Luka 18

1Yeesu yèe daw ni rèenjum yèy, ngam ha e kàl daw gesi ngin aw waa Fay koo ningàa, ta aw loo ba. 2De gàa: Nit hiitum dii a riiy kana, ey ti tolle Fay ba, lawsam ti mòowrre a gin nirri ba. 3Kin wurra kana dii a riiy maan. Dàararre a gin wàa koo ningàa, e gàaw: Mgbaanjima a kiita ni nit lètnjum mum! 4Nit hiitum nà de hàwe nak mûsi jày. Amma a dat maan de gàa a tinîir wàa: Koo ye tâa mi tolle Fay ba, lawsam ti mòomde a gin nirri ba, 5amma ngam kin wurra yey loosimde, sey mi mgbaanju a kiita ni nit lètnjum wàa. Ngam to tâa go hû go ba, dàa ge dàara e hamda. 6Yeesu Nitcoorra de gàa: Raksin jày gàa nit hiitum yey maktiya gi. 7Hû go Fay ge mgbaanji daw da nit ây carre gi, taasi a gin wàa tuma ni unji ba yi? Tòo ge tòo e mgbaanji daw yi? 8Mi gàanurre: Mgbaa ge mgbaanji daw kènu. Amma Hàm nirri ye ge dàara gi, ge kpàa goosum a tinîir nit ây a deesi yi? 9Yeesu de yèe daw ni rèenjum yèy da nit ây kana dànge ni hak waw, aw nit ɗèm ây ɗi gi, aw raptirre da nit ây kana kà jàk ɓa hû go. De gàa: 10A nit ây cuk aw dige waarra a àay Fay. Nit kpolo ni-Farisa ɗi, nit cukti ngaa nit ngota jomorrgol ɗi. 11Ni-Farisa de gòye ey kpolo wàa e waa Fay, de gàa: Mi gàamde mbew, Fay, ngam mi tâa kà nit ây kana ba, kà nit ây ngorge jày ba, kà nit makta ây ba, kà nit ây iirge njeenu ba, koo kà nit ngota jomorrgol yey ba. 12Mi coorre riirra tiriici nak cuk a asaweerre pî. Mi hîirre jày kpolo a jày kpàami ra pî. 13Amma nit ngota jomorrgol de gòye kpâarriya, ti tooli nis wàa u faktiturum ba, taarre gbetki wàa, e gàa: Fay, gobim 'maton, dim nit mbita jàk maarra gi! 14Mi gàanurre: Nit yey koye gbaa wàa, gòyrre ɗèm a ɗàm kpees Fay, hòmu di ni-Farisa. Ngam koo wun 'misi hak wàa ya, Fay luu ge luusuwa. Amma nit yey luusi hak wàa, Fay 'mi ge 'misuwa. 15A nit ây de 'maawran hàm kaa ây di Yeesu, ha e bangda daw kàn. A lor ta wàa ye rabin kà yey, de kpânin daw. 16Amma Yeesu de 'naasi daw da hàm kaa ây de gàa: Woon daw aw dàara a gin mum, ta un njang daw ba, ngam wûun Fay dii daw da nit ây tâage kà hàm ây gi. 17Takundi mi gàanurre, to nirri ti ngor go wûun Fay kà hàm ba, ge lek a farra ba sam. 18Nit ɓèl kana de gunu di Yeesu de gàa: Nitkàlnjum mbâra, ji gim tèe ha mi kpàa gûyrra tâam timgbàri gi ya? 19De goosi de gàaw: Ngam jâ gàam dim nit mbâri ya? Nit mbâri cen, sey Fay gbè. 20Mu cèngni yèk mgbèngda wàa: Ta mu ii njeenu ba, ta mu ɓàr nirri ba, ta mu oo oori ba, ta mu yèe yèk rèeng a hak nirri ba, coo too wey ni nuu wey. 21Nirri nà de gàaw: Mi mòo yèk ây gi pî diga tâam lor mum. 22Yeesu ye rage kà yey, de gàaw: Jày kpolo âygumda. Dik mu sàani jày tâagum gi pî, mu hîi da nit èca ây. Hû go kpàa gum kpàa bèebi dèy a faktiturum. A dat maan dàara mu furrimi! 23Nirri nà ye rage yèk yey, de àyu a tinîir wàa ngam jàk ây diiwe dèy ni ɓèlla. 24Yeesu ye rabu gi, de gàa: Kay, kpâaye dèy ha nit bèeb ây aw lek a wûun Fay gi! 25Lekta nit bèebi a wûun Fay hòme àyrra ni yuurra ngeeloba a kpongna ndoongor. 26A nit ây rake yèk yey de gàan: Wun ge kpàa saarra ya? 27Yeesu de gàa: Jàk yey tâa nirri ge kpàaw mbita ba, Fay mbi ge mbiri. 28Piyèr de gàaw: E rri yey orro ot woofage jày tâagina pî, ot furrumde. 29Yeesu de gàa daw: Takundi mi gàanurre: Koo wun woogifa àay wàa, koo kin wàa, koo kaa rra wàa, koo too wàa, koo nuu wàa, koo hàm ta wàa ngam yèk wûun Fay, 30kpàa ge kpàasirra jàk ây gi nak mûsi jày a tâarra yey, ni mgbàr gûyrra tâam timgbàri ge dàara gi. 31Yeesu de arre lor ta wàa ra sàm cuk kpolo waw, de gàa daw: E rri yey ot dikɗe a Yerusalem. A farra jày pî kèrin nà nit lònum ây a hak Hàm nirri gi gbèe ge gbèe. 32Ngam hîi gaw hîiw a kàn nit ây èege yèk Fay. Aw wâ gaw wâskuwa, njà gaw njàmuwa, yî gaw yîmurra ticèkti. 33Lè gaw lèfu ni timbii, aw ɓàruwa. Amma unji taanti gû ge gûysi. 34A lor ta wàa aw rak yèk maan mbâra ba. Tâa fûurriya a gin waw, aw cèngni jày gàa daw gi ba. 35Yeesu hèera a Yeriko. Nit râay tâarre a cewci orri e waargi jày. 36Ye rage mûsa nit ây aw hòmde gi, de gune: Ji mbirge ya? 37De kàluwan, Yeesu ni-Nasaret hòmge a orri. 38De bime de gàa: Yeesu hàm Dawda, gobim 'maton! 39A nit ây dike a ɗàm kpees Yeesu de kpânuwan e tâa baak baak. Amma ey de iisirra bimda: Hàm Dawda, gobim 'maton! 40Yeesu de gòye, de gàa aw 'maawrra a gin wàa. Ye hèera, Yeesu de gunu de gàaw: 41Ji yiɗum mi mbirumda ya? Nit râay nà de gàaw: Nitcoorra, mbirim ha mi kpàasi nis mum! 42Yeesu de gàaw: Nis wey e ɓelsi! Goosum wey ndòosumge. 43Nis wàa de ɓelse yaale. De furru di Yeesu, 'misirre nîir Fay. A nit ây pî ye rabin jàk yey, aw ɗa de 'misin nîir Fay.

will be added

X\