Ni-Galatiya ây 5

1Kristu inina a tâam tiròom, ngam ha ot tâa nit tiròom ây takundi. Hû go gòyin kpèw a tâam maan, ta aw insunu a tâam sàay gi ba! 2Miy mi Pawlu mi gàanurre, raksin: To un rrèpni go gi, Kristu ge mgbaanjunu koo jâ ba. 3Mi gàanurre bak, koo wun rrèpni gi, ey ii hak wàa ha e tèe jày gàa yèk mgbèngda pî. 4Un nit ây kàmge gòyrra ɗèm ni yèk mgbèngda gi, un ɗòlnji ni Kristu, un wòo mbâr Fay. 5Orro ot nit ây kpàage Jungci Delliya, ot waatirre jàk dànda a gòyrra ɗèm ni goosum. 6Ngam a 'mèmsum ni Yeesu Kristu, rrèpnum koo cen rrèpnum ge tèe koo jâ ba, sey goosum yey lòtke ni yiide. 7Un dikɗe nà mbâra. Wun njanggunu futa yèk takundi gi ya? 8Jày rûfin dun ti ana a gin Tooy 'naasunu gi ba. 9Un cèngni, njàngna càa fâasi mûta jày pî. 10Nitcoorra hîimi cèngnum a hak wun, gun dàn 'nang ni miy ba. Amma nit yey mboysunu hakkilo gi, koo wun ɗi ya, kpàa ge kpàa kiita. 11Amma miy, kor ta mum, to mi sakɗe go bak yèk rrèpnum gi, ngam jâ ɗàamin ɗàari ya? To tâa go ngin kà yey, gim hèenifa ngin jàk timgbòlnji a yèk wurra Kristu a minjum kpiiri. 12Ndika a nit ây mboysunu hakkilo gi, aw iisirra dikta ɗàm kpeesi ni tèem waw, aw cup jàk ta waw ɗa ni cupcu. 13Un kor ta mum, Fay 'naasunu a tâam tiròom. Amma ta tâam maan e tâanu jàk mgbaanjum a gayam isi ba. Sey un tèe tèem yiide a tîim wun. 14Ngam yèk mgbèngda pî gòye a yèk yey kpolo: Yiɗi nit tâanjum wey kà yey yiɗum hak wey. 15Amma to un numjirre go, un riinjirre go isi, iin hakkilo, ta un mitnji ba! 16Mi gàanurre, woon Jungci Delliya e nàtnu a dikri wun! Hû go gun goosi a gayam isi ba. 17Ngam gayam isi yiiwrre di Jungci Delliya, Jungci Delliya ngaa yiiwrre di gayam isi. A jàk ây gi cuk aw haknjirre a tîim waw, ha gun kpàaw tèerra jày yiɗunu gi ba. 18Amma to Jungci Delliya nàtnurre go, un censirra ûurriya a yèk mgbèngda ba. 19Tèem gayam isi gi lòtiya ɗi. E tâage njeenu, ni tèem 'miskum, ni haanum tuy, 20ni coorra mâri, ni yèk dîw, ni yiiri, ni tilètnjum, ni ngèeri, ni ngòlnji, ni anda yèy, ni ɗòlnjum, ni futa ot ây 'nang 'nang, 21ni gbokri, ni râmrum mbàl, ni mòorgum oca, ni jàk ây kana kà yey gi. Mi ɗàanurre kàlla kà yey gàanim dun nà diga mgban, a nit ây mbirge jàk ây gi gaw kpàa lekta a wûun Fay ba. 22Amma jàk repta Jungci Delliya tâage yiide, ni kâwum tinîiri, ni tâam mbâri, ni èfta tinîiri, ni mgbergum yèy, ni mbita jàk mbâri, ni mòorra mbâra a tèem, 23ni fetkum tinîiri, ni mòosum hay. A jàk ây gi pî yèk mgbèngda kana cen. 24A nit ây 'mèmse ni Kristu gi aw gbale is waw ni jàk yiɗum waw, ni gayam waw ɗa pî a minjum kpiir wàa. 25To tâa go ot gûyrre ni Jungci Delliya gi, sey ot woow ɗa e nàtna a dikri worro. 26Ta ot 'misi hay a jàk ɓa hû go ba, ta ot anji tilètnjum ba, ta ot iinji ngèeri ba.

will be added

X\