Yakuba 5

1Raksin, un nit bèeb ây, umin taasin, ngam 'màari dàararre a gin wun! 2Bèeb wun raaye, lurra ta wun jâam riiye. 3Kangeerri wun ni sarrdi wun bukrige. Bukrum maan tâa ge tâa seedamku a hak wun, a ge aksi is wun kà ebi. Koo a mgbàr gbèerra un kimjirre bèebi bak. 4Un jing bèeb tèem waw da nit ây ripke hèmna ta wun ba, ha aw bimde. Taasum nit tèem hèmna ây gi lege a tuk Tooy Ɓèl, tâagi ni mbinum dèy gi. 5Un gûyi nà a tiɗèpsum a deesi gi, un tèe jày gayrunu gi ha e getnu. Un mgbòksirre is wun koo a unji gûurra jàk gûurra. 6Un iiwe kiita di nit yey gòyge ɗèm, un ɓàruge. Ey ngaa ti gàanu jày ba. 7Hû go un kor ta mum, èfin tinîiri ha mgbàr dàarra Nitcoorra, kà nit hèmna waage nîirra jàk mbâra a deesi, èfɗe tinîir wàa ha e kpàa buun màrra ni buun gbèeni. 8Un ɗa èfin tinîir wun, tâan kpèw, ngam dàarra Nitcoorra hèerage. 9Un kor ta mum, ta nirri e bagu di nit kana ba, ngam ta un kpàa kiita ba. E rri yey Tooy hiitum gòyrre a nin. 10Un kor ta mum, ɓaysin yèk nit lònum ây yèege ni nîir Tooy Ɓèl, ye tâan ni èfta tinîiri a riirra 'màari gi. 11E rri yey ot 'naasi dawrre nit kâwum da nit ây mòoge nà mbâra ha gbèeni. Un rage yèk èfta tinîir Ayuba, un rabe kày tèewrra Tooy Ɓèl a gbèeni wàa. Ngam Tooy Ɓèl dii ni 'maton dèy, ni mbâri ɗa. 12Un kor ta mum, màrra a jày pî, ta un hàa tihàani koo ni faktiturum koo ni deesi, koo ni tihàani kana ba. Sey eeye wun e tâa eeye, oow wun e tâa oow, ngam ta un yaa a kiita ba. 13To nirri dii go a tîim wun riirre 'màari, sey e waa Fay. To nit kana dii go ni kâwum tinîiri, sey e kâa ndûu e 'misini nîir Fay. 14To nit kana a tîim wun kûurre go àyci, sey e 'naasi da toonji nit kimjum ây, aw waawrra Fay, aw iiwrra num ni nîir Nitcoorra. 15Waarra Fay a goosum ndòo ge ndòosu di nit àyci. Nitcoorra aa ge aanjuwa. To mbir go nà jàk maarra, yaa ge yaafuwa. 16Lòninjin jàk maarra a tîim wun! Waanjirin Fay a tîim wun ha un kpàa ndòosum! Nit yey gòyge ɗèm a ɗàm kpees Fay, waar wàa kpèw dii ni mbinum dèy. 17Eliya nirri ɗi ɗa kà orro, rîi nà kpèw a waarra Fay, ta buun e yaa ba. Yeri taan ni corri yira buun ti yaa a deesi ba. 18Ye waasi Fay, buun de ɗaasa yaarra, deesi de ɓukse jày. 19Un kor ta mum, to nirri a tîim wun gbee go ot takundi, nit kana inuwa go, 20cèngnin, nge nit yey inuwa di nit mbita jàk maarra a gbeerra ot wàa gi, saanige jungci kpolo a wurra, burre ɗa jàk maarra dèy.

will be added

X\