Yakuba 2

1Un kor ta mum, ye tâa un futɗe yèk goosum Yeesu Kristu Nitcoorra worro a 'mita wàa, ta un rapti nis nit ây 'nang 'nang ba. 2Ngam to nirri lek go a àay kimjum wun, ni tikòr kangeerri a kàn, ni lurra delliya, nit kana ɗa dàara go, lekfa ni lurra ngatiya, 3un ii go nis wun a gin nit yey mgbapke lurra delliya, un gàaw «tâa a gin tâam mbâra gi», un gàaw di nit èca ngaa «gòy muy ay go, koo tâa ay a gin nafta nak mum gi», 4kà yey un ɗòlnjirre ni hak wun, un ire nit hiitum ây ni dànda maktiya. 5Raksin, un kor ta mum yiɗim dun gi! Fay catke nit èca ây a kparri gi, ha aw tâa nit bèeb ây a goosum, aw lek a wûun wàa, yey gàa ge hîi da nit ây yiɗu gi. 6Amma un un coo daw da nit èca ây ba. Ti tâa nit bèeb ây ndakrunu jày ni ndakcu, nàtkunu aw 'maanu a kiita ba yi? 7Ti tâa aw aw maasi della nîir yey hîinu Fay gi ba yi? 8Un mbitɗe mbâra, to un futɗe go yèk wûun Fay, kà yey gàa nà a defterre wàa: Yiɗi nit tâanjum wey kà yey yiɗum hak wey. 9Amma to un raptirre go nis nit ây 'nang 'nang, un tèerre jàk maarra, yèk mgbèngda hii ge hiitunu kà nit hàanjum ây. 10Ngam koo wun futke yèk mgbèngda pî amma mgbòl go a yèk kpolo, mbire jàk maarra a woy ngasta ɗa. 11Fay gàa «ta mu ii njeenu ba», gàa ɗa «ta mu ɓàr nirri ba». To mu ii go njeenu ba, amma mu ɓàr nirri, mu dii nit yewrra a yèk mgbèngda. 12Yèen, mbirin ɗa kà nit ây ge hiiti daw yèk mgbèngda hîigina tâam tiròom gi! 13Kiita ge iiw 'maton di nit yey èege 'maton gi ba. Amma nit yey tâage ni 'maton gi, kpàa ge kpàa 'maton a kiita Fay. 14Un kor ta mum, to nirri gàa go dii ni goosum a tinîiri, amma ti lònirre tèem ba, goosum maan ji ge mbira ya? Malla goosum maan saa ge saanuwa yi? 15To kor wey nihun koo nikin èe go lurra ni tiriici, 16amma nirri kpolo a tîim wun gàa daw go «tayin mbâra, awin ebi, riin un oli», ti hîi daw jày a gayam waw ba, ji ge mbira daw ya? 17Hû go ɗa ni goosum, to ti lòni go tèem ba, goosum maan wurre. 18Nit kana gàa ge gàa: Muy mu dii ni goosum, miy ngaa mi dii ni tèem. Kàlnim goosum wey cen tèem, miy ɗa kà gim kàlnum tèem mum a goosum. 19Muy mu goosirre, nge Fay dii kpolo. Mu mbire mbâra. A tindòom ây ɗa aw goosirre hû go, aw malle tolnji. 20Muy mu ray ɗi! Mi yiɗi mi kàlum, goosum cen tèem gi goosum maan ɓa hû go ɗi: 21Wosom worro Abraham gòye ɗèm a ɗàm kpees Fay ni tèem, ye 'maa hàm wàa Isak a gin gurfum gi. 22Mu kpàawe kày 'mèmsi goosum ni tèem wàa. Tèerra tèem tâage jàk tigbèesunum a goosum wàa. 23Hû go gbèe yèk defterre Fay, gàa: Abraham goosuge di Fay, Fay de sagu nit gòyrra ɗèm, de 'naasu soob wàa. 24Kà yey un kpàa, nirri gòye ɗèm a ɗàm kpees Fay ni tèem, naa ni goosum gbè. 25Hû go ɗa Rahab kin tikàm toonji, ni tèem gòye ɗèm a ɗàm kpees Fay, ye ngore mbâra da ni-Israyel ây tèeran daw gi, yuuni daw a ot kana gi. 26Kà yey tâa isi jungci cen gi wutiya ɗi, hû go ɗa goosum tâa ti lòni tèem ba, wutiya ɗi.

will be added

X\