Ni-Galatiya ây 2

1A dat yeri ra sàm naan de diksim a Yerusalem ni Barnaba, ni Titus ɗa. 2Mi dige ngam Fay lònim kà yey. Mi cèngnini daw da kor ây a farra Yèk Kâwrra yey saknim a tîim nit ây èege yèk Fay. Mi cèngnini daw hû go ɗa da nit tiɗàm kpees ây ye kimjina orro kpolo worro ni aw, ngam mi yiɗi ha tèem mum mgban koo kòsòng e tâa ɓa hû go ba. 3Koo di Titus ni-Girèk gi tâanje ni miy, aw ndagu ha e rrèpni ba. 4Amma a kor rèeng ây leke ni fûucu dàaga ni gâra, ha aw faana ray a tâam tiròom yey tâagina a gin Yeesu Kristu gi, aw yiɗi aw inina sàay yèk mgbèngda. 5Orro ot rak daw tuy koo càa ba, ngam ha takundi Yèk Kâwrra e gòynjisi bak ni un. 6A 'mita waw da nit ây gàan daw nit tiɗàm kpees ây, koo kà 'mirrin ya, jày ti tâamde a 'mita maan ba, ngam Fay ti raptirre nis nit ây 'nang 'nang ba. A nit tiɗàm kpees ây gi ɗa aw iisimda koo yèk kana ba. 7Amma aw rabe, Fay hîimi mi sak Yèk Kàwrra da ni-riiy ây kana tâa aw rrèpni ba, kà yey hîiw Piyèr e sak Yèk Kâwrra da ni-Yude ây rrèpni gi. 8Ngam Tooy yey tèenji ni Piyèr a tèem wàa a tîim nit ây tâage rrèpnumya gi, ey tèenji ni miy ɗa a tèem mum a tîim nit ây èege yèk wàa. 9Yakuba, ni Piyèr, ni Yuhanna gàan daw nit gòynum ây gi, ye cèngnin mbâr yey hîim Fay, de mòonjin kàn raknjum ni miy ni Barnaba, ha orro ot dik ot tèe a tîim nit ây èege yèk Fay, aw ngaa aw tèe a tîim ni-Yude ây tâage rrèpnumya gi. 10Sey yèk kana kàlin dot gbè, ot ɓaysi daw da nit èca ây a tîim nit kimjum ta waw. Mi hâri a tèerra tèem maan. 11Amma Piyèr ye dàara a Antakiya, de gòymi a ɗàm kpees wàa mi anurra yèy, ngam ey gerre ha mi yèewrra. 12Ngam ɗoko a nit ây kana anga a gin Yakuba aw dàara gi, ey riinji ni kor ây tâage nà mgban nit ây èege yèk Fay. Amma ye dàaran gi, de woofariinjum ni kor ây nà, de ɗòlnje ni aw ngam tole da ni-Yude ây tâage rrèpnumya gi. 13A ni-Yude ây kana ɗa aw 'mèmsi a iirra tibiw ni ey, ha de jòlnuwan di Barnaba a tibiw waw. 14Ye rapmi aw dik a ot ɗèm a takundi Yèk Kâwrra ba, de gàami di Piyèr a ɗàm kpees waw pî: Muy mu ni-Yude, ye tâa mu mbire kà nit ây èege nà yèk Fay gi, naa kà ni-Yude ây, ngam jâ ndakmu daw da nit ây èege nà yèk Fay aw fut ot ni-Yude ây gi ya? 15Dorro aw kpàana ni-Yude ây, aw kpàana kà nit ây èege yèk Fay ba, tâage ni jàk maarra gi. 16Amma ot cèngni, nirri ge kpàa gòyrra ɗèm ni tèem yèk mgbèngda ba, sey ni goosum di Yeesu Kristu. Orro ot goosuge di Yeesu Kristu, ha ot kpàa gòyrra ɗèm naa ni tèem yèk mgbèngda, amma ni goosum di Kristu. Ngam cen nirri ge kpàa gòyrra ɗèm ni tèem yèk mgbèngda ba. 17Amma to aw kpàana go orro ot nit mbita jàk maarra ɗi gi, ye tâa ot kàmde goosum a 'mèmsum ni Kristu, mba Kristu nit mgbaanjum tèem jàk maarra ɗi ya? Ge tâa hû go ba sam! 18To mi jâasi go kan jày yaanimfa gi, mi iiwe di hak mum mi nit yewrra yèk mgbèngda ɗi. 19Ngam a futa yèk mgbèngda mi wurre a yèk maan, ha mi gûy ngam Fay. Mi wutnji ni Kristu a minjum kpiiri, koo ye tâa mi dii beengiya gi. 20Ti tâa miy gûyge ba, amma Kristu gûyge a tinîir mum. Jungci yey gûymi ni is mum gi, mi gûyrre a goosum di Hàm Fay. Ey yiɗimge, hîiye hak wàa ngam mum. 21Miy gim hàanji mbâr Fay ba. Ngam to gòyrra ɗèm tâa go ngin ni yèk mgbèngda, ɗo Kristu wurre ɓa hû go.

will be added

X\