Luka 16

1Yeesu de gàa daw da lor ta wàa: Nit bèebi dii ni nit faarra jàk ta wàa. Ye rage nge nit maan mboysirre bèeb wàa, 2de 'naasu e gunu: Ji rakmi a hak wey ya? Hîisim ɗerrewol tisakni jàk tèem wey, ngam gum kpàaw tâasum nit faarra bèeb mum ba! 3Nit faarra bèebi nà de gàa a tinîir wàa: Kà gim mbir ya? Ngam nit ɓèl mum yuunimde a tèem faarra bèeb wàa. Tèerra tumri àyrriya gim mbin ba. Waargum ɗa, lawsam mòo ge mòom. 4De gàa: Mi cèngni jày gim mbirgi ye gaw mànim a tèem faarra bèebi, ha a nit ây aw ngorim a àay waw. 5De 'naase da nit ây furri daw nit ɓèl wàa kiri. De gàaw di nit màrra: Kà atmu kiri a gin nit ɓèl mum ya? 6Nit maan de goosi de gàaw: Taang num temèrre. Nit faarra bèebi nà de gàaw: At ɗerrewol kir wey kènu, tâa ton mu kèr ra kèrèw! 7De gàaw di nit cukti: Muy ɗa, kà tâa kiri a hak wey ya? De goosi de gàaw: Buhu tirri temèrre. Nit faarra bèebi nà de gàaw: At ɗerrewol kir wey, kèr ra nan nan. 8Nit ɓèl de ɓòlmu di nit burma nà a faarra bèebi, ngam tèe ni gâra. Ngam a nit kparri ây ni kor ta waw aw hòme gâra da nit kayang ây gi. 9Yeesu de gàa: Mi gàanurre, mòon sooba di bèeb burma a kparri gi ngam hak wun, ngam ye ge lòo gi, aw ngotnu mbâra a gin tâam timgbàri. 10Nit yey mòoge jày càa mbâra, tâa ge tâa nit mòorra mbâra a jày dèy ɗa. Nit burma a jày càa, nit burma ɗi a jày dèy ɗa. 11Hû go to un mòo go bèeb yey 'mèmsi ni burma mbâra ba, wun ge hîinu bèebi woy takundi ya? 12Un mòo go bèeb nit kana mbâra ba, wun ge hîinu woy wun ya? 13Cen nit tèem kpolo ge kpàaw tèerra a gin nit ɓèl ây cuk ba, ngam yii ge yiiw di nit kpolo, yi ge yiɗu di nit kana, 'mè ge 'mèmsi ni nit kpolo, luu ge luusu di nit kana. Gun kpàaw tèerra tèem Fay ni tèerra tèem bèebi ɗa cuk ba. 14A ni-Farisa ây aw yiɗirre seede. Ye ragin yèk yey pî, de wâskuwan di Yeesu. 15De gàa daw: Un un gòynirre hak wun a ɗàm kpees nit ây kà nit ɗèm ây, amma Fay cèngni tinîir wun. Ngam jày dànin a nit ây jàk 'mitiya ɗi, jàk ɓa hû go ɗi a ɗàm kpees Fay. 16Yèk mgbèngda Muusa ni yèk nit ây lòni nà yèk Fay dii tâarre a tîim wun ha unji Yuhanna. Diga mgbàr maan aw saknurre Yèk Kâwrra wûun Fay. Koo wuna hâtɗe e lek a farra. 17Amma lòorra faktiturum ni deesi hòme tâarra koyɗum di jày kpolo koo kà luuya, e yaa a yèk mgbèngda gi. 18Koo wun màngifa kin wàa e at kin kana, ire tikàm kin. Koo wun atke kin ɗòlnjumya ni maa wàa, ire tikàm kin ɗa. 19Yeesu de gàa bak: Nit kana dii ni bèebi dèy, mgbapɗe lurra delliya woy àyrra sàari, ɗèpsirre unji pî a gbaarra bèeb wàa. 20Nit èca kana nîir wàa Lajaru, dii ni nuki ây a isi lang, kûurre a ɓeeri nit bèebi nà. 21Yiɗi ngin e kpàa jàk riirra a yaatum tàat nit bèebi. A dun ây aw dàararre aw ɗaagi nuki ta wàa. 22Nit èca nà ye wurre, a malayka ây de arruwan aw 'maaw a gin Abraham. Nit bèebi nà ɗa de wurre, de siptuwan. 23Riirre 'màari dèy a gin tâam nit ây wutke gi. De rapti kpâarriya, de kpàaw Abraham ni Lajaru a gin wàa. 24De 'naase de gàa: Abraham tooy, raptim 'maton, tèewra di Lajaru e buura mbèerri kàn wàa a sòo, e suusinim rèeng mum, ngam mi riirre 'màari dèy a rèeng eb yey! 25Amma Abraham de gàaw: Hàm mum, ɓaysi mu kpàa nà mbâri a ye tâamu nà beengiya gi. Lajaru ey kpàa nà mgban 'màari, amma kòsòng mgbàawrrage e wuysi, muy ngaa mu riirre 'màari. 26'Mòktum yengdiya dii a tîim worro ni un. To nirri yiɗi go e yewfa a gin wun, ge kpàaw ba. To nirri a tîim wun ɗa yiɗi go e yewra ay gi, ge kpàaw ba. 27Nit bèebi nà de gàa: Mi waamde tooy, tèewfa di Lajaru a àay too mum, 28ngam a kaa rra mum aw dii a nihun ây kèrèw, ha e sagi daw yèk yey, ngam ta aw dàara a gin riirra 'màar yey gi ba. 29Abraham de gàaw: Aw dii ni yèk Muusa, ni yèk nit lònum ây. Sey aw ragi daw. 30Nit maan de gàaw: Amma Abraham tooy, to nirri kpolo a tîim nit ây wutke gi difa go a gin waw, i gaw ini tinîir waw. 31Amma Abraham de gàaw: To aw rak go yèk Muusa ni yèk nit lònum ây ba, koo nirri a tîim nit ây wutke gi gûysi go, gaw ngor ba.

will be added

X\