Luka 10

1A dat maan Yeesu Nitcoorra de carre nit ây ra jòròs, de tèe daw cuk cuk a ɗàm kpees wàa a riiy ây pî dàne e diki. 2De gàa daw: Tirri nîiye dèy a hèmna, amma a nit njaarra ây aw dii càa. Hû go waan di Tooy hèmna, ha e tèe nit njaarra ây a hèmna wàa gi. 3Digin! E rri yey mi tèenurre kà hàm mgbâay ây a tîim jàk mòorgum ây. 4Ta un at kurra seede ba, koo kurra tiriici, koo naan. Ta un gòy a orri ngam kèpta nirri ba. 5Un lekɗe go a àay nirri, gàan: Ot lekfarre, ta un tol ba! 6To nirri tâa go nit mbâra a farra, mbâr kèpri wun tâa ge tâa a hak nit maan. Ti tâa go hû go ba, mbâr kèpri wun i ge ir a gin wun. 7Tâan a àay yey leknu gi, riin, njoon jày gaw hîinu gi, ngam nit tèerra tèem gesi e kpàa bèeb tèem wàa. Ta un lekri àay ni àay ba. 8Koo a riiy hâ leknu ya, aw ngotnu go, riin koo jâ iin a ɗàm kpees wun. 9Ndòosin nit àyci ây tâage a riiy maan gi. Gàan da nit ây: Wûun Fay hèera dunge. 10To un lek go a riiy kana, aw ngotnu go ba, yuun a ot waw un gàa: 11Koo sèerrèm riiy wun yey mòogirra dot a nak worro, ot gbòsɗa dunge. Amma cèngnin nge wûun Fay hèerage! 12Mi gàanurre: A unji gbèeni, àyrra kiita riiy yey hàwgunu ngota gi, hò ge hòm di kiita Sodom. 13'Màari waamde, dum riiy Korajin! 'Màari waamde, dum Betsayda! Ngam to tèem kayeefi ây mbirge nà a tîim nit ta wun gi, to tâa go ngin tèerriya a Tiiru ni Sidon, i gaw ini ngin tinîir waw ni mgbapta lurra buhu, ni lèerra tangsama a isi. 14A unji gbèeni, kiita wun hò ge hòm àyrra di kiita Tiiru ni Sidon. 15Muy mu riiy Kafernahum, mu dànde aa gaw aanjum ha a faktiturum yi? Yaa gaw yaanum ha a gook yengdiya a gin tâam nit ây wutke gi. 16De gàa da lor ta wàa: Nit yey rake yèk wun, ra ge rak yèk mum ɗa. Nirri hàwnu go, hà ge hàwim dim ɗa. Nit yey hàwgim gi, hàwe di Too mum tèegima gi. 17A nit ây ra jòròs tèe daw nà Yeesu gi, aw ira ni tinîir kâwrra. De gàan: Nitcoorra, koo tindòom ây aw raknage tuy ngam nîir wey. 18Yeesu de gàa daw: Mi rabe Seyɗan yaara a faktiturum kà tâyrra buun. 19E rri yey mi hîinu mbinum, to un naf go a jòoy ni ndâay, gaw mbitnu jày ba. Un sun ɗa mbinum Seyɗan a yiir wàa pî, cen jày ge mbitnu ba sam. 20Amma ta tinîir wun e kâwnu ngam tindòom ây raknu tuy gi ba. Sey un kâwsi tinîir wun ngam nîir wun dii kètiya a faktiturum. 21Mgbàr maan tinîir Yeesu mûu ni kâwum Jungci Delliya, de gàa: Mbew, Tooy faktiturum ni deesi, ngam mu fûuni jàk ây gi da nit ây tâage còycumya ni nit ây cèngni jày, mu lòni jàk ây maan da hàm ây. Hû go ɗi, Tooy, ngam kà yey delum dum. 22Jày pî Too mum hîigimi. Cen nirri cèngnu di Hàm gi ba, sey Tooy. Cen nirri cèngnu di Tooy ba, sey di Tooy ba, sey Hàm ni nit yey Hàm yiɗi e lònu gi. 23Yeesu de dûre, de yèe da lor ta wàa gbè, de gàa daw: Mbâri dii a nis wun, ngam un rapɗe jàk yey. 24Ngam mi gàanurre, a nit ây dèy lòni yèk Fay gi, ni wûun ây aw yiɗi nà rapta jàk yey rapnu gi, amma aw rap ba. Aw yiɗi nà rakta jàk yey raknu gi, amma aw rak ba. 25Nit kàlnjum yèk mgbèngda Muusa, de dàara ngam e rûfu jày di Yeesu. De gàa: Nitkàlnjum, kà gim mbir ha mi kpàa gûyrra tâam timgbàri ya? 26Yeesu de gàaw: Ji tâage kètiya a yèk mgbèngda gi ya? Kà rakmu a ye janggum gi ya? 27De goosi de gàaw: Yiɗi Fak wey Tooy Bèl ni tinîir wey pî, ni jungci is wey pî, ni kpèw kpèw wey pî, ni dànda wey ɗa pî. Yiɗi nit tâanjum wey kà yey yiɗum hak wey. 28Yeesu de gàaw: Mu goosi mbâra. Mbir hû go, kpàa gum kpàa gûyrra tâam timgbàri! 29Amma nit maan yiɗi gòynum hak wàa, de gunu: Wun tâage nit tâanjum mum ya? 30Yeesu de goosu ni rèenjum yèy de gàa: Nit kana ana a Yerusalem e dik a Yeriko. A nit ngorgum jàk ây de kpàawan a orri, de borruwan lurra de lutkuwan, aw woowfa kèle wucu. 31Nit daprum a àay Fay de dàara a ot maan. Ye rabu di nirri gi, de hòme e digi. 32Nit Lewi yòot nit tèem a àay Fay ɗa ye dàara, de rabuwa, de hòme e digi. 33Amma ni-Samariya de kpètɗa a gin maan a dikta wooy wàa. Ye rabu gi, tinîir wàa de àyuwa. 34De hèera a gin wàa, de kòlu nuki ta wàa ni sòo ticèeri, de iiwrra num e 'mèmu ni ti'mèmni. De naanu a wamde wàa, de 'maaw a àay gin cita ni-wooy ây, de faaw a farra. 35Ni ndamji ye gàa e diki, de yuuni seede temèrre naan, de hîiw di nit tèem a àay ni-wooy ây, de gàaw: Faaw mbâra di nit yey gi. Mu sàa go jày hòmu di seede yey, a ye gim koyra gi, ji gim jinggum. 36Yeesu de gunu di nit kàlnjum nà: A tîim nit ây gi taan gi, wun dànmu tâage nit tâanjum di nit yey leke a kàn waw da nit ngorgum jàk ây gi ya? 37De goosi de gàaw: Mi dànde, nit yey tâage ni 'maton, mbirgu mbâra gi. Yeesu de gàaw: Dik muy ɗa, mu mbir hû go! 38Yeesu ni lor ta wàa ye digin a orri, de legin a riiy kana. Nikin dii a farra nîir wàa Marta, de ngoru mbâra a àay wàa. 39Mariya kaa wàa di Marta, ey tâarre a ɗàm kpees Yeesu Nitcoorra, raksirre yèk wàa. 40Amma Marta loorre ni tèerra tèem a àay. De dige e gàaw di Yeesu: Nitcoorra, mu rabu di kaa mum kày woom mi loo a tèerra tèem miy kpolo ba yi? Gàawa e mgbaanjim. 41Nitcoorra de gàaw: Marta Marta, mu loosi tinîir wey ni dànda a jàk ây dèy, mu ràmde a tèem ɗa, 42amma sey jày kpolo getki. Mariya carre jàk yey tâage mbâra, koo wuna ge ngosu ba.

will be added

X\