Ni-Hebra ây 2

1Ngam maan gesi ot faasi hak worro dèy a yèk yey rakna gi, ngam ta ot gbee ot saarra ba. 2Ngam yèk yey yèen a malayka ây gi gòyrriya ɗi. Koo wun yewge nà yèk maan ni koo wun hàwge nà rakta tuy, kpàa bèeb tèem makta wàa kày gesu gi. 3Sakko kày got 'nòo kiita to ot ndòorirre go yèk saarra ɓèl kà yey ya? Nitcoorra ni hak wàa sage nà màrra yèk yey, a nit ây rake gi aw gòynina yèk maan. 4Fay gòyni ɗa tèem waw ni jàk lònum ây, ni kayeefi ây, ni tèem mbinum ây 'nang 'nang dèy, ni hîir ây hîi Jungci Delliya gi, mîinji daw da nit ây kày yiɗe gi. 5Fay ti ûuni a gin malayka ây kparri yey ge dàara gi, yèena gi ba. 6Amma nirri kpolo yèe a gin kana a defterre Fay, gàa: Nirri wun ɗi, ha mu ɓaysu gi ya? Hàm nirri wun ɗi, ha mu gobu gi ya? 7Unji càa mu luusu a gin malayka ây, amma a dat maan mu hîiwe wûun ni 'mita, ni tâam ɓèl, 8mu ûuni jày pî a gin wàa. Ngam ye tâa jày pî dii ûunumya a gin wàa, cen jày tâa ti ûunurra ba. Kòsòng orro ot ɗà ot rap nge jày pî ûunurrage ba. 9Amma ot rapɗe di Yeesu tâage luusumya unji càa a gin malayka ây gi, kpàaye wûun ni 'mita, ni tâam ɓèl yèk 'màar wurra wàa. Ngam kà yey yiɗi Fay a mbâr wàa, ha e wut ngam nit ây pî. 10Gesu di Fay Tooy yey tâage jày pî ngam wàa, gòyge jày pî ni ey gi, 'maaga hàm ây dèy a 'mita wàa, ha e inu nit getiya di Yeesu nit ɗàarra saanum waw ni riirra 'màari. 11Yeesu nit yey ɓetkini daw da nit ây a jàk maarra waw gi, ni nit ɓetum ây pî aw ana a gin Tooy kpolo. Ngam maan Yeesu ii lawsam ha e 'naasi daw kor ây ba, 12gàa nà: Fay, cè gim cèngnini daw nîir wey da kor ta mum, kâa gim kâa ndûu 'misunum nîir wey a tîim nit kimjum ây. 13Gàa ɗa: Ii gim ii dànda tinîir mum a gin Fay. Gàa bak: E rri yey miy ni hàm ây hîim Fay gi. 14Ye tâa a hàm ây gi aw dii ni isi ni njîim, Yeesu ɗa ire kà aw, ngam ha ni wurra wàa e mboysu di Seyɗan tâage nà ni mbinum wurra gi. 15Hû go saani dawge da nit ây tâage a tâam sàay yer waw lang yèk tolnji wurra gi. 16Ngam takundi, mgbaanji daw da malayka ây ba, amma mgbaanji dawrre da nit ây tâage yòot ta Abraham, kà yey gàa a defterre Fay. 17Ngam maan gesuge di Yeesu, e rèenjini hak wàa ni kor ây a jày pî, ha e tâa nit ɓèl daprum mbâra ni 'maton a ɗàm kpees Fay, e hûrfa jàk maarra nit ây. 18Ye tâa riiye 'màari, kpàaye jàk rûfta ɗa, mbi ge mbin e mgbaanji daw da nit ây kpàage jàk rûfta gi.

will be added

X\