Luka 21

1Yeesu gopɗe a cewci wàa, de rabe nit bèeb ây aw iirre seede a gin hîirra hîiri a àay Fay. 2De rabe ɗa kin wurra ni-èca hîi sunku cuk a gin iirra seede gi. 3Yeesu de gàa: Takundi mi gàanurre, kin wurra yey a èca wàa hîi jày hòme da hîir nit ây pî. 4Ngam aw pî aw hîi a gbaarra bèeb ta waw, amma ey hîiye a jày tâagu càa ge mgbàani is wàa pî gi. 5A nit ây kana de yèen yèk della àay Fay, kày jâan àay maan ni gòok ây delliya, ni iirra jàk hîir ây ɗa a farra. Yeesu de gàa daw: 6Mgbàr kana dàa ge dàara, gòoy ge ngasɗa a fak gòok kana ba a jàk ây raptunu gi. Kpu gaw kpulgifa pî a deesi. 7A nit ây de gunuwan: Nitkàlnjum, ningàa ge mbir jàk yey ya? Ji ge lòni kpèta jàk yey gi ya? 8Yeesu de gàa: Faasin hak wun, ta aw rûfnu ba! Ngam a nit ây dèy dàa gaw dàara ni nîir mum, aw gàa “miy mi Kristu ɗi”, koo aw gàa “unji gbèeni hèerage”. Ta un furri daw ba. 9To un rak go tapnjum bàpri, koo anda yèy, ta jungci isi e kpulnu ba. Ngam sey jàk ây gi e ɗaa mbita, amma lòorra kparri ɗà kpèrra ba. 10De gàa daw: Nit dees ây a gaw an a gin nit dees ây kana, wûun a ge an a gin wûun kana, aw tapnji bàpri. 11Deesi yûu ge yûu dèy a gin kana 'nang 'nang, fek ɓèl ni àyci ây maktiya ɗa dàa ge dàara. Kayeefi ɓèl ni jàk ây 'nang 'nang lò ge lòt a faktiturum, ha e tolsi da nit ây. 12Amma ɗoko jàk ây gi pî e mbirgi, ɗàa gaw ɗàanu ɗàari, mòo gaw mòonu aw hîinu a kàn nit ɓèl ây a àay gin kimjum, aw leknunu a kultuma, 'maa gaw 'maanu a ɗàm kpees wûun ây, ni ngomna ây ngam nîir mum. 13A 'màar ây maan kpàa gun kpàa lònum seedamku. 14Ɓaysin a tinîir wun, ta un dànji, kà gun goosi a yèk hak wun gi ya ba. 15Ngam hîi gim hîinu yèy ni còycum a jàk ây maan, ha a nit yiir ta wun gaw kpàanu hàanjum aw sunnu ba. 16Koo too wun ni nuu wun, ni kaa rra wun, ni kor ta wun, ni soob ta wun hîi gaw hîinu a kàn nit ây. Ɓà gaw ɓàr nit ây kana a tîim wun. 17A nit ây pî yii gaw yiinu ngam nîir mum. 18Amma koo gimsi kpolo a hak wun ge gbeerra ba. 19Ni mòorra mbâra, ni èfta tinîiri kpàa gun kpàa jungci wun. 20Un rap go Yerusalem mgbaa ni mûsa nit bàpri ây gi, cèngnin mboyrra riiy yey hèerage. 21A nit ây tâage a dees Yude gi, sey aw ɗul aw 'nòo a gopri. A nit ây tâage a Yerusalem, sey aw yuu a nûri. A nit ây tâage a nûri, ta aw lekra a Yerusalem ba. 22Ngam unji ây maan tâage unji kànsum kiita a riiy yey, ha jày pî gàa a defterre Fay e gbèe. 23'Màari dii daw da kin himni ây ni nikin ây âwsi hàm ây a mgbàr maan! 'Màar ɓèl ii ge ii a dees yey, ni ngòlòm Fay a gin yòot nit ây yey. 24Ɓà gaw ɓàri daw ni ɓet ɓèl, 'maa gaw 'maa daw 'mèmdiya a dees ni-riiy ây kana pî. A nit ây èege yèk Fay mbo gaw mboysifa Yerusalem. Aw tâa a farra ha mgbàr mbinum nit èca yèk Fay e gbèe. 25Jàk lòta tâa ge tâa a unji, ni corri, ni tibiskum ây ɗa. Ayrra tinîiri mòo ge mòo da yòot ni-riiy ây a deesi ha aw toli, ngam dûurra ni kèlmum sòo ɓèl. 26Tinîir nit ây 'nu ge 'nuni, ngam tolnji a jàk ây ge dàara a deesi gi, ngam mbinum a faktiturum yûu ge yûu. 27A dat maan ra gaw rap Hàm nirri dàararre a titurum ni 'mita wàa, ni mbinum dèy. 28To jàk ây gi mbitɗe go, anin, toolin hak wun, ngam saarra wun hèerage. 29Yeesu de yèe daw ni rèenjum yèy de gàa: Raptin jâaci ni futifak ây lang! 30To gosirre go waasi, un cèngni ni hak wun, cot iiy hèerage. 31Hû go ɗa un un rap go jàk ây gi, cèngnin, wûun Fay hèerage. 32Takundi mi gàanurre: A nit ây tâarra yey gaw wut ba, sey to jàk ây gi pî mbir go. 33Faktiturum ni deesi lòo ge lòo, amma yèk mum ge lòo ba sam. 34Amma faasin hak wun, ngam ta tinîir wun e loosunu ni gbaarra jàk kparri, ni râmda mbàl, ni dànda a jày ge mgbàani is wun, ha unji maan e lòtɗa dun pus kà tiɓòoni ba. 35Ngam unji maan dàa ge dàara a gin nit ây tâage a deesi lang. 36Hû go mûyin, ta un kûu ba! Waan unji pî, ha un kpàa saarra a jàk ây gi pî kèga tâacu, ha un kpàa gòyrra a ɗàm kpees Hàm nirri. 37Ni unji Yeesu kàlnji dawrre a àay Fay. Ni tuma yuurre e kûu a gopri yey înuwan gopri korrom. 38A nit ây pî aw dàmrarre a gin wàa a àay Fay, ha aw raguwa.

will be added

X\