Ni-Hebra ây 11

1Ngam goosum tâage iirra tinîiri kpèw a jàk dànda, ni cèngnum mbâra a jày tâa nirri ti rap ba. 2Ni goosum kà yey a wosom ây kpàan nà ɓòlmum Fay. 3Ni goosum cèngnina, kparri ni jàk ây pî mbangsi ni yèk Fay, ha jày tâa nirri ti rap ba ire jàk rapta gi. 4Ni goosum Abel hîi nà jàk gurfum di Fay hòmgu della di Kaynu. Ngam goosum wàa Fay de gàaw nit ɗèm ɗi, ye ngore hîir wàa. Koo ye tâa wurre gi, goosum wàa yèerre bak ha kòsòng. 5Ni goosum Enoki de tâa ti wut ba, Fay de asu beengiya a faktiturum. Aw kpàasu a deesi ba, ngam Fay asu gi. Defterre de gàa a hak wàa, ɗoko asum wàa ey delu mgban di Fay. 6Nirri ge delu di Fay ba, sey ni goosum. Ngam gesu di nit yey hèegurra di Fay e goosi, nge Fay dii tâarre, hîirre bèeb tèem waw da nit ây kàmgu gi. 7Ni goosum Nuhu rage jàk kàlla Fay a jày tâa ɗà ti rap ba gi, de tole a yèk maan de mbangse koombowal, a gin yey ge saanini nit àay rra wàa. Ni goosum wàa yaanu di kparri a kiita, kpàa ɗa gòyrra ɗèm. 8Ni goosum Abraham rage tuy a ye 'naasu Fay gi, de ane e dik a gin ge tâaw jàk koyrra, a gin tâa ti cèngni ba gi. 9Ni goosum tâa kà ni-wooy a dees yey gàaw Fay ni yèk mòonjum kàn gi, tâarre a ndûkci ây, kà yey gaw tâa ɗa Isak ni Yakob 'mèmse ni ey a yèk mòonjum kàn gi. 10Ngam waarre riiy ɓèl ge tâa tatiya, gòyrriya, yey ge kèr Fay ge jâa gi. 11Ni goosum Sara ɗa kpàa mbinum kpàarra hàm, koo ye tâa wàrfige, ngam raptu di Tooy hîige yèk mòonjum kàn gi gòyrre a yèk wàa. 12Hû go maa wàa Abraham nit wàrfiya kpolo, kpàa hàm ây mûsi jày kà tibiskum ây a faktiturum, kà kaksoori a sîirra ɓèl tâa gaw kpàaw sakta ba gi. 13Aw pî a goosum waw wurrin, cen kpàarra jàk ây gàa Fay ge hîi daw ni yèk mòonjum kàn gi, sey diga kpâarriya raptifan daw kèpfan daw. Aw lòni yèk hak waw, aw a nit cita ây ɗi, kà ni-wooy ây a kparri. 14A nit ây gàage kà yey, aw lònirre nge aw aw kàmde gin titâam waw takundi. 15To aw ɓaysi go ngin a dees yey yuuran gi, gaw kpàa ngin ot isum a farra. 16Amma aw kàmde gin tâam yey hòmge della gi, kà gàarra faktiturum. Ngam maan Fay ti ii lawsam, ha aw 'naasu Fak waw ba, ngam mbangsi daw riiy ɓèl e tâa daw gin titâam waw. 17Ni goosum Abraham gàa nà e hîi hàm wàa Isak kà jàk gurfum a ye gerru Fay, gàa nà e hîi hàm wàa kpolo, yey kpàa a yèk mòonjum kàn gi, 18gàaw nà Fay: Ni Isak yòot ta wey gaw cègi. 19Abraham dàne, Fay ge kpàaw gûysum di hàm wàa a wurra. Ngam maan de kpàasu mu gàa gûyse a wurra. 20Ni goosum, Isak mbârsi daw di Yakob ni Esuwa, ni yèerra yèk jàk ây ge dàara gi. 21Ni goosum Yakob ye gàa e wut gi, mbârsi daw da hàm ta Yosef cuk gi, ûu ditiktik a pètki suu wàa e coo Fay. 22Ni goosum Yosef ye gàa e wut gi, yèe yèk yuurra ni-Israyel ây a dees Ejip, kàl daw ɗa kày gaw mbir ni wurra wàa. 23Ni goosum too wàa ni nuu wàa di Muusa fûunuwan corri taan a dat kpàarra wàa, ye tâa aw rabe hàm dele, aw tol jày gàa wûun gi ba. 24Ni goosum Muusa ye 'mirre gi, de hàwe ta aw 'naasu hàm wàa di sapri Farong ba. 25Ey hòme yiɗum e riinji 'màari ni nit ta Fay, ni rakta kâwum a jàk maarra unji càa gi. 26Ey rapti riirra 'màari a jàk wâskunum Kristu gi bèebi ɗi, hòm daw 'mita da bèeb ây a dees Ejip, ngam iirre nis wàa a jàk yey ge kpàa gi. 27Ni goosum yuu e woofa dees Ejip, ti tol ngòlnji wûun ba, ngam gòyrre kpèw mu gàa rapɗe di Tooy yey tâa nirri ti haa rapta ba. 28Ni goosum ii Paska, gûu mgbâay ây lòre njîim a nin ây, ngam ta malayka gbeesum hàm màrra ây e ɓàt daw da hàm ni-Israyel ây ba. 29Ni goosum a ni-Israyel ây yewin a sòo ɓèl înuwan Sòo Caliya, kà a dees kòyrriya, a gin yey gbeen ni-Ejip ây ye haawan yewrra kà aw gi. 30Ni goosum waw yaan a jâarra bàan ây a Yeriko, a dat ye gîrin kpumdin nak jòròs gi. 31Ni goosum Rahab kin tikàm toonji ti gbeenji ni nit ây hàwgu rakta tuy di Fay gi ba, ngam ngore mbâra da nit ây dikifa sipta sipri. 32Ji gim gàa bak ya? Orri cenim ha mi yèe yèk Gedeyon, ni Barak, ni Samson, ni Yefta, ni Dawda, ni Samuyel, ni nit ây lòni nà yèk Fay gi ba. 33Ni goosum a nit ây gi sunin daw da wûun ây, tèen tèem ɗèm, kpàan jày gàa Fay ni yèk mòonjum kàn gi, fantin mgbelyèk tidîisi, 34kûysin ngongji ebi, saan a pètki ɓet ɓèl, kpàasin kpèw kpèw a dàngda isi, irin nit sunda ây a bàpri, mànin daw da nit bàpri ây kana gi. 35A kin kana aw kpàasi hàm ta waw gûyse a wurra. Da nit ây kana aw riisi daw 'màari ha aw wurri, aw ngor aw woo daw ba, ngam ha aw kpàa gûysum a jungci yey hòmge della gi. 36A nit ây kana aw kpàa tinjàmni ni tilèfni, ni ti'mèmni, ni lekta a kultuma. 37Da nit ây kana aw aari daw ni gòok ây, da nit ây kana ngaa aw aksi daw ni ebi, da nit ây kana aw gûunji daw is waw cuk, da nit ây kana ngaa aw ɓàri daw ni ɓet ɓèl. A nit ây kana aw gîtnjirre aw mgbapɗe kûuk mgbâay, koo kûuk bii, aw riirre fòon, aw ɗàa dawrre ɗàari, aw riisi dawrre 'màari. 38A nit kparri ây aw get ha nit ây gi aw tâanji ni aw ba. Aw gi aw gîtnjirre a tîim nûri, ni fak gopri ây, ni gook ây, ni kpàtki ây. 39A nit ây gi pî aw kpàa ɓòlmum Fay ni goosum, koo ye tâa aw kpàa jày gàa Fay ni yèk mòonjum kàn gi ba. 40Dorro Fay ɗàana mbangsum jày hòmge della, ngam ta a nit ây gi aw tâa getiya sonaa ni orro ba.

will be added

X\