Yakuba 1

1Miy mi Yakuba, mi sàay Fay ni Yeesu Kristu Nitcoorra, mi kèpfa dunde dun yòot ni-Yude ây ra sàm cuk pî, yeske a deesi lang gi. 2Un kor ta mum, kâwsin tinîir wun dèy, to 'màar ây 'nang 'nang kpètnu go gi! 3Un cèngni, gòyrra a màari ni goosum wun 'maara dunde èfta tinîiri. 4Amma ndika èfta tinîir wun e lòt mbâra, ngam ha un gbèesi tâarra getiya, un èe koo jâ ba. 5To nirri a tîim wun èe go còycum, sey e waa Fay, hîi ge hîiwa. Ngam ey hîirre jày pî dànjum cen, lèta cen. 6Amma nit maan sey e waa ni goosum, ta e hàanji a tinîir wàa ba. Ngam nit yey hàanje gi, rèenji ni kèlmum sòo yey yûusu hiski. 7Ngam ta nit maan e dàni, ge kpàa jày a gin Nitcoorra. 8Ey dii ni tinîiri cuk, ti gòy mbâra a tèem wàa pî ba. 9Kor yey tâage nit ɓa hû go a tîim nit ây, sey e râani ngam ey kpàa aanjum. 10Amma sey nit bèebi e râani ngam hak wàa ûuye, hò ge hòm kà bista bàsi. 11To unji lòrra go ni mâarra wàa, kò ge kòysu di bàsi. Bista wàa yaa ge yaari, della bista wàa ge gbee. Hû go ɗa nit bèebi yû ge yûksi a tâam wàa. 12Kâwum diiw di nit yey èfke tinîiri a 'màari gi, ngam gòy go a 'màar maan, kpàa ge kpàa jàk koyrra, gûyrra yey gàa Fay ge hîi da nit ây yiɗu gi. 13To nirri lek go a jàk rûfta, ta e gàa «Fay rûfkim gi» ba. Ngam jàk maarra ge kpàaw rûfta di Fay ba. Ey ɗa ge rûf koo di wuna ba. 14Amma koo wun leke a jàk rûfta, gayam wàa nàtkuwa, de tâaw kà tidokri. 15A dat maan gayam fûr go, kpàa ge kpàa jàk maarra. Jàk maarra ɗa gbèe go 'mita, kpàa ge kpàa wurra. 16Un kor ta mum yiɗim dun gi, ta un rûf hak wun ba. 17Jàk hîirra mbâra ni hîir delliya lang ana a faktiturum, a gin Fak timbangsum jàk kayang ây. Ey ti bunjirre ba, ti itɗe unji ni kuski ba. 18Hîinage gûyrra a yèk takundi kà yey yiɗe gi, ngam ha ot tâa tiɗàm kpees ây a tîim nit ây mbangse gi. 19Cèngnin, un kor ta mum yiɗim dun gi: Sey koo wuna e kîr rakta, e èf tinîir wàa a yèerra, e èf tinîiri a ngòlòm ɗa. 20To nirri dii go ni ngòlòm, ti tèerre jàk mbâra a ɗàm kpees Fay ba. 21Woofan dànda tinîir yiriya, ni tèem makta ɗa pî! Ngorin ni fetkum tinîiri yèk yey còge Fay a tinîir wun, ha e saanunu jungci wun. 22Amma tâan nit tèerra jày gàa yèk maan, naa nit rakta ây gbè! Ngam un tâa go nit rakta ây ni tuy gbè, un rûfɗe hak wun. 23To nirri tâa go nit rakta yèy ni tuy gbè, tâa go nit tèerra ni yèk maan ba, rèenji ni nit yey rapti nis wàa a darrugal gi. 24Ngam ye rapti hak wàa, a dat maan dige, hènti yaale kày rèe nà gi. 25Amma nit yey rapti a yèk mgbèngda delliya yey hîigina tâam tiròom, to fut go gi, ey ti tâa nit rakta yèy e hènti ba, amma tâa nit tèerra ni yèk maan. Fay mbâ ge mbârsu dey a tèem wàa. 26To nirri ii go hak wàa kà nirri futke yèk Fay, amma ti mòosirre rèeng wàa ba, ey rûfɗe hak wàa, coor wàa ɓa hû go ɗi. 27Coor mbâri yey delge a ɗàm kpees Fay Tooy Ɓèl gi, e tâage mgbaanjum hàm tiɗir ây ni kin wurra ây a 'màar waw, tâage ɗa faasum hay a jàk maarra kparri pî.

will be added

X\