Ni-Galatiya ây 6

1Un kor ta mum, un nit ây tâage ni Jungci Delliya, to un kpàaw go di nirri mbitɗe go koo jàk maarra hâ, insuwan a ot mbâri ni fetkum tinîiri. Faasin hak wun, ta e rûfnu ɗa ba. 2Paanjinjin jàk titokri ta wun! Hû go gun tèeni ni yèk mgbèngda Kristu gi. 3To nirri dànde go ni hak wàa ey gerre, amma takundi ti get koo jâ ba, rûfsirre hak wàa. 4Amma sey koo wuna e gerru di hak wàa. Hû go kpàa ge kpàa 'mita ngam hak wàa gbè, ge tâa ngam nit kana ba. 5Ngam koo wuna pî futɗe titokri tèem wàa. 6Nit yey èngni a yèk Fay gi, sey e mîinji jàk ta wàa ni nit kàlnjum wàa. 7Ta un rûfsi hak wun ba! Fay Fak tiwâskum ɗi ba. Jày còge nirri gi, jàk maan ge ribi. 8To nirri còk go jày ge delu di is wàa gi, ri ge rip jàk raarriya a is wàa. To còk go jày ge delu di Jungci Delliya gi, ri ge rip gûyrra tâam timgbàri a Jungci Delliya. 9Ta ot loo a tèerra jàk mbâri ba. Ngam to ot loo go ba, ri got rip a mgbàr yey carre Fay gi kpèrra go. 10Hû go ye tâa ot kpàa orri gi, dàan ot tèe jàk mbâri da nit ây pî, sakkoma da kor ta worro a goosum. 11Raptin kukta jàk kèta yey kèrmifa dun ni kàn mum gi! 12A nit ây pî kàmge aw ndaknu un rrèpni gi, aw mbitɗe gbè kà yey ngam ha aw del a ɗàm kpees nit ây, ngam ta aw kpàa ɗàari a yèk minjum kpiir Kristu ba. 13Koo ye tâa aw a nit rrèpnum ây ɗi gi, aw ni hak waw aw mòorre yèk mgbèngda ba, amma aw yiɗi un rrèpni ngam ha aw 'misini hak waw yèk is wun. 14Miy ta e tâam kà yey ba, ngam ta 'misum mum e tâam a jàk kana ba, sey a minjum kpiir Yeesu Kristu Nitcoorra worro. Ye tâa ey wurre a minjum kpiiri gi, kparri tâamde wutiya, miy ɗa mi dii wutiya ngam kparri. 15Ngam rrèpnum koo cen rrèpnum ge sak koo jâ ba, sey ita nit fûuya, yey inu Kristu e tâa nit fûuya gi. 16Tâam mbâri ni 'maton Fay e tâa daw da nit ây pî futke ot yey gi. E tâa daw ɗa hû go da ni-Israyel ây takundi, tâage nit ta Fay. 17Kòsòng ta nirri e loosisimda bak ba, ngam ticèngsunum 'màar Yeesu dii a is mum. 18Un kor ta mum, mbâr Yeesu Kristu Nitcoorra worro e tâanji ni un pî a tinîir wun! Amen.

will be added

X\