Luka 5

1Mgbàr kana Yeesu dii a cewci sòo ɓèl Genesaret. A nit ây dèy de hèewrran he de èwnjuwan, ngam rakta yèk Fay. 2De rabe koombowal ây cuk a cewci sòo. A nit depta cîit ây aw yuuye, aw kòle tidepni waw. 3Yeesu de lege a koombowal Simon înuwan Piyèr, de waaw e hèesifa càa a cewci sòo. De tâa a koombowal e kàlnji daw da nit ây. 4Ye gbèe yèerra, de gàaw di Simon: Kurfa koombowal a gin tâa yengdiya, 'màktin tidepni wun ngam depta cîici. 5Simon de goosi de gàaw: Nitkàlnjum, ot loo depta tuma tuma, ot mòo cîici koo kpolo ba. Amma ye tâa muy gàage, di gim dik mi 'màkti tidepni. 6Ye mbirin kà yey, de mòon cîit ây dèy, ha tidepni ta waw gàarre e ngarri. 7De 'naasin da nit ây a koombowal kana ni kàn, aw dàara aw nàtnji daw. De dàaran, de mûunin koombowal ây cuk, ha aw kèle lèmcu a sòo. 8Simon Piyèr ye rabe kà yey, de gbâyge a ɗàm kpees Yeesu, de gàaw: Nitcoorra, hèesi a gin mum, ngam miy mi nit makta ɗi! 9Tâawe 'nang di Simon ni nit ây tâanjin gi pî, ngam mûsa cîit ây debin gi. 10Tâa daw 'nang ɗa da Yakuba ni Yuhanna hàm ta Jebede, nit tâanjum ây ni Simon. Yeesu de gàaw di Simon: Ta mu tol ba, diga niyey tâa gum tâa nit depta nit ây kà yey depmu cîici gi. 11Ye kurin koombowal ây a cewci sòo, de woofan jàk ta waw pî, de furruwan di Yeesu. 12Yeesu dii a riiy kana. Nit rak isi de rabu, de gbâyge a deesi a ɗàm kpees wàa, de waaw de gàaw: Nitcoorra, gum kpàa mu ndòosimi, to mu yiɗi go. 13Yeesu de parre kàn wàa de banggurra, de gàa: Mi yiɗige, àyci wey e ndòo. Rak isi nà woowe di nit maan yaale, ndòoye. 14Yeesu de mgbènggu de gàaw: Ta mu sak yèk yey koo di wuna ba. Amma dik mu kàlni is wey di nit daprum a àay Fay, mu hîi hîiri kà yey gàa Fay a defterre Muusa, ngam kàlnum àyci wey ndòoye. 15Amma yèk Yeesu iisirra yeskum. Mûsa nit ây dèy aw dàara ngam aw rak yèy a gin wàa, e ndòosi daw ɗa a àyci waw. 16Yeesu de woo daw e tay a nûri ey kpolo wàa, e waa Fay a farra. 17Mgbàr kana Yeesu kàlnji dawrre da nit ây. A ni-Farisa ây ni nit ây kàlnje yèk mgbèngda Muusa, anga a dees Galile, ni dees Yude, ni Yerusalem, aw tâarre a farra. Mbinum Fay dii a gin Yeesu ngam ndòosum da nit àyci ây. 18A nit ây de tokran nit wuta isi ni jingi. Aw kàmi orri ha aw leknu a àay, aw iiw a ɗàm kpees Yeesu. 19Amma ye tâa aw kpàa orri ha aw leknu a gin wàa ba, ngam mûsa nit ây, de naan a fak àay aw kpul kpongna. De cinuwan di nit àyci ni jingi wàa a tîim nit ây a ɗàm kpees Yeesu. 20Yeesu ye rabe goosum a tinîir waw, de gàaw ɗi nit maan: Soob mum, jàk maarra wey yaafumge. 21A nit còycum ây ni ni-Farisa ây de dànin a tinîir waw de gàan: Wun ɗi nit yey maase nîir Fay ya? Wun ge mbin yaafum jàk maarra ya? Sey Fay gbè. 22Amma Yeesu ye cèngsi dànda waw, de gàa daw: Ngam jâ dànnu kà yey a tinîir wun ya? 23Jàk jâ hòmge àyrra, to nirri gàaw go di nit kana “jàk maarra wey yaafumge”, koo gàaw go “an, mu digi” ya? 24Ndika un cèngni, Hàm nirri dii ni mbinum ha e yaafi jàk maarra a deesi. De gàaw di nit wuta isi: Mi gàamde, an mu at jingi wey, mu koyi! 25Nit wuta isi nà de ane yaale a ɗàm kpees nit ây, de arre jingi wàa, de koye. 'Misirre nîir Fay. 26De tâa daw 'nang da nit ây, de 'misin nîir Fay. Aw pî aw tole, de gàan: Ot rabe jàk kayeefi unji yey! 27A dat maan Yeesu ye yuu, de rabe nit ngota jomorgol tâarre a àay gin jomnum, nîir wàa Lewi. De gàaw: Furrimi! 28Ey de woofa jàk ây pî. De ane de furruwa. 29Lewi de kàmurra tiriici a àay wàa. A nit ngota jomorrgol ây dèy, ni nit ây kana ɗa aw riinji ni aw. 30A ni-Farisa ây, ni nit còycum ây de hûungin a gin lor ta Yeesu, de gàan: Ngam jâriinjunu, njoonjunu ni nit ngota jomorrgol ây, ni nit makta ây ya? 31Yeesu de goosi de gàa daw: A nit ây tâage mbâra aw cen ni gayam dikta a gin nit ndòosum ba, sey a nit ây tâage ni àyci. 32Mi dàara ha mi 'naasi nit ây gòyge ɗèm ba, amma nit ây tâage ni jàk maarra, ha aw ini tinîir waw. 33A nit ây de gàawan di Yeesu: A lor ta Yuhanna aw coorre riirra tiriici nak mûsi jày, aw waarre Fay kà lor ta ni-Farisa ây. Amma a lor ta wey aw riirre, aw njoorre. 34Yeesu de gàa daw: Kpàa gaw kpàa gàarra da nit 'naasum ây a siir ata maanji, aw coo riirra tiriici, to nit ata maanji tâanjirre ni aw gi yi? 35Amma unji kana dàa ge dàara, ye gaw at nit ata maanji a gin waw. Unji maan gaw coo riirra tiriici. 36Yeesu de yèe daw ni rèenjum yèy de gàa: Cen nirri ge gûu jàk joorra a lurra woy fûuya, e còosi a lurra mgbanti ba. Gàa go nirri mbir go hûy, lurra fûuya mboye, jàk joorra ge getnji ni lurra mgbanti ba. 37Cen nirri ge duk mbàl fâarra a jòong woy mgbuurriya ba. Gàa go nirri mbir go hûy, fâarra mbàl wa ge walsifa jòong. Mbàl tuu ge tuu, jòong ngaa mboye. 38Amma koo wuna ge mbir kà yey ba. Sey nirri e duk mbàl fâarra a jòong mbâri. 39To nirri njoo go mbàl woy mgbanti, ge yiɗi mbàl fâarra ba. Ngam gàa ge gàa: Woy mgbanti hòmge kâwrra.

will be added

X\