Ni-Hebra ây 13

1Ta un woofa yiɗum kor ây ba! 2Ta un woo ngota ni-wooy ây ba! Ngam kà yey a nit ây kana ngorin nà malayka ây, aw cèngni nge aw a malayka ây ɗi ba. 3Ɓaysin daw da nit ây tâage a kultuma, mu gàa un ɗa un dii 'mèmdiya ni aw a kultuma gi. Ɓaysin da tiriit 'màar ây, ye tâa un cèngni un ɗa un dii ni is dàngdiya, gun rii 'màari kà aw. 4Un pî coonjin a atnjum nihun ni nikin, ta tâanjum wun e mboy ba, ngam Fay hii ge hiiti daw da nit tigîtnjurum ây ni nit ây iirge njeenu gi. 5Ta dànda tinîir wun e fut yiɗum seede ba. Kâwsin tinîir wun a jày tâagunu gi! Ngam Fay gàaye: Miy gim woomfa ba, gim 'màktumfa ba sam. 6Hû go gàa got gàa ni suurra tinîiri: Tooy Ɓèl tâage nit mgbaanjum mum, gim tol koo jâ ba. Ji ge mbirim nirri ya? 7Ɓaysin da nit tiɗàm kpees wun yèegunu nà yèk Fay gi, raptin dikri waw ni yèk wurra waw, furrin goosum waw! 8Yeesu Kristu ey gòyge kpolo ninjaay, niyey ha tâam timgbàri, ge bunji ba sam. 9Ta jàk kàlnjum ây kana 'nang 'nang aw nàtnu aw jòlnunu ba. Ngam dele to tinîir nirri kpèwsi go ni mbâr Fay, naa ni yèk tiriici tâa ge mgbaanji daw koo jâ da nit ây futke ot maan gi ba. 10Orro ot dii ni gin gûurra jàk gurfum, yey tâa a nit ây tèege tèem daprum a gin tâam delliya aw cen ni orri ha aw rii jày hîin a farra gi ba. 11Nit ɓèl daprum hû waa nà e lekni njîim jàk tinay a gin tâam delliya hòmge della gi, e dapri ngam jàk maarra nit ây, amma is jàk maan hû waan nà aw aksifa a dat àay ây. 12Ngam maan Yeesu ɗa wurre a dat riiy Yerusalem, ha e ɓetkini daw da nit ây ni njîim hak wàa. 13Hû go sey ot yuufa a gin wàa a gbaa, ot tok jàk wâskum wàa. 14Ngam ay gi ot cen ni riiy tâarra koo ningàa ba, amma ot kàmde riiy yey ge tâa gi. 15Dàan ot hîiw jàk gurfum ây di Fay koo ningàa ni Yeesu, e tâage hîir 'misunum nîir wàa ni mgbelyèk worro. 16Ta un hènti tèerra jàk mbâri, ni mgbaanjurum a tîim wun ba. Ngam hîir ây kà yey ge delu di Fay. 17Ragin daw tuy da nit tiɗàm kpees wun, goosin yèk waw! Ngam aw aw faanurre gi, goo gaw goosi yèk hak wun a ɗàm kpees Fay. To un rak dawrre go tuy, kpàa gaw kpàa mbita kà yey ni kâwum tinîiri. Tonaa hû go ba, mbi gaw mbir ni àyrra tinîiri, yey tâa ge mgbaanja dun koo jâ ba. 18Waan Fay ngam worro! Ngam ot cèngni mbâra nge dànjum tinîir worro dii burriya, ye tâa ot kàmde dikta dikri mbâra a jày pî. 19Mi iisirra dunde gàarra un waa Fay, ngam e insimfa kènu a gin wun. 20Fay gûysu di Yeesu Nitcoorra worro, irge hàm faat ɓèl da mgbâay ây yèk wurra wàa, ni njîim wàa gòyni jàk wasta tâam timgbàri gi. 21Fay Fak tâam mbâri e kpèwsunu a jàk mbâri pî ha un tèe jày yiɗi gi, e tèe a gin wun jày delgu gi ni Yeesu Kristu! 'Mita e tâaw di Yeesu tâam timgbàri ha tâam timgbàri! Amen. 22Mi waanurre un kor ta mum, ngorin yèk yey yèenim dun ha mi kpèwsunu gi. Ngam yèk yey kèrmifa dun gi, luuye. 23Cèngnin, di kor worro Timote aw woowe. To dàara go kènu, di gim diknjifa ni ey a gin wun ha mi rapnu. 24Kèbin daw da nit tiɗàm kpees wun, ni nit ây pî tâage nit della ta wàa di Fay gi! A ni-Italiya ây aw kèpfa dunde. 25Mbâr Fay e tâanji ni un pî!

will be added

X\