1 Miy mi Pawlu mi nit tèerriya, tèem mum ti ana a gin nit ây koo a raknjum ni nirri ba, amma a mbinum Yeesu Kristu, ni Fay Tooy Ɓèl gûysu di Yeesu a wurra gi. 2 Miy ni kor goosum ây pî tâanji ni miy, ot kèpfa dunde dun nit kimjum ây a dees Galatiya. 3 Nge Fay Too worro ni Yeesu Kristu Nitcoorra, aw hîinu mbâr waw ni tâam mbâri! 4 Kristu ey hîige hak wàa wutke ngam jàk maarra worro, ha e saanina a tâam makta a kparri yey gi, kà yey yiɗi Fay Too worro. 5 'Mita e tâaw di Fay tâam timgbàri ha tâam timgbàri! Amen. 6 Tâamde 'nang ye hèesunu kènu, un woowfa di Tooy Ɓèl 'naasunu ni mbâr Kristu gi, itnu a Yèk Kâwrra kana. 7 Takundi, Yèk Kâwrra kana cen. Amma mi yèenurre kà yey, ngam a nit ây kana aw yûusunurre, aw yiɗi aw ini Yèk Kâwrra Kristu. 8 To nirri, koo orro koo malayka anga a faktiturum, to saknu go Yèk Kâwrra tâage 'nang ni Yèk Kâwrra yey sakna ot dun gi, e tâa lètiya! 9 Kà yey gàana orro mgban gi, hû go gàami ɗa: To nirri saknu go Yèk Kâwrra tâage 'nang ni Yèk Kâwrra yey ngotnu gi, e tâa lètiya! 10 Hû go mi yèerre ngam ha mi kpàa ɓòlmum a gin nirri yi, koo a gin Fay yi? Malla mi kàmde kâwsum da nit ây yi? To tâa go ngin mi kàmde bak kâwsum da nit ây, gim tâa ngin sàay Kristu ba. 11 Un kor ta mum, mi kàlnurre: Yèk Kâwrra yey saknim dun gi, ti ana a gin nirri ba. 12 Ngam mi ngor yèk maan a gin nirri ba, nirri ɗa ti kàlnjim ba, amma Yeesu Kristu ey lònimda yèk maan. 13 Un rage yèk dikri mum kày tâa nà mgban a ot ni-Yude ây, mi ɗàa dawrre nà ɗàar ɓèl da nit ta Fay kimje gi, mi haawe nà ha mi gbeesi daw. 14 Mi hòm daw da boro ta mum a futa a ot ni-Yude ây, mi hòm daw nà dèy a tèerra yèk hàar wosom ta mum. 15 Amma Fay catkim diga himni nuu mum, de 'naasim a mbâr wàa. 16 Ye delu e lòni Hàm wàa a gin mum, ha mi sak Yèk Kâwrra a tîim nit ây èege yèk wàa gi, mi yèenji ni nirri ba. 17 Mi dik ɗa a Yerusalem a gin nit tèerra ây ɗàagim gi ba, amma mi taye yaale a dees ni-Arab ây, a dat maan de irma a Damasku. 18 A dat yeri taan de koyma a Yerusalem, ngam mi rabu di Piyèr ha mi cèngnu, de tâanjim ni ey unji ra sàm kèrèw. 19 Amma da nit ây kana tèe daw Yeesu gi mi rap daw ba, sey Yakuba kaa wàa di Nitcoorra. 20 Jày kèrmifa dun gi takundi ɗi; mi gàarre a ɗàm kpees Fay, mi rèengde ba. 21 A dat maan de dikmi a dees Siriya ni Kilikiya. 22 Mgbàr maan a nit ta Kristu kimje a dees Yude, aw cèngnim ba. 23 Aw rage gbè a gin nit ây kana aw gàarre: Nit yey ɗàagina mgban ɗàari gi, sakɗe yèk goosum yey haaw nà e gbeesifa gi. 24 De 'misin nîir Fay ngam mum.
