Yuda 1

1Miy mi Yuda kaa wàa di Yakuba, mi sàay Yeesu Kristu, mi kèpfa dunde dun nit ây tâage 'naasumya gi. Fay Tooy yiɗunurre, Yeesu Kristu ngaa faanurre. 2Fay e hîinu 'maton, ni tâam mbâri, ni yiide ɗa dèy ni ɓèlla! 3Un kor ây yiɗim dun gi, ye tâa mi hâtɗe mi kèrfa dun a yèk saarra worro tâagina kpolo gi, jày ndakim ha mi mgbèngnu, ngam un haa gbàat goosum yey hîi daw Fay nak kpolo gbè da nit della ta wàa. 4Ɗo a nit ây kana maktiya aw lege a tîim wun ni fûucu. Defterre Fay gàa mgban a hak waw yaa gaw yaa akiita, ngam aw inirre yèk mbâr Fak worro e tâa daw ot haanum tuy. Aw hàanjurre di wûun worro kpolo, tâage Yeesu Kristu Nitcoorra gi. 5Koo ye tâa un cèngni mgban yèk ây gi pî, mi yiɗi mi ɓaysunu nge Tooy Ɓèl saani daw da nit ta wàa ni-Israyel ây a dees Ejip, amma mgbàr kana a dat maan gbeesi daw da nit ây tâa aw goosu ba gi. 6Da malayka ây ɗa tâa aw mòo tâam ɓèl waw ba, woogifa gin tâam waw hîi daw Fay gi, ey faa dawrre a gook kulpi 'mèmdiya a ti'mèmni tâam timgbàri ha unji ɓèl, unji iirra kiita. 7Ɓaysin ɗa yèk nit ây tâage nà a Sodom ni Gomorra ni riiy ây kana a cewci maan, mbirge nà kà malayka ây gi, iirgiri njeenu, kûunjiri ni is jàk ây kana. Aw riirre 'màari a kiita eb tâam timgbàri. Hû go aw dii jàk kàlnum da nit ây pî. 8Kà yey mbirgin nit makta ây nà. Jày rabin ni àyrra ndaram gi 'maa dawrre a 'miskunum is waw. Aw hàanji wûun Fay, aw maasirre jàk 'mita ây a faktiturum. 9Amma koo Mikayel ɓèl waw da malayka ây, ye lètnjin ni Seyɗan, hàanjin a tîim waw yèk is Muusa gi, ti haaw maasum yèy ba, gàaw gbè: Tooy Ɓèl e hiitum! 10Amma a nit ây gi aw maasirre jày tâa aw cèngni ba, aw futɗe jàk dànda is waw kà jàk nûr ây èege hakkilo. Kà yey gbee gaw gbee. 11'Màari waa dawrre, ngam aw futɗe ot Kaynu, a gayam kpàarra jày aw kîri lekta a jàk rûfrum Balaama. Gbee gaw gbee ngam aw ane yèy kà Kora. 12Aw a jàk 'miskum ây ɗi a riinjum tiriit kor ây ni un, aw tâanjirre ni un cen lawsam koo cen tolnji, aw olsirre hak waw. Aw dii kà titurum ây èege buun, tus daw hiski ɓa hû go gi, kà futifak ây a cot kàarri, jàk repta cen. Aw èe sisi, aw wurre nak cukti. 13Aw dii kà kèlmum sòo hay cen, èca lawsam waw fâarre kà kèlmum sòo. Aw dii kà tibiskum ây gîtnjiri gi. Fay waani dawrre gook kulpi woy hòmge yita, ha tâam timgbàri. 14Enoki nit jòsti a funji yòot Adam, lòni nà yèy a hak waw ye gàa: E rri yey Tooy Ɓèl dàanjarre ni mûsa malayka ta wàa delliya ji ge hòm ujinè ra, 15ha e hiiti daw da nit ây pî, e yaani daw a kiita da nit ây hàanju di Fay, ngam tèem makta ây pî tèen a hàanjum waw gi, ni yèk ndèkta ây pî yèerin a hak wàa nit hàanjum ây mbirge jàk maarra gi. 16Aw a nit hûungurum ây ɗi, aw gbakrirre, aw futɗe jàk gayrum waw. Mgbelyèk waw yèerre yèk ɓèl ây, aw kâwsi dawrre da nit ây ngam kpàarra jày. 17Amma un kor ây yiɗim dun gi, ɓaysin yèk ây ɗàan dun nà sakta mgban a nit ây tèe daw Yeesu Kristu Nitcoorra worro, 18ye gàan dun nà: A mgbàr gbèeni a nit wâskum ây a gaw ani, fu gaw fut jàk gayrum waw maktiya. 19Aw gi a nit ɗòlnjurum nit ây ɗi, aw futkirre jàk isi, aw cen ni Jungci Fay ba. 20Amma un kor ây yiɗim dun gi, gòynin hak wun un iisirra 'mita a goosum wun hòmge tâarra delliya gi, waan Fay ni mbinum Jungci Delliya. 21Faan hak wun un tâa a yiide Fay, waatin a 'maton Yeesu Kristu Nitcoorra worro, ha e hîinu gûyrra tâam timgbàri! 22Iin daw 'maton da nit ây hàanje a tinîir waw, 23un saani daw, un nàsi daw a eb kiita waagi daw gi. Iin 'maton ɗa da nit ây kana, amma ni tolnji ngam ta 'miskum lurra waw a gayam isi e 'miskunu ba. 24- 25Fay kpolo, Tooy saanum worro yèk Yeesu Kristu Nitcoorra worro, dii ni mbinum e faanu ta un yaa a timgbòlnji ba, ge gòynunu cen yèk kana a ɗàm kpees 'mita wàa, ha un ii tijaga. 'Mita, ni kpèw kpèw, ni mbinum e tâaw diga mgbàr ây hòmge pî, ha kòsòng gi, ha tâam timgbàri! Amen.

will be added

X\