Luka 20

1Unji kana a mgbàr yey kàlnji Yeesu a àay Fay, sakɗe ɗa Yèk Kâwrra gi, a nit ɓèl ta waw da nit daprum ây, ni nit còycum ây, ni toonji ây de dàaran, 2de gunuwan de gàan: Sakna, ni mbinum hâ tèenum jàk ây gi ya? Wun hîigum mbinum maan ya? 3Yeesu de goosi de gàa daw: Miy ɗa gu gim gunnu jày kpolo, un kàlimi: 4Iirra baptisma Yuhanna ana a gin Fay naa, malla a gin nirri yi? 5De yèenjin a tîim waw de gàan: To ot gàaw go “ana a gin Fay”, gu ge gunna: Ngam jâ tâa un goosu di Yuhanna ba ya? 6To ot gàa go “a gin nirri ana”, a nit ây pî còo gaw còona ni gòoy. Ngam a nit ây pî aw cèngni a tinîir waw, Yuhanna nit lònum yèk Fay ɗi. 7De goosin de gàan: Ot cèngni a gin ana go ba. 8Yeesu de gàa daw: Yow, miy ɗa gim kàlnu ni mbinum yey tèenim jàk ây gi ba. 9Yeesu de yèe da nit ây ni rèenjum yèy, de gàa: Ni-rri gake hèmna timgbokcum. De hîi da nit bata ây aw baruwa, aw mîinji jàk nîirra ni ey. De taye a dees kana kpâarriya, de tâa a farra. 10Cot hapta jàk nîirra ye kpèrre, de tèefa nit tèem a gin nit bata ây nà, ngam aw hîiwra jàk repta woy wàa. Amma a nit bata ây de lutkuwan di nit tèem maan, de woowan kàn kpong. 11A dat maan nit hèmna de tèesifa nit tèem kana. Dey ngaa de lutkuwan, de njàmruwan, de woowan kàn ɓa hû go. 12De tèefa bak nit tèem kana. Dey ngaa de baawan de yuunuwan a dat hèmna. 13Nit hèmna nà de gàa: Kà gim mbir ya? Tèe gim tèefa hàm mum yiɗim gi. Mba gaw coow go dey gi. 14Amma a nit bata ây ye rabuwan di hàm maan, de yèenjin a tîim waw de gàan: Ey tâage nit koyrra a hèmna too wàa. Dàan ot ɓàruwa, ngam ha hèmna e tâa woy worro! 15De yuunuwan a hèmna, de baruwan. Amma nit hèmna ji ge mbir daw da nit ây gi ya? 16Dàa ge dàara e ɓàt daw da nit bata ây gi, e hîi hèmna wàa da nit ây kana. A nit ây ye ragin kà yey, de gàan: Jày kà yey ge tâa ba! 17Yeesu de gobi daw de gàa: Ji yiɗi gàarra yèk kèta yey a defterre Fay ya: Gòok yey a nit jâarra ây 'màktifa, e irge gòok tigòyni àay. 18Koo wun yaagirra a gòok yey ya, hò ge hòyi. Amma koo di wun yaarra gòok maan ya, nà ge nàmuwa. 19A nit còycum ây, ni nit ɓèl ta waw da nit daprum ây de kàmin orri aw mòow di Yeesu unji maan. Amma aw tolle da nit ây, ngam a nit ây aw cèngni, Yeesu yèe rèenjum yèk yey a hak waw. 20De faawan di Yeesu ni gàra. De tèefan nit sipki ây rèenji ni hak waw kà nit gòyrra ây ɗèm, ngam aw mòow di Yeesu a yèk wàa, ha aw hiiw a kàn ngomna ni mbinum wàa. 21De gunuwan di Yeesu de gàan: Nitkàlnjum, ot cèngni, jày yèemu gi ni jày kàlnjum gi, mbâriya ɗi. Mu raptirre nis nit ây 'nang 'nang ba, amma ni takundi kàlnjum ot Fay. 22Gesi ha ot hîi jomorrgol di Kaysara wûun ɓèl gi yi, koo ti gesi ba? 23Amma Yeesu cèngsi gâra waw, de gàa daw: 24Kàlnimin seede sarrdi kpolo! Foto hak wun ɗi yey gi, ni kèta nîir wuna? De goosin de gàawan: Foto Kaysara wûun ɗi. 25Yeesu de gàa daw: Hû go ɗi go, hîisuwan di Kaysara jày tâage jàk wàa, hîisuwan di Fay ngaa jày tâage jàk wàa! 26Aw kpàa orri kày gaw mòow a yèk wàa a tîim nit ây ba. De tâa daw 'nang a jày goosi daw gi. De tâan ɗong. 27A ni-Saduki ây kana aw dàara a gin Yeesu. A nit ây maan aw gàarre, gûysum a wurra cen. De gunuwan 28de gàan: Nitkàlnjum, Muusa kètna kà yey: To nirri dii go ni kaa wàa nihun, to wut go woofa kin hàm cen, sey kaa wàa e koyrra kin maan mba ge kpàa go hàm, ha e gòynu yòot ɓèl wàa wutke gi. 29A hàm tooy kpolo aw tâaye nà jòròs. Nit màrra arre kin, de wurre hàm cenu ba. 30Cukti wàa de koyrra kin maan, de wurre ey ɗa. 31Taanti waw ɗa de koyrra kin maan. Hû go aw jòròs pî aw arruge, aw wutkige, aw woofa hàm ba. 32A dat waw pî kin maan ɗa wurre. 33Amma unji gûysum a wurra, kin maan kin wun ge tâa ya? Ngam aw ɗa jòròs aw arruge. 34Yeesu de goosi de gàa daw: A nit tâarra yey aw atɗe kin, aw hîirre sapri ta waw aw arri. 35Amma a nit ây getke kpèta a gûysum a wurra gi, ni unji jungci tâam timgbàri, gaw atnji ba. 36Ngam gaw wusirra wurra ba, tâa gaw tâa kà malayka ây, aw tâa hàm ta Fay, ngam gûysi dawge a wurra. 37Amma yèk gûysum a wurra, koo Muusa kàli nà yèk yey a waas cikci, ye 'naasu di Tooy Ɓèl: Fak Abraham, Fak Isak, ni Fak Yakob. 38Ngam Fay ti tâa Fak nit wutiya ây ba, amma Fak nit beenga ây ɗi. Ngam a nit ây pî a gin wàa gûyin. 39A nit ây a tîim nit còycum ây de gàan: Nitkàlnjum, mbâra gàamu. 40A dat maan aw tolu gunda jày di Yeesu. 41Yeesu de gun daw: Kà kà gàan a nit ây, Kristu gi hàm Dawda ɗi ya? 42Ngam Dawda ni hak wàa gàa a defterre Ndûu: Tooy Ɓèl gàa di Nitcoorra mum: Tâa a riina mum, 43ha mi ii nit yiir ta wey aw tâa gin nafta nak wey. 44To Dawda 'naasu go Nitcoorra, kà tâani hàm wàa gi ya? 45Ye tâa a nit ây pî aw ragurre, Yeesu de gàa da lor ta wàa: 46Faasin hak wun a gin nit còycum ây! Aw yiɗirre gîta ni lurra ɓèl, aw yiɗi a nit ây aw kèbi daw kèpri a luumu. Aw yiɗi tâarra a ɗàm kpeesi a àay gin kimjum, ni gin tâam màrra a riirra tiriici. 47Aw atkirre jày tâagi daw da kin wurra ây. Aw yâksirre waarra Fay a nis nit ây. Kpàa gaw kpàa kiita woy hòmge àyrra.

will be added

X\