Yakuba 4

1U hâ ana bàpri ni haarra gbàaci a tîim wun ya? Ti tâa ngam gayam wun haage gbàaci a tinîir wun ba yi? 2Jày gayrunu gi, un kpàarre ba. Ngam un ɓàtɗe nirri, un ngètɗe ngèeri, amma un haa kpàarra ba. Kà yey un haarirre gbàaci un tapnjirre bàpri. Un kpàa jày yiɗunu gi ba, ngam un waaw di Fay ba. 3Ye waanu Fay, un kpàa jàk maan ba, ngam un waarre ni dànda maktiya, un yiɗi un gbeesi jày waanu gi a gayam wun. 4Un un woofa yèk Fay! Un cèngni, mòonjum sooba ni kparri tâage yiiri a gin Fay gi ba yi? Nit yey yiɗi mòonjum sooba ni kparri, ire nit yiir Fay. 5Koo un dànde, defterre Fay yèe ɓa hû go yi, ye gàa: Jungci yey hîina Fay, iirre ngèeri a gin worro gi yi? 6Amma mbâr yey hîi Fay gi hòme 'mita. Hû go defterre gàa: Fay njanggi dawrre da nit ây 'misi hay. Amma hîi dawrre mbâr wàa da nit ây ûuni hay. 7Hû go raguwan di Fay, hàwin yèk Seyɗan, ha e 'nòonu! 8Hèeran a gin Fay, ey ngaa hèe ge hèera a gin wun. Kòlin kàn wun, un nit ây mbirge jàk maarra! Ɓetkinin tinîir wun, un nit dànda cuk cuk ây! 9Tâan ni ngòlnji a 'màar wun, tâan ni àyrra tinîiri, umin! Wâasum wun e ir àyrra tinîiri, kâwum wun ngaa e ir ngòlnji! 10Uunin hak wun a ɗàm kpees Nitcoorra, ey ngaa aa ge aanjunu. 11Un kor ta mum, ta un njeenji yèk makta a tîim wun ba! Nit yey njeege yèy di kor wàa koo hiiti kor wàa gi, ey maase yèk mgbèngda, hiiti yèk mgbèngda ɗa. To mu hiiti go yèk mgbèngda, mu tâa nit tèerra tèem yèk mgbèngda ba, amma mu nit hiitum yèk mgbèngda ɗi. 12Fay kpolo ey iige yèk mgbèngda, ey ge hiiti ɗa. Ey dii ni mbinum e saani koo e gbeesi. Muy mu wun ɗi ya, ha mu hiiti nit tâanjum wey ya? 13Raksin, un nit ây gàage: Unji yey koo ni ndamji di got dik a riiy kana, ot ɓel a farra yeri kpolo, ot sàa jày ot sàansi, ha ot kpàa bèebi. 14Un ɗa un cèngni jày ge mbir ni ndamji ba. Gûyrra wun kà tâa ya? Dii kà tufki, e lòt càa e yeski. 15Ndika un gàa: To Tooy Ɓèl yiɗi go gi, orro ɗa ot gûyrre go, mbi got mbir hûy ni hûy. 16Amma kòsòng un 'misirre hak wun, un ɗèpsirre. Tiɗèpsum kà yey maaye. 17Hû go nit yey cèngni tèerra jàk mbâri, amma ti tèe ba, iirre jàk maarra a hak wàa.

will be added

X\