da nit ây maasunu gi, waan Fay ngam nit ây njàmgunu gi. 29To nirri lòsum go a kpalnga kpolo, inu woy cukti ɗa. To nirri at go godo wey, woow e at lurra wey ɗa. 30Koo wun waagum go jày ya, sey mu hîiwa. To nirri arrum go jày tâagum gi, ta mu gunsu ba. 31Kà yey yiɗunu a nit ây aw mbitnu gi, un ɗa mbirin daw hû go. 32To un yiɗi go da nit ây yiɗunu gi, wun ge gàanu mbew ya? Ngam a nit makta ây ɗa aw yiɗirre da nit ây yiɗi daw gi. 33To un mbir go jàk mbâri da nit ây mbirgunu mbâri gi, wun ge gàanu mbew ya? Ngam a nit makta ây ɗa aw mbitɗe kà yey. 34Un hîi go kiri da nit ây dànnu gaw hîisunu jàk maan, wun ge gàanu mbew ya? Ngam a nit makta ây ɗa aw hîirre da nit ây, ngam aw hîisi daw kà woy maan. 35Amma yiɗin nit bàpri ta wun, mbirin mbâra da nit ây, hîin kir yey dànnu gun haa kpàasum ba! Jàk koyrra wun dii dèy, tâa gun tâa hàm ta Fay tâage a faktiturum. Ngam ey mbitɗe mbâri koo da nit ây tâa aw gàarre mbew ba, ni nit ây tâage nit kperrem ây ɗa. 36Tâan ni 'maton, kà yey tâa Too wun ni 'maton gi. 37Ta un hiiti da nit ây kana ba, ngam ta Fay e hiitunu ba. Ta un mòo nirri ni kiita ba, ngam ta Fay e mòonu a kiita ba. Yaafin da nit ây kana, Fay yaa ge yaafunu ɗa. 38Hîin, Fay hîi ge hîinu. Hîi gaw hîinu a taasaw èftiya mbâra, mûurriya, yûugumya. Fay hîi ge hîinu a kàn wun kà yey hîinu da nit ây kana. 39Yeesu de yèe daw ni rèenjum yèy, de gàa: Nit râay ge kpàaw nàta nit râay kana yi? Aw cuk ɗa gaw yaa a goo ba yi? 40Nit èngnum ge hòmu di nit kàlnjum wàa ba. Nit yey gbèese èngnum, tâa ge tâa kà nit kàlnjum wàa. 41Ngam jâ raptum pòong a nis kor wey ya, amma mu rap ɓulnji a nis wey ba ya? 42Kà gum gàaw di kor wey “kor mum, woo mi yuunumfa pòong a nis wey”, amma muy mu rapɗe ɓulnji a nis wey ba ya? Mu nit tibiw ɗi, yuuni ɗà màrra ɓulnji a nis wey, ha mu rap mbâra, mu yuunufa pòong a nis kor wey! 43Futifak mbâra ge rep jàk nîirra maktiya ba. Futifak yey tâage maktiya ɗa ge rep jàk nîirra mbâra ba. 44Futifay pî cè gaw cèngsu a nîirra wàa. Cen nirri ge hap nîirra jâaci a cikci ba, ge kar nîirra timgbokcum a ngèwci ba. 45Nit mbâri yuu ge yuuni jàk mbâri a tinîir wàa mbâriya. Nit makta ɗa yuu ge yuuni jàk maarra a tinîir wàa maktiya. Ngam mgbelyèk nirri yèerre jàk yey mûuge a tinîir wàa. 46Yeesu de gàa daw bak: Ngam jâ 'naasim un Nitcoorra Nitcoorra, amma un mbitɗe jày gàami dun ba ya? 47Koo wun dàaga a gin mum, rake yèk mum, tèege kà yey gàa gi, kà gim kàlnu ni nit yey rèenje gi. 48Rèenji ni nit jâarra àay cèege yengdiya ha a kpata, jâage fur àay ni gòoy. Buun ɓèl ye yaara gi, sòo de sîira, de dènggu di àay, ti mbiru koo jâ ba, ngam jâarra maan mbâriya ɗi. 49Amma nit yey rake yèk mum, tâa ti tèe kà yey gàa yèk maan ba, ey rèenji ni nit jâarra àay, tâa ti cèe ba, jâage a deesi gbè, gòoy cen. Sòo ye sîira, de dènggu di àay maan, de yaa yaale, de mboye pî.

will be added

X\