Luka 11

1Mgbàr maan Yeesu waa Fay a gin kana. Ye gbèese gi, nirri kpolo a tîim lor ta wàa de gàaw: Nitcoorra, kàlnjina waarra Fay, kà yey kàlnji Yuhanna da lor ta wàa. 2Yeesu de gàa daw: Un waarre go, gàan: Tooy, nîir wey e tâa delliya, wûun wey e dàara! 3Hîina tiriici ha e getna unji pî. 4Yaafina jàk maarra worro, ngam orro ɗa ot yaafirre da nit ây pî mbirgina jàk maarra. Ta mu leknina a 'màar jàk rûfrum ba. 5Yeesu de gàa daw: Nirri kpolo dii go a tîim wun ni sooba, dik go a gin wàa ni tîim tuma, e gàaw: Sooba, hîimda kiri tàarri taan, 6ngam soob mum dàarage wooy a gin mum, jày cenim mi hîiw ba. 7Soob wàa ge goosi a mîis àay e gàawra yi: Ta mu loosim ba, ngam mi fanti nin àay mgban. A hàm ta mum aw kûurre ni miy. Gim kpàaw anda mi hîim ba. 8Mi gàanurre: Koo hàw go anda e hîiw ngam soob wàa ɗi gi, a ge an e hîiw kà yey ge gerru, a gbaarra waar wàa. 9Mi gàanurre: Waan Fay, hîi ge hîinu. Kàmin, kpàa gun kpàa. Gàan “mi lekfarre”, faa ge faarunu nin. 10Ngam koo wun waage ya, ngo ge ngori. Nit yey kàmge gi, kpàa ge kpàa. Nit yey gàage “mi lekfarre” gi, nin faa ge faaruwa. 11Wun tâage too hàm a tîim wun, to hàm wàa waaw go cîici, hîi ge hîiw jòoy kà cîici yi? 12Koo waaw go bàat ɗeeki, hîi ge hîiw ndâay yi? 13To un nit ây tâage maktiya un cèngni go hîirra jàk mbâra da hàm ta wun, sakko kà tâa Too wun a faktiturum tâa ge hîi daw Jungci Delliya da nit ây waagu gi ba ya? 14Yeesu yuunige tindòom yey iigu muukaw di nirri. Tindòom ye yuuw di nit maan, de kpàa yèerra yèy. De tâa daw 'nang da mûsa nit ây. 15Amma a nit ây kana a tîim waw de gàan: Ni mbinum Belsebu wûun tindòom ây yuungi tindòom ây gi. 16A nit ây kana de kàmin e lòni daw jàk kayeefi ni mbinum Fay, ngam aw rûfu jày. 17Amma ey ye cèngni jàk dànda a tinîir waw, de gàa daw: Koo wûun hâ ɗòlnje cuk ni hak wàa ya, mbo ge mboyi, a nit àay rra wàa ɗa ɗò gaw ɗòlnji aw yaa. 18Hû go ɗa, to Seyɗan haarre go gbàaci a hak wàa, wûun wàa kà ge gòy ya? Ngam un gàarre, mi yuuni tindòom ây ni mbinum Belsebu. 19To tâa go mi yuungirre tindòom ây ni mbinum Belsebu, ni mbinum hâ yuungin a nit ta wun ya? Hû go aw tâage nit hiitum yèk wun. 20Amma to tâa go mi yuungirre tindòom ây ni mbinum Fay, hû go ɗa wûun Fay dàarage a gin wun. 21To nit kpèw kpèw faarre go àay ni ndofi, jàk ta wàa tâa ge tâa mbâra. 22Amma to nit kana hòmu go kpèw kpèw, dàara a gin wàa, sunu go, ngo ge ngoru ndof wàa a gin yey ii tinîir wàa, a ge at jàk ta wàa e mîinjifa da nit ây. 23Nit yey tâa ti tâanji ni miy ba, nit yiir mum ɗi. Nit yey tâa ti mgbaanjimde kimjum nit ây ba, ye ge yeskinifa daw. 24Gàa go tindòom makta yuu go a gin nirri, gî ge gîr a gin tâa sòo cenda ba, e kàm gin wuysum. To ti kpàa go ba, gàa ge gàa: Sey mi ir a àay mum yuuma gi. 25Ye ira gi, de kpàaw àay maan ɓètiya, mbangsumya mbâra. 26A dat maan di ge dik e kàmra tindòom ây kana jòròs hòmgu maarra dey gi, ha aw lek a gin nit maan aw tâa a farra. Tâam nit maan hò ge hòmu maarra di woy mgban. 27Yeesu ye yèe yèk yey, kin kana a tîim mûsa nit ây de bime de gàa: Mbâri diiw di himni yey kpàagum gi, ni nêwri yey âwmu gi! 28Yeesu de gàaw: Amma jày hòmge gi. Mbâri dii da nit ây rake yèk Fay, mòoge a tinîir waw gi. 29A ye kimjan mûsa nit ây, Yeesu de ɗaa yèerra yèy de gàa: Yòot nit ây tâarra yey aw yòot maktiya ɗi. Aw kàmde jàk kayeefi, amma gaw kpàa jàk kayeefi kana ba, sey jàk kayeefi yey mbirge ni Yona. 30Ngam kà yey tâa daw nà Yona nit kayeefi da ni-Niniwe ây, hû go ɗa Hàm nirri tâa ge tâa nit kayeefi di yòot yey. 31A unji kiita wûun nikin yey anga cewci fombina, gò ge gòy a ɗàm kpees yòot nit ây gi, yaa ge yaani daw kiita. Ngam ey dàarage diga gbèeni deesi, ha e rak còycum Salomu. E rri yey nit hòmgu 'mita di Salomu dii ay gi. 32A unji kiita a ni-Niniwe ây a gaw an a ɗàm kpees yòot nit ây gi aw yaani daw kiita. Ngam a ni-Niniwe ây aw ini tinîir waw ye ragin sakta yèk Yona. E rri yey nit hòmgu 'mita di Yona dii ay gi. 33Koo wuna ge mòosi ebi a pittirla e ii a gin fûurriya ba, koo e ii a mîis taang ba, amma ii ge ii njet a gin iirra pittirla, ngam ha a nit lekta ây a àay aw rap kayngum maan. 34Nis wey dii kà pittirla isi. To nis wey rapɗe go mbâra, is wey lang tâa ge tâa ni kayang. To nis wey ti rapɗe go mbâra ba, is wey ɗa tâa ge tâa ni kulpi. 35Hû go ii hakkilo, ta kayngum yey tâage a is wey e tâa kulpi ba! 36Kà yey to is wey pî dii go ni kayngum, cen gin kana ge tâa ni kulpi a farra ba, is wey pî tâa ge tâa kayngumya, kà yey finum kayngum pittirla gi. 37Yeesu ye gbèe yèerra kà yey, ni-Farisa kana de 'naasu ha aw riinji ni ey. De lege, de tâa a àay e rii nàam. 38Ni-Farisa nà ye rabu di Yeesu, riirre nàam ti kòl kàn ba, de tâaw 'nang. 39Yeesu Nitcoorra de gàaw: Un ni-Farisa ây un kòlle dat sey, ni dat taasaw, amma a mîis tinîir wun un mûu ni oori, ni kperrem. 40Un rak ây ɗi! Fay mbangse daarri gi, ey mbangse mîisi ɗa ba yi? 41Hû go hîin jày tâage a mîis sek wun kà hîiri da nit èca ây, ha jày pî e tâa kòlliya a gin wun! 42Amma 'màari waanurre, dun ni-Farisa ây, un hîirre jày kpolo a jày kpètke ra, a waas minti, ni bàsi ticèeri, ni hàlci koo tupti. Amma un woofage yèk gòyrra ɗèm a ɗàm kpees Fay, ni yiide ngam wàa. Sey un tèe jàk ây gi, cen woorra woy ngasta. 43'Màari waanurre, dun ni-Farisa ây, ngam un yiɗi gin tâam màrra a àay gin kimjum ây, ni kèpri a luumu. 44'Màari waanurre, ngam un dii 'miskumya kà gebi, nirri ti rabu ba. A nit ây nafki a farra, aw cèngni gebi ɗi ba. 45Nirri kpolo a tîim nit ây kàlnji yèk mgbèngda Muusa de gàaw di Yeesu: Nit kàlnjum, ye gàam kà yey, mu njàmnage dorro ɗa! 46De goosi de gàaw: 'Màari waanurre, dun nit kàlnjum yèk mgbèngda Muusa, ngam un toksirra titokri bûtiya da nit ây, amma un un bangda a titokri maan koo ni mbèerri kàn wun ba! 47'Màari waanurre, ngam un sèerre geb fûuya da nit ây lòni nà yèk Fay, ɓàrin nà a wosom ta wun! 48Hû go un lònirre tèem wosom ta wun. Tèem waw delnu a tinîir wun. Ngam aw ɓàrgi daw da nit lònum ây maan, un un delsirre geb ta waw. 49Ngam maan Fay gàa nà a còycum wàa: Tèe gim tèefa a gin waw nit lònum ây ni nit tèerra ây. Da nit ây kana ɓà gaw ɓàt daw, da nit ây kana ɗa ɗàa gaw ɗàa daw ɗàari, 50ngam ha Fay e gun a hak yòot nit ây tâarra yey njîim nit lònum ây pî, tuusin nà diga ɗaarra mbangsum kparri, 51diga njîim Abel ha njîim Jakariya, yey ɓàrin a tîim gin gûurra jàk gurfum ni àay Fay. Mi gàanurre: Takundi, njîim nit ây gi Fay gu ge gun a hak yòot nit ây tâarra yey. 52'Màari waanurre, dun nit kàlnjum ây a yèk mgbèngda Muusa, ngam un arre tifaarunum cèngnum jày. Un ni hak wun un lek a farra ba, un njang dawrre ɗa da nit ây yiɗi lekta gi. 53Yeesu ye yuu a àay maan, a nit còycum ây ni ni-Farisa ây de ɗaawan futa ni sipki, aw gungu jày dèy. 54De faawan, ha aw kpàa yèk maktiya a mgbelyèk wàa, aw mòowa.

will be added

X\