Luka 12

1Mgbàr maan a nit ây dèy ha gaw kpàaw sakta ba, aw kimja ha aw nafnjirre ni nay. Yeesu de yèe màrra da lor ta wàa, de gàa: Faasin hak wun a njàngna ni-Farisa ây kà gàarra burma waw! 2Jày pî tâage kuptumya, ku ge kupli. Jày pî tâage fûurriya, tâa ge tâa cèngnumya. 3Hû go jày pî yèenu a kulpi, ra gaw rak a kayang. Yèk yey yaynjunu a tuy a ara gi, bi gaw bim a gbaa. 4Mi gàanurre, un soob ta mum, ta un tol da nit ây gaw ɓàr isi gi ba. Ngam a dat maan gaw kpàaw mbita jàk kana ba. 5Amma kà gim kàlnu wun gun tolgi: Tolin Fay! Ey dii ni mbinum ɓàta, a dat maan e 'màktifa a eb Seyɗan. Mi gàanurre, toluwan dey! 6A ticîit ây kèrèw sàanin dalla cuk ba yi? Koo kpolo a tîim waw tâa hèmtumya a ɗàm kpees Fay ba. 7Koo gimsi hak wun saktiya ɗi kpolo kpolo pî. Hû go ta un tol ba! Un un hòm daw da ticîit ây ba yi? 8Mi gàanurre ɗa, koo wun lònim a ɗàm kpees nit ây ey nit mum ɗi, Hàm nirri ɗa lò ge lòni yèk wàa a ɗàm kpees malayka ta Fay. 9Amma koo wun hàlgim a ɗàm kpees nit ây, miy ɗa hà gim hàlu a ɗàm kpees malayka ta Fay. 10Nit yey yèegu yèk makta di Hàm nirri ya, kpàa ge kpàa jàk yaafum. Amma nit yey maasu di Jungci Delliya, ge kpàa jàk yaafum ba. 11To aw 'maanu go a àay gin kimjum ây, a ɗàm kpees wûun ây ni nit ɓèl ây, ta un loosi tinîir wun un dànji, ji gun goosi un yèe ya gi ba. 12Ngam Jungci Delliya kà ge kàlnunu mgbàr maan jày gesi un yèe gi. 13Nirri kpolo a tîim mûsa nit ây de gàaw di Yeesu: Nitkàlnjum, gàaw di ɓèl mum, e mîinji bèeb too worro ni miy. 14Yeesu de gàaw: Nirri, wun iigim nit hiitum koo nit mîinjum bèebi a tîim wun ya? 15De gàa daw da nit ây: Faasin hak wun a gayrum jàk ây pî! Ngam gûyrra nirri ge tâa ni gbaarra bèeb wàa ba. 16Yeesu de yèe daw ni rèenjum yèy, de gàa: Hèmna nit bèebi 'maawrarre tiriici dèy ni wakli. 17Nit maan de dàne a tinîir wàa de gàa: Ji gim mbir ya? Ngam cen gin iirra tiriit mum pî tâagim gi ba. 18De gàa: Mi cèngni jày gim mbirgi. Aa gim aasifa dooy rra mum, mi jâasi daw 'mitiya, mi kimji a farra tiriit mum ni jàk ta mum pî. 19Gàa gim gàaw di hak mum: Hàk mum, mu dii ni jày dèy, yey ge gerrum yeri mûsi jày. Wuysi, rii, njoo, kâwsi tinîir wey! 20Amma Fay de gàaw di nit maan: Mu ray ɗi! Ni tuma yey jungci wey woo ge woom. Jàk yey kimjum gi, woy wun ge tâa ya? 21Hû go kpè ge kpèrru di nit yey kimji bèebi ngam hak wàa gi, ge tâa ni bèebi a ɗàm kpees Fay ba. 22Yeesu de gàa da lor ta wàa: Ngam yèk yey mi gàanurre, ta un loosi tinîiri a dànda yèk jungci wun un gàa ji gun rii ya, koo yèk is wun un gàa ji gun mgbap ya gi ba. 23Ngam jungci hòmu di tiriici, isi ngaa hòmu di lurra. 24Gobin daw da tigaak ây, aw còkɗe hèmna ba, aw ripɗe jàk wakli ba, dooy ceni daw ba, amma Fay riisi dawrre. Un gun hòm daw da jooy ây ba yi? 25Wun ɗi a tîim wun, ge kpàaw e iisirra a yer wàa unji kpolo ni loca dànda tinîir wàa ya? 26To gun kpàa go mbita jày hòmge luurra ba, ngam jâ loosunu tinîir wun dànda a jàk ây kana ya? 27Raptin daw da bista jàk ây kày 'mirrin gi, aw fetɗe jòmsi aw yuu ba. Amma mi gàanurre, koo Salomu ni 'mita wàa lang ti haa mgbapta lurra delge kà bista jàk ây gi ba. 28To Fay delsi dawrre go da bista jàk ây kà yey gi, aw gòyrre unji yey, ni ndamji aw uf aw 'màktifa daw a ebi, kà tâa Fay ge mgbapsunu ba ya, un nit èca goosum ây gi? 29Ta un loo dànda, ji gun rii ya, ji gun njoo ya ba. Ta un mboysi tinîir wun a yèk maan ba. 30A nit kparri ây èege yèk Fay aw kàmjirre jàk ây gi pî. Amma un un dii ni Too wun a faktiturum, ey cèngni jàk gayam ta wun pî. 31Hû go kàmin wûun wàa, ey hîi ge hîinu jàk ây kana ɗa. 32Ta un tol ba, koo ye tâa un dòor kaa ɗi! Ngam delu di Too wun a faktiturum, e hîinu wûun wàa. 33Sàanin jàk ta wun, hîin seede maan da nit èca ây! Iin ngam hak wun kurra seede yey tâa ge mgbanti ba, kimjin bèebi a faktiturum yey tâa ge gbèe ba, a gin tâa oori ge hèera e oo ba, a gin tâa fûy ge mboysi ba. 34Ngam a gin tâa bèeb wun, tinîir wun ɗa a farra ge tâa. 35'Mèmin kpàang wun kà nit tèem, pittirla wun ɗa e tâa ɓètiya! 36Un ɗa tâan kà nit ây waage nit ɓèl waw, ye ge ira a siir ata maanji, ngam dàara go e taa a nin, aw faaru yaale. 37Mbâri dii da nit tèem ây maan, to nit ɓèl waw koyra go, e kpàa daw aw waawrre gi. Mi gàanurre, takundi, nit ɓèl waw bu ge bunji lurra wàa, e ii daw aw rii, hîi ge hîi daw tiriici. 38Koo koyra go ni tîim tuma, koo a dat tîim tuma, kpàa daw go aw waawrre, mbâri dii a gin nit tèem ây maan. 39Ragin: To nit àay cèngni go ngin mgbàr yey ge dàara oori gi, ge woow nirri e lek a àay wàa ba. 40Hû go tâan mbangsumya! Ngam Hàm nirri dàa ge dàara a mgbàr yey tâa un dàn ba. 41Piyèr de gunu di Yeesu: Nitcoorra, dorro yèemu yèk rèenjum yey gi yi? Koo da nit ây pî yi? 42De gàaw: Tâan kà nit tèem mbâra ni hakkilo, yey gòynu nit ɓèl wàa e faa da nit tèem ây kana, e hîi daw tiriici e gerri daw a àyrra fek waw. 43Kâwum diiw di nit tèem maan, to nit ɓèl koyra go, e kpàaw tèerra hû go gi. 44Mi gàanurre, takundi, nit ɓèl wàa gò ge gòynu di nit tèem nà e faa jàk ta wàa pî. 45Amma to nit tèem maan gàa go a tinîir wàa: Nit ɓèl mum ge kîra koyrra ba, e ɗaa lutkum da nit tèem ây kana, nihun ây koo nikin ây, e rii e njoo ha e râmuwa, 46nit ɓèl wàa ko ge koyra unji kana tâa nit tèem ti dàn ba, mgbàr yey tâa ti cèngni ba. Nit ɓèl wàa 'mè ge 'mèmsu a kiita ni nit èca goosum ây, gûu ge gûuwa. 47Nit tèem yey cèngni jày yiɗi nit ɓèl wàa, amma ti mbangsi ha e tèe kà yey yiɗi nit ɓèl wàa ba, kpàa ge kpàa tiluni dèy. 48Amma ni tèem yey tâa ti cèngni jày yiɗi nit ɓèl wàa ba, tèe jày getke luta, lu gaw lurru càa. Koo di wun hîiwan dèy ya, dèy gaw kàm a gin wàa. Koo di wun 'maawran dèy ya, dèy gaw gun a gin wàa, e hòmu di woy mgban. 49Yeesu de gàa: Mi dàara ha mi 'màkti ebi a deesi. Mi yiɗi ngin e goosi yaale! 50Amma sey mi kpàa baptisma 'màari. Hû go mi èf tinîir mum, ha unji maan e kpèrri. 51Un dàne mi dàara, ha mi ii tâam mbâri a deesi yi? Mi gàanurre, ti tâa hû go ba, sey ɗòlnjum. 52Mi gàanurre, diga niyey gi a nit ây kèrèw a àay kpolo ɗò gaw ɗòlnji. A nit ây taan ɗò gaw ɗòl ni nit ây cuk, a nit ây cuk ngaa ni nit ây taan. 53Tooy ɗò gaw ɗòlnji ni hàm nihun, hàm nihun ɗa ɗò gaw ɗòlnji ni too wàa. Nuu hàm nikin ɗò gaw ɗòlnji ni sapri wàa, sapri ɗa ɗò gaw ɗòlnji ni nuu wàa. Nuu ɗò gaw ɗòlnji ni kin hàm wàa, waanji ɗa ɗò gaw ɗòlnji ni nuu maa wàa. 54Yeesu de gàa ɗa da mûsa nit ây: To hiski ana go a lekni unji, un gàarre: Buun yaa ge yaa. Tâa ge tâa hû go. 55To hiski ana go a cewci mgbaala a lekni unji, un gàarre: Dòorròm ii ge ii. Tâa ge tâa hû go. 56Un nit tibiw ây gi! Un cèngni jàk ây lòtki a deesi ni faktiturum. Kà tâa gun cèngni yèk jàk ây mbirge mgbàr yey ba ya? 57Ngam jâ un ni hak wun un cèngni jàk takundi ba ya? 58Mu diknjirre go ni nit lètnjum wey a gin wûun, kàm raknjum ni ey a orri. Ngam ta nit lètnjum wey e 'maam a gin nit hiitum ba. Ta nit hiitum ɗa e hîim a kàn sooje, ey ngaa e leknum a kultuma ba. 59Mi gàamde, gum yuu a farra ba, sey to mu jing go jàk maan pî koo kà luuya ha gbèeni.

will be added

X\