Luka 15

1A nit jomnum ây ni nit makta ây dèy, aw hèerage a gin Yeesu ngam aw rak yèk wàa. 2A ni-Farisa ây ni nit còycum ây de hûungin de gàan: Nit yey ngotɗe da nit makta ây mbâra, e riinji ni aw. 3Yeesu de yèe daw ni rèenjum yèy de gàa: 4Wun ɗi a tîim wun tâage ni mgbâay ây temèrre, to gbeerra go kpolo, ge woofa mgbâay ây ra ngaskàm sàm ngaskàm kpolo a nûri, e dik e kàmra woy gbeege gi ha e kpàasa ba ya? 5To kpàasa go gi, to ge tokra a gûn ni kâwum tinîiri. 6Ye ge kpèsa a àay, 'naa ge 'naasi da soob ta wàa ni nit tâanjum ta wàa, e gàa daw: Dàan ot kâwsi tinîiri, ngam mi kpàasi mgbâay mum yey gbeege gi. 7Yeesu de gàa: Mi gàanurre, hû go kâwum tâa ge tâa a faktiturum, to nit makta kpolo ini go tinîir wàa, ge hòm kâwum da nit mbâr ây ra ngaskàm sàm ngaskàm kpolo, tâa aw cen ni gayam inum tinîir waw gi ba. 8Yeesu de gàa bak: To nikin dii go ni seede ra, gbeerra go kpolo, ge ɓèr ebi e ɓèt àay wàa, e kàm mbâra seede yey gbeegu gi ha e kpàasi ba yi? 9To kpàasi go, 'naa ge 'naasi da soob ta wàa ni nit tâanjum ta wàa, e gàa daw: Dàan ot kâwsi tinîiri, ngam mi kpàasi seede mum yey gbeegim gi. 10Yeesu de gàa: Mi gàanurre, hû go ɗa kâwum dii a gin malayka ta Fay, to nit makta kpolo ini go tinîir wàa gi. 11Yeesu de gàa: Nit kana dii ni hàm nihun ây cuk. 12Lor kaa de gàaw di too wàa: Too mum, hîim bèeb yey ge tâa woy mum gi! Tooy de mîinji daw jày tâagi jàk koyrra waw gi. 13A dat maan càa lor kaa nà de kimje jàk ta wàa pî, e sàani e dik a dees kana kpâarriya. A farra de gbeese seede wàa a wâsam maktiya. 14Ye lòose bèeb ta wàa pî, fek ɓèl ii a dees maan, de rii 'màari. 15De dige e leksi di nit kana a riiy maan. Nit yey ngaa de tèew faarra gicim a nûri. 16Ey yiɗi ngin riirra kangsi jàk ây riin a gicim ây, amma aw èenuge. 17Ye kpàasi dànda wàa mbâra, de gàa: A nit tèem ây a àay too mum aw dii ni tiriici dèy, amma miy mi wutɗe fey ay gi. 18A gim an mi koy a gin too mum, mi dik mi gàaw: Too mum, mi mbire jàk maarra di Fay ni a gin wey ɗa, 19mi get ha mu 'naasim hàm wey bak ba. Sey mu iim mi tâa kà nirri kpolo a tîim nit tèem ta wey. 20De ane de koye a gin too wàa. Ye tâa kpâarriya, too wàa de rabufa ni 'maton, de 'nòofa e dunggu di hàm wàa, de pèwrra tipèwni. 21Hàm wàa nà de gàaw: Too mum, mi mbire jàk maarra di Fay ni a gin wey ɗa, mi get ha mu 'naasim hàm wey bak ba. 22Amma tooy de gàa da nit tèem ta wàa: 'Maaran kènu lurra woy yey hòmge della gi, mgbapsuwan di hàm mum, leknurran tikòori a mbèerri kàn wàa, leknurran naan a nay! 23'Maaran hàm gusi woy mgbòktiya, gûun, ha ot rii ot kâwsi tinîir worro! 24Ngam hàm mum dànmi nà wurre gi gûyrre, mi gàarre nà gbeeye, mi kpàasuge. De ɗaan kâwsum tinîir waw. 25Ɓèl wàa di lor kaa nà koyrarre a hèmna. Ye hèera a gbaa, de rage ti uta ni siirra siiri. 26De 'naase lori kpolo de gunu: Ji mbirge ya? 27De gàaw: Kaa wey koyga, too wey de gûu hàm gusi woy mgbòktiya, ngam kpàasu mbâra. 28De ngòlu di ɓèl wàa, de hàwe lekta a àay. Too wàa de yuura, de waaw e legi. 29Hàmi nà de gàaw: E rri yey mi tèemde tèem yeri mûsi jày, mi haa yewrra yèk wey ba. 30Amma hàm wey yey gbeesi bèeb ta wey a gin nikin ây, ye koyra de gûumu hàm gusi woy mgbòktiya. 31Too wàa de gàaw: Muy mu hàm mum, mu tâanjirre ni miy unji pî. Jày tâagim gi pî, woy wey ɗi. 32Gesi ngin ot ii daprum ot kâwsi tinîir worro mbâra, ngam kaa wey dànmi nà wurre gi gûyrre, mi gàarre nà gbeeye, mi kpàasuge.

will be added

X\