Ni-Hebra ây 12

1Ye tâa orro ot dii mgbaarriya ni mûsa nit seedum ây goose gi, hû go dàan ot woofa titokri pî bûrgina gi, ni jàk maarra ɗa tâagina gaarra, ot 'nòo ni èfta tinîiri a 'nòor yey tâage a ɗàm kpees worro gi. 2Dàan ot ii nis worro ot raptu di Yeesu, tâage nit ɗaarra ni nit gbèesum a goosum worro! Ey èfe tinîir wàa ye ɓàruwan a minjum kpiiri, raptu di 'màar maan kà jàk ɓa hû go, ngam kâwum yey waagu nà a ɗàm kpees wàa gi, de tâa a riina gbaat wûun Fay. 3Ɓaysin kày èfe tinîir wàa, a ye hàanjuwan a nit ây mbirge jàk maarra gi! Kà yey ta un loo ba, ta jungci is wun e dàngnu ba. 4A haarra gbàat wun ni jàk maarra, un ɗà un haa ha a wurra ba. 5Un hènti yèk kpèwsum yey yèenu nà Fay kà hàm ta wàa gi yi? Ngam gàa: Hàm mum, ta mu raptu kà jàk luurriya ba, to Tooy Ɓèl nàrrumde go gi. Ta kpèw kpèw e atnjum ba, to yèemde go a jàk maarra. 6Ngam Tooy Ɓèl nàtɗe di nit yey yiɗu gi, lèfɗe koo di hàm hâ ngoru kà hàm wàa gi. 7Efin tinîir wun a nàta wàa! Ngam Fay mòonurre kà hàm ta wàa. Hàm hâ tâa too wàa ti nàrru ba ya? 8To un kpàa go ngin nàta wàa kà yey kpàan a nit 'mèmsum ây ni un gi ba, gun tâa ngin hàm takundi ây ba. 9A too rra worro tâagina tooy isi a kparri gi ye nàrrin dotki, ot tol dawrre. Sakko ge gesina ha ot ûuni hak worro a gin Tooy faktiturum, ngam ot gûyi ba yi? 10Ngam a too rra worro a kparri aw nàtnarre unji càa kà yey dànin gi. Amma Tooy Ɓèl nàtnarre ngam mbâr worro, ha ot 'mèmsi a della wàa. 11Jàk nàta pî a ye nàtna gi, tâana kâwum ba, sey jàk àyrra tinîiri. Amma a dat maan re ge rep daw tâam mbâri ni gòyrra ɗèm da nit ây rûuge a jàk nàta maan gi. 12Ngam maan aanjin kàn ta wun loorriya, kpèwsin gbeski ta wun dàngdiya gi, 13nafin un dik a ot gòyrriya, ngam ta nit èskum e jòlni nak wàa ba amma e kpàa ndòosum. 14Kàmin tâam mbâri ni nit ây pî! Kàmin ɓetkunum hak wun! Cen nirri ge rap Nitcoorra ba, to èe go jàk yey gi. 15Faasin hak wun ta nirri kpolo e èe mbâr Fay ba, ngam ta e tâa kà jàk ɓukta ɗalliya 'mitke gi, e ir jàk mboysum da nit ây dèy ba. 16Ta nirri kpolo e tâa nit haanum tuy koo nit woorra jày kà Esuwa, sàanifa tâam ɓèl wàa ni tiriici gi ba. 17Un cèngni, a dat maan ye yiɗi kpàarra mbâr jàk koyrra, de tâaw njangdiya, ti kpàa orri ha e ini tinîir wàa ba, koo ye tâa kàmde kà yey ni ti umni gi. 18Ngam un un hèerra a jàk bangda ba, koo a eb yeerriya, koo a titurum yiriya, koo a kulpi, koo a hiski titèkruma, 19koo a dûurra ti uta, koo a gûn nirri kà yey mbit daw da ni-Israyel ây gi ba. Ye ragin gûn maan, aw waarre ta e iisirra daw yèerra ba. 20Aw aw kpàaw tokta yèk mgbèngda yey gàage «koo jàk tinak hâ mâatirra a gopri gi, sey aw aaru ni gòok ây e wutki» ba. 21Jàk lònum Fay gi jàk tolla ɗi, ha Muusa gàa: Mi tolle ni timalni. 22Amma un hèerra a gopri Siyona, a riiy Fak beengiya tâage Yerusalem woy faktiturum, ni mûsa malayka ây hòmge ujinè ra gi, 23a gin kimjum kâwrra waw da nit màrra ta Fay tâage nîir waw kètiya a faktiturum gi, un hèerra a gin Fay Tooy hiitum nit ây pî, ni gin jungci waw da nit ɗèm ây tâage getiya gi. 24Un hèerra a gin Yeesu nit raknjunum a jàk wasta fûuya, ni gin mèsta njîim wàa yèege jày hòmge di njîim Abel. 25Faasin hak wun, ta un hàwu rakta di nit yey yèegunu gi ba. Ngam a nit ây hàwge nà rakta di nit yey yèegirra daw yèk Fay a deesi gi, aw saa kiita ba. Sakko orro kà got saa, to ot ir go ot woowfa di Tooy yey yèega dot diga faktiturum gi ya? 26Ey yûuse nà deesi ni gûn wàa gi, gàa kòsòng ni yèk mòonjum kàn: Yûu gim yûusi bak naa deesi gbè, amma faktiturum ɗa. 27Ye gàa «gim yûusirra bak», lònirre nge jàk ây pî tâage mbangsumya gi ye gaw yeski a yûurra maan, ngam ha jày tâa ge yûu ba e ngasi. 28Ye tâa orro ngo got ngor wûun yey tâa ge yûu ba gi, dàan ot gàa mbew di Fay, ha ot dapru daprum yey ge delu gi, ni coorra ni tolnji. 29Ngam Fak worro tâage kà eb aksum.

will be added

X\