Luka 14

1Yeesu lege a àay nit ɓèl ni-Farisa a unji wuysum ngam e rii nàam. A nit ây tâage a farra aw rapturre. 2Nit kana dii a ɗàm kpees wàa ni àyci futa isi. 3Yeesu de yèe daw da nit kàlnjum ây a yèk mgbèngda Muusa, ni ni-Farisa ây, de gàa: Orri dii ngam ndòosum nirri a unji wuysum yi? Koo orri cenda ba yi? 4De tâan ɗong. Yeesu de mòow di nit àyci de ndòosuwa, de woow e digi. 5Yeesu de gàa daw bak: Wun ɗi a tîim wun, to hàm wàa koo gus wàa yaa go a gooy, ge yuunu yaale koo a unji wuysum ba ya? 6A nit ây aw kpàaw kày gaw goosu a yèk maan ba. 7Yeesu de yèe daw ni rèenjum yèy, ye rabe da nit 'naasum ây aw catɗe gin tâam màrra a gin riirra tiriici, de gàa daw: 8To nirri 'naasum go a riirra tiriici, ta mu at gin tâam màrra ba. Mba aw 'naasi nit kana hòmum dum 'mita, dàarage. 9To nit àay yey 'naasunu ɗa cuk dàara go e gàam “hîiw gin tâam di nit yey”, hû go muy ni lawsam gum at gin tâam woy daarri. 10Amma to aw 'naasum go, sey mu dik mu at gin tâam woy daarri, ngam nit yey 'naasum gi dàara go, gàa ge gàam: Sooba, dàara mu tâa a ɗàm kpeesi! Hû go kpàa gum kpàa mbâri a nis nit ây tâanjunu riinjunu gi. 11Ngam koo wun 'misi hak wàa ya, Fay luu ge luusuwa. Amma nit yey luusi hak wàa, Fay 'mi ge 'misuwa. 12Yeesu de gàaw di nit yey 'naasu gi: Mu kpàa gotiriici ni ndamji koo ni mbona, ta mu 'naasi da soob ta wey ba, koo kaa rra wey, koo kor ta wey ba, koo a nit tâanjum ta wey tâage ni bèebi dèy. Ta mu 'naasi daw ba, ngam ta aw ɗa aw 'naasum aw jinggum ba. 13Amma to mu kpàa go tiriici, 'naasi da nit èca ây, ni nit ây mboy daw isi, ni nit èskum ây, ni râay ây. 14Mbâri diimu, ngam jày cenda daw aw jinggum ba. Fay ji ge jinggum a mgbàr gûysum nit ây tâage ɗèm a ɗàm kpees wàa. 15Nirri kpolo a tîim nit ây tâanjin gi ye rage yèk Yeesu, de gàaw: Kâwrra tinîiri diiw di nit yey riige tiriici a wûun Fay! 16Amma Yeesu de gàa: Nirri mbangse tiriici dèy. De 'naase mûsa nit ây. 17Ye gbèe mbangsum tiriici, de tèe nit tèem wàa ha e kàl daw da nit 'naasum ây: Dàaran, ngam jày pî mbangsumya ɗi! 18Amma aw pî de 'mèmsin gûn kpolo, de hàwin. Nit màrra de gàa: Mi sàa hèmna, sey mi dik mi gopra. Mi waamde, yaafimi. 19Nit kana de gàa: Mi sàa gus ây cuk cuk kèrèw, mi dikɗe mi haani daw batnum. Mi waamde, yaafimi. 20Nit kana ɗa de gàa: Mi arre maanji. Hû go gim kpàa orri mi difa ba. 21Nit tèem nà de ira, de sagu di nit ɓèl wàa jàk ây gi. Ngòlòm de mòow di nit àay, de gàaw di nit tèem wàa: Yuu kènu a ot ây ni àay ây, mu 'maara daw da nit èca ây ay gi, ni nit ây mboy daw isi, ni râay ây, ni nit èskum ây. 22Nit tèem nà de dige. Ye koyra gi, de gàaw di nit ɓèl wàa: Nitcoorra, a nit ây aw dàarage, amma gin tâam ngasɗa bak. 23Nit ɓèl de gàaw: Yuu a dat àay ây ni a gin 'mèmsi orri, mu ndagi daw da nit ây aw dàara, ngam ha àay mum e mûu. 24Mi gàanurre: Koo nirri kpolo a tîim nit 'naasum ây gi ge haaw riirra a tiriit mum ba. 25Mûsa nit ây aw diknji ni Yeesu a orri. De dûre de gàa daw: 26Koo wun dàaga a gin mum ya, sey e yii di too wàa, ni nuu wàa, ni kin wàa, ni hàm ta wàa, ni kaa rra wàa, ni say rra wàa, ni jungci wàa ɗa. To naa hû go ba, ge kpàaw tâarra lor mum ba. 27Nit yey tâa ti tok minjum kpiir wàa e furrim ba, ge kpàaw tâarra lor mum ba. 28Ngam wun ɗi a tîim wun to yiɗi go jâarra àay ɓèl, ge tâa ɗà e dàn to seede wàa ge get go e gbèesini àay maan ba ya? 29Mba ɗaa go jâarra fur àay maan, ge kpàaw gbèesum ba. A nit ây rapku gi pî wâ gaw wâskuwa, 30aw gàa: Nit yey ɗaa jâarra àay, amma ti kpàaw gbèesum ba! 31Wûun hâ to yiɗi go dikta bàpri a gin wûun kana, ge tâa ɗà e dàn, to ge kpàaw go haarra ni sooje ta wàa ujinè ra, ni wûun yey dàaga a gin wàa ni sooje ây ujinè ra cuk ba ya? 32To cèngni go ge kpàaw haarra ba, tèe ge tèefa a gin wûun maan ye tâa dii kpâarriya gi, e gunu raknjum ha aw woofa bàpri. 33Hû go tâa koo wuna a tîim wun, ti woofa go jàk ta wàa pî ba, ge kpàaw tâarra lor mum ba. 34Sama jàk mbâra ɗi. Amma to gbee go ngangji wàa, ni jâ gaw ngaksisi ya? 35Ge tèe koo jâ ba, koo a hèmna, koo a jàk kana, sey aw 'màktifa a gbaa. Nit yey tâage ni tuk rakni, sey e ragi!

will be added

X\