Ni-Hebra ây 6

1Hû go dàan ot dik ɗàm kpeesi a tâarra tâam getiya, ot woofa jàk màrra ây a yèk Kristu. Ta ot ɗaasi bak gòynum jày a yèerra yèk inum tinîiri a tèem wutiya, koo a yèk goosum di Fay ba, 2koo a yèk baptisma, koo a yèk iirra kàn ngam mbârsum da nit ây, koo a yèk gûysum a wurra, koo a yèk kiita tâam timgbàri ba. 3Sey ot dik ɗàm kpeesi, ot tèe jàk yey, to Fay ge hîi go orri. 4Ngam a nit ây kpàage kayang Fay nak kpolo, haagi daw da jàk hîir ây diga faktiturum, 'mèmse ni Jungci Delliya gi, 5haagu di yèk Fay mbâriya ɗi gi, cèngni kpèw kpèw mgbàr yey ge dàara gi, 6to aw gbee go orri, gaw kpàasi inum tinîir waw ba, ngam aw ni hak waw aw gbale Hàm Fay nak cukti a minjum kpiiri, ha aw inu jàk wâskum. 7To deesi ngotɗe go sòo buun yaaga nak mûsi jày gi, ɓuksirre go jàk ɓukta ây mbâra ngam nit ây còke gi, Fay mbâ ge mbârsu. 8Amma to ɓuksirre go cikci ni tinjòkri, ey dii ɓa hû go, dii gaarra a tilèni Fay, gbèeni maan sey aksum ɗi ni ebi. 9Un kor ây yiɗina ot gi, koo ye tâa ot yèerre kà yey, ot gòyni dànda worro kpèw yèk wun a jàk yey hòmge 'mita, tâagunu a saarra gi. 10Ngam Fay ti èe tèerra tèem ɗèm ba, ha e hènti tèem wun, ni yiide yey lònunu ngam nîir wàa a tèem mgbaanjum tèenu a gin nit della ta wàa ha kòsòng gi. 11Amma ot yiɗi dèy ha koo wuna a tîim wun e tâa ni hâta kà yey ha gbèeni, ngam a gin iirra jàk dànda wàa gi e mûu. 12Ta un tâa nit taski ây ba, amma furrin da nit ây goose, èfke tinîiri gi, kpàage jày gàa Fay ni yèk mòonjum kàn gi. 13Fay a ye hîiw yèk mòonjum kàn di Abraham, de hàa ni hak wàa, ngam cen nirri hòmgu 'mita ha e hàani ni ey ba, 14gàa: Takundi, mbâ gim mbârsum ni mbâri, mûu gim mûusi yòot wey dèy. 15Ye tâa Abraham èfe tinîir wàa, de kpàa jày gàa Fay ni yèk mòonjum kàn gi. 16To a nit ây aw hàarre go tihàani, hû waan aw hàani ni nîir nit yey hòmgi daw 'mita, ha aw gòyni jày gàan gi ni tihàani maan, ngam ta tilètnjum e tâa a tîim waw ba. 17Fay ɗa hàa ni tihàani a yèk yey yèe nà ni mòonjum kàn, ha e kpèwsi yèk maan, ngam e kàlni daw mbâra da nit ây gaw kpàa jày gàa a yèk mòonjum kàn gi, nge jày yiɗi gi ge ir ba sam. 18Yèk mòonjum kàn ni tihàani gi ɗa cuk gaw kpàa ita ba, Fay ɗa ge kpàaw rèengda rèeng a yèk maan ba. Hû go ot nit ây 'nòoga a gin wàa gi, ot dii ni suunji tinîiri dèy, ha ot mòo a jàk dànda yey tâagina mbangsumya gi. 19Jàk dànda yey tâagina kà tigòyni jungci is worro, dii mbâriya kpèw kpèw, lekɗe ha a gin tâam delliya tâage a ɗàm kpees jimda jàk joorra woy minjum a àay Fay gi. 20A gin yey Yeesu ɗàana lekta ngam worro, ire nit ɓèl daprum a funji Melkisadak ha tâam timgbàri.

will be added

X\