Ni-Hebra ây 1

1Fay yèera daw nà mgban da wosom ta worro ni mgbelyèk nit lònum ây nak mûsi jày, ni orri 'nang 'nang. 2Kòsòng a mgbàr gbèeni gi yèera dot ni Hàm wàa. Ni ey mbangsini kparri ni jàk ây pî, iiwe e tâa nit koyrra a jày pî. 3Ey finde ni kayang 'mita Fay, rèenji ni Fay, mòorre jàk ây pî ni mbinum yèk wàa. A dat yey ɓetkini daw da nit ây a jàk maarra waw, de tâa a faktiturum a riina Fay tâage ni mbinum hòmge 'mita gi. 4Hû go Hàm gi hòm daw 'mita da malayka ây ni nîir yey hîiw Fay, hòmgi daw da nîir ta waw gi. 5Ngam Fay ti haa gàarra di malayka kpolo a tîim waw «muy mu Hàm mum ɗi gi, mi kpàame unji yey» ba. Ti haa ɗa gàarra «miy tâa gim tâa Too wàa, ey ngaa tâa ge tâa Hàm mum» ba. 6Amma ye ge tèera Hàm màrra wàa a kparri gi, yèk yey gàa mgban ge gbèe: A malayka ta Fay pî sey aw coowa. 7A hak malayka ta wàa gàarre: Fay ini dawrre da malayka ta wàa aw tâa hiski ây, da nit tèem ta wàa aw tâa rèeng eb ây. 8Amma di Hàm gi Fay gàawe: Mu Fay gi, gbaat wûun wey tâa ge tâa tâam timgbàri ha tâam timgbàri. Gàawe ɗa: Suu wûun wey suu ɗèm ɗi, 9mu yiɗi tâam ɗèm, mu yiirre jàk makta èege yèk mgbèngda gi. Ngam maan miy mi Fay Fak wey gi, mi carrumge mi fòogumda num kâwum, ha mu hòm daw da nit tâanjum ta wey. 10Gàawe ɓak: Mu Nitcoorra, muy mbangse deesi a mgbàr ɗaarra jày pî. Faktiturum gi tèem kàn wey ɗi. 11Aw gi gbee gaw gbee, amma muy tâa gum tâa koo ningàa. Aw gi pî mgba gaw mgbanti kà lurra. 12Ka gum karri daw kà jàk joorra, bu gaw bunji kà lurra ây. Amma muy mu gòyrre, gum wàrfi ba, yer wey ge gbèe ba. 13Amma di malayka hâ haarra gàarra «tâa a riina mum, ha mi ii nit yiir ta wey gin nafta nak wey.» ya? 14Naa aw pî a jungci daprum ây ɗi di Fay, tèe daw tèerra tèem mgbaanjum da nit ây gaw kpàa saarra gi naa?

will be added

X\