1 Mi kèbumfarre Tewfil, nit ɓèl mum. A nit ây dèy aw ɗaa kèta jày mbirge a tîim worro. 2 Aw kère yèk maan kà yey saknan a nit ây rapku diga ɗaarra, tâage nit sakta Yèk Kâwrra gi. 3 Hû go Tewfil nit mbâri, miy ngaa mi dàne, dele mi kèrumfa kà yey futnje yèk maan, a dat ye cèngnim jày pî ni orrey, 4 ngam ha mu cèngni takundi a yèk yey kàlum aw nà mgban. 5 Mgbàr maan Herode tâa wûun a dees Yude. Nit daprum kana a àay Fay dii a tîim ni-Abiya ây, nîir wàa Jakariya. Kin wàa ana a yòot Aarong, nîir wàa Elisabet. 6 Aw ɗa cuk a nit gòyrra ây ɗèm ɗi a ɗàm kpees Fay, aw futɗe yèk mgbèngda Tooy Ɓèl pî mbâriya. 7 Amma aw cen ni hàm ba, ngam Elisabet nduri ɗi. Aw ɗa cuk aw wàrfige. 8 Unji daprum wàa di Jakariya kpèrre, ha e dapri a ɗàm kpees Fay. 9 Kà hàar waw da nit daprum ây ey lòtke a saasa, ngam e lek a àay Fay e gurfi jàk gurfum. 10 Mûsa nit ây pî aw waarre Fay a gbaa, a ye gurfe jàk gurfum. 11 Malayka Fay de lòrrurra di Jakariya, de gòye a cewci riina a gin gûurra jàk gurfum. 12 Jakariya ye raptu gi, jungci isi de kpuluwa, tolnji de mòowa. 13 Malayka de gàaw: Jakariya, ta mu tol ba, ngam Fay ngore waar wey. Kin wey Elisabet kpàa ge kpàa hàm nihun, mu înu nîir wàa Yuhanna. 14 Yèk yey ge kâwsum, ge ɗòtkum tinîiri. Kpàarra hàm yey kâ ge kâwsi tinîir nit ây dèy. 15 Ngam hàm yey tâa ge tâa nit ɓèl a ɗàm kpees Fay. Ge njoo mbàl ni jàk râmda ba. Mûu ge mûu ni Jungci Delliya diga mbengsi wàa. 16 I ge insa da ni-Israyel ây dèy a gin Tooy Ɓèl Fak waw. 17 Di ge dik a ɗàm kpees Fay ni jungci ni mbinum kà Eliya, ngam e raknjisi hàm ây ni too rra waw. E insa da nit hàanjum ây ha aw dàn kà nit gòyrra ây ɗèm, ngam e mbangsi tinîir nit ây ha aw hèerra gaarra a gin Nitcoorra. 18 Jakariya de gàaw di malayka: Kà gim cèngni, yèk yey takundi ɗi go ya? Ngam mi wàrfige, kin mum ɗa dii ni yeri dèy. 19 De goosi de gàaw: Miy tâage Gabriyel gòyge a ɗàm kpees Fay. Ey tèegima ha mi 'maamra yèk kâwrra yey. 20 Ye tâa mu ngor yèk mum ba yey ge gbèe a unji kana, tâa gum tâa muukaw, gum kpàa yèerra ba ha mgbàr yey ge gbèe jàk maan gi. 21 A nit ây aw waawrre a gbaa di Jakariya. De tâa daw 'nang, ngam ey tòora yuurra a àay Fay. 22 Ye yuura gi, ti kpàawrre yèerra ba. A nit ây de dànin, jày lòrrurrage a àay Fay. Ey yèe dawrre ni kàn, ngam ire muukaw. 23 Unji tèem wàa di Jakariya ye gbèe a àay Fay, de koye. 24 A dat maan càa kin wàa Elisabet de ii himni. De fûu corri kèrèw a àay, de gàa: 25 E rri yey jày tèe Tooy Ɓèl. Ey gobim a mgbàr yey, ye arrimfa wâskum nit ây a hak mum gi. 26 Cot yiti ye hòme, Fay de tèera Gabriyel malayka a Nasaret a dees Galile, 27 a gin sapri înuwan Mariya, ûsuwan di lor kana a yòot Dawda, nîir wàa Yosef. 28 Malayka de lege a gin Mariya de gàaw: Kâwsi tinîir wey, ngam Fay hîime mbâri, tâanjirre ni muy! 29 Jungci isi de kpulu di Mariya a yèk yey. De dàne a kèpri yey jày yiɗi gàarra gi. 30 Malayka de gàaw: Mariya, ta mu tol ba, ngam mu kpàa mbâr Fay. 31 Ii gum ii himni, mu kpàa hàm nihun mu înu nîir wàa Yeesu. 32 Tâa ge tâa nit ɓèl, aw înu Hàm wàa di Fay tâage a faktitola. Fay Tooy Ɓèl ii ge iiw a gbaat wûun wosom wàa Dawda. 33 Tâa ge tâa wûun ɓèl a yòot Yakob tâam timgbàri. Wûun wàa ge lòo ba. 34 Mariya de gàaw di malayka: Kà ge tâa jàk yey ya? Ngam mi ɗà mi cèngni is nihun ba. 35 Malayka de goosu: Jungci Delliya dàa ge dàara a gin wey, Fay tâage a faktitola ɗa tèe ge tèera mbinum wàa a gin wey. Hû go hàm yey gum kpàa gi 'naa gaw 'naasu Hàm Fay. 36 E rri yey Elisabet kor wey ii himni a wàrfi wàa, cot yiti wàa ɗi yey. Kin maan 'naasuwan mgban nduri gi. 37 Cen jày ge hòmu di Fay tâa ge kpàaw mbita ba. 38 Mariya de gàaw: Mi sàay Tooy Ɓèl ɗi. Sey e mbir kà yey gàa gi. Malayka de taye e woowa. 39 A dat maan Mariya de ane, de dige digèrrige a riiy cewci gopri a dees Yude. 40 De lege a àay Jakariya, de kèbu di Elisabet. 41 Elisabet ye rage gûn Mariya, hàm de yûu a mîis himni wàa. Tinîir wàa di Elisabet mûu ni Jungci Delliya, 42 de bime ɓàng de gàa: Fay mbârsumge a tîim nikin ây mbâr yey ge taaw di hàm himni wey gum kpàa gi. 43 Miy mi ji rri, ha nuu wàa di Nitcoorra mum e dàara a gin mum ya? 44 Ngam ye rakmi gûn wey a tuk mum, hàm sii ni dellum a himni mum. 45 Kâwum dii agin wey, ngam muy mu goosige jàk yey gàa Tooy Ɓèl gi ge mbiri. 46 Mariya de gàa: Mgbel yèk mum 'misirre nîir Tooy Ɓèl. 47 Tinîir mum ngaa kâwrimde a gin Fay, Tooy saanum mum. 48 Ngam ey ina nisi, gobim dim mi sàay wàa. A yòot nit ây pî gàa gaw gàam mi kpàa mbâri. 49 Fak mbinum tèemda tèem ɓèl, nîir wàa delliya. 50 Mbâr wàa dii a gin nit ây tolgu gi diga wor waynji ha wor waynji. 51 Tèeye tèem mbinum ni kàn wàa, yeskini da nit ây 'misi hak waw gi. 52 Fay cinifa daw da nit ɓèl ây a gin tâam waw, ey aanji da nit ây ûuni hak waw, ii daw a gin tâam ɓèl. 53 Olsi da nit fek ây ni mbâri, woo da nit bèeb ây kàn kpong. 54 Mgbaanji da lor ta wàa ni-Israyel ây, ngam ɓaysige tèem mbâr wàa, 55 kà yey yèe nà mgban ni wosom worro Abraham, ni yòot wàa. Yèk maan tâa ge tâa koo ningàa. 56 Mariya tâanji ni Elisabet corri taan. De koyse a gbaa wàa. 57 Unji ciisum Elisabet ye kpèrre, de kpàa hàm nihun. 58 A nit tâanjum ta wàa ni kor ta wàa ye ragin, nge Fay tèe tèem ɓèl ni mbâr wàa a gin Elisabet, de kâwsin tinîir waw ni ey. 59 Ye kpèrre unji nan nan, de digin aw rrèpnu di hàm. De yiɗin aw înu Jakariya, nîir too wàa. 60 Amma nuu wàa de gàa: Ge tâa hû go ba, Yuhanna gun înuwa. 61 De gàawan: Cen nirri a tîim kor ta wey înuwan nîir yey ba. 62 De yèewan di too wàa ni kàn, kà yiɗe e înu nîir hàm ya. 63 De gune aw 'maawra gin kèta, de kère: Nîir wàa Yuhanna. De tâa daw 'nang da nit ây pî. 64 Kòsòng jày cîigu rèeng wàa di Jakariya patige, de yèese yèy, de 'mise nîir Fay. 65 Tolnji de mòo daw da nit tâanjum ta wàa pî. Yèk yey yeskige a cewci gopri a dees Yude lang. 66 A nit ây pî rake yèk maan, de dànin a tinîir waw de gàan: Mbinum hàm yey kà ge tâa ya? Ngam aw rapti kàn Tooy Ɓèl dii ni ey. 67 Jakariya too wàa di hàm mûu ni Jungci Delliya. De lòni yèy de gàa: 68 'Misin nîir Tooy Ɓèl, Fak ni-Israyel ây! Ey ina nis wàa a gin nit ta wàa, sàasi dawge. 69 Ey hîina nit saanum ni mbinum a yòot Dawda, sàay wàa, 70 kà yey yèe nà diga mgban ni mgbelyèk nit lònum ta wàa. 71 Gàa kà yey, ha ot saa a gin nit bàpri ta worro, ni a kàn nit yiir ta worro pî. 72 Hû go kàlnige mbâr wàa a gin wosom ta worro, ɓaysige yèk raknjum wàa delliya ni aw, 73 ngam hàa nà ni tihàani a gin Abraham wosom worro, 74 pa ge patina a kàn nit bàpri ta worro, e hîina orri ot dapru tolnji cen, 75 ni tinîir burriya, ni gòyrra ɗèm a ɗàm kpees wàa a unji gûyrra worro lang. 76 Muy mu hàm yey 'naa gaw 'naasum nit lònum yèk Fay tâage a faktitola, ngam di gum dik a ɗàm kpees Nitcoorra, mu mbangsi ot wàa. 77 Mu kàl daw da nit ta wàa, ge saani daw, e yaafi daw jàk maarra waw. 78 Ngam Fak worro mûu ni mbâri, ni 'maton. Ey hîina kayngum kà ɓata unji a faktitola, 79 ha e kayngi da nit ây tâage a kulpi, ni nit ây mòo daw tolnji wurra, ha e mòonina a ot mbâri. 80 Hàm maan 'mirre, iisirra còycum a jungci wàa. Dii a nûri ha a unji lòta wàa a gin ni-Israyel ây.
