Ni-Hebra ây 8

1E rri yey jày hòmge 'mita a yèk yey yèena gi pî: Orro ot dii ni nit ɓèl daprum tâage a gbaat wûun Fay hòmge 'mita a faktiturum gi. 2Ey tèerre tèem daprum a gin tâam delliya, a tâam takundi, yey mbangse Tooy Ɓèl, ti tâa mbangsumya ni kàn nirri ba. 3Da nit ɓèl daprum ây pî aw gòyni dawrre ha aw hîi hîir ây ni jàk gurfum ây. Hû go ɗa gesu di Yeesu nit ɓèl daprum worro, e tâa ni jày ge hîi gi. 4To ey tâa go ngin a deesi gi, ge tâa ngin nit daprum ba, ngam a nit daprum ây aw dii mgban a deesi, aw hîirre hîir ây kà yey gàa yèk mgbèngda gi. 5Tèem daprum waw tèen gi jàk kàlnum ɗi ni bingi gbè a jày tâage a faktiturum, getnji ni yèk mgbèngda yey rage Muusa gi. Ngam ye dàne mbangsum gin titâam ngam Fay, Fay gàawe: Ii hakkilo, ha mu mbangsi jày pî kà yey lònumda dum nà ni jàk kàlnum a gopri gi. 6Amma kòsòng Yeesu ngore tèem daprum hòmge 'mita dèy, ye tâa ey nit raknjunum ɗi a jàk wasta woy hòmge della, gòyge a yèk mòonjum kàn ây hòmge della gi. 7Ngam to jàk wasta màrra tâa go ngin getiya, gaw kànsirra ngin woy cukti ba. 8Amma Fay yèe dawrre da nit ây, gàa: Miy mi Tooy Ɓèl mi gàarre: E rri yey unji dàararre, ha mi gbèesi jàk wasta fûuya ni ni-Israyel ây, ni yòot Yuda ɗa. 9Ge tâa kà jàk wasta yey mbirim ni wosom ta waw ba, a unji yey mòomi daw kàn waw, yuunim daw a dees Ejip gi. Ngam aw aw gòy a jàk wasta mum ba, miy ɗa mi ndòori dawge. Hû go gàa Tooy Ɓèl gi. 10Gàa ɗa: E rri yey jàk wasta yey gim gbèesi ni ni-Israyel ây, a dat unji ây gi. Ii gim ii yèk mgbèngda mum a dànda waw, kè gim kèr ɗa a tinîir waw. Miy tâa gim tâa Fak waw, aw ngaa tâa gaw tâa nit ta mum. 11A dat maan cen nirri ge haasirra kàlnjum di nit tâanjum wàa, koo gàara di kor wàa «cèngnu di Tooy Ɓèl» ba. Ngam a nit ây pî cè gaw cèngnim, diga hàm ây ni nit ɓèl ây pî. 12Go gim gop daw ni 'maton a tèem makta waw, gim ɓaysisirra jàk maarra waw ba. 13Fay ye yèe yèk jàk wasta fûuya gi, mgbantinifa woy màrra. Jàk yey mgbante wàrfe gi, kèle gbeecu.

will be added

X\