Ni-Efesu ây 6

1Un hàm ây, ragin daw tuy da too rra wun ni nuu rra wun! Ngam kà yey gesi a ɗàm kpees Nitcoorra. 2«Coo too wey ni nuu wey», e tâage yèk mgbèngda màrra yèege a yèk mòonjum kàn, 3gàa «ngam ha mu kpàa kâwum a tâam wey, ha yer wey e yâk a deesi gi». 4Un tooy ây ɗa, ta un aanji daw ngòlòm da hàm ta wun ba, amma nàrrin daw ni rûunum ni mgbèngda a yèk Nitcoorra. 5Un sàay ây, ragin daw tuy da nit ɓèl ta wun a deesi gi, ni tolnji ni timalni, ni tinîir mbâri, mu gàa un tèewrrarre go di Kristu gi, 6naa ni tèerra a nis waw kày ge del daw, amma kà sàay rra Kristu tèege ni tinîir waw pî jày yiɗi Fay gi. 7Tèen tèem wun ni kâwum tinîiri, mu gàa un tèewrrarre go di Nitcoorra, naa da nit ây. 8Ɓaysin, koo wuna koo sàay ɗi koo tiròom ɗi, to tèe go jàk mbâri, kpàa ge kpàa bèeb tèem wàa a gin Nitcoorra. 9Un nit ɓèl ây, mbirin daw ɗa mbâri da sàay rra wun, ta un ngakɗa daw ba. Ɓaysin, Nitcoorra wun diinu kpolo a faktiturum ni aw, ti raptirre nis nit ây 'nang 'nang ba. 10Yèk kana ngasimdage: Tâan kpèw a gin Nitcoorra, ni kpèw kpèw mbinum wàa. 11Mgbabin jàk bàpri ây hîinu Fay gi, ha un kpàa gòyrra a gin Seyɗan ni gâra ta wàa. 12Ngam tapnjum bàpri worro ti tâa ni nirri ba, amma ni tiɗàm kpees ây, ni jàk mbinum ây, ni wûun ây a kulpi gi, ni tindòom makta ây a faktiturum. 13Ngam maan arrin jàk bàpri ta Fay, ha un kpàa gòyrra kpèw a unji makta, ye gun gbèesi tapnjum pî gi. 14Hû go mbangsin un cîi kpàang wun ni takundi, un mgbap lurra titefki tâage gòyrra ɗèm, 15un lekni naan un tâa mbangsumya a sakta Yèk Kâwrra tâam mbâri. 16Ji hòmge da jàk ây gi pî, sey un at kirngi tâage goosum. Ni erra gun kpàa mòonum ndof hengsum ây lakra Tooy mamji gi. 17Iin darrhak titefki tâage saarra, arrin ɓet ɓèl Jungci Delliya tâage yèk Fay. 18Mbirin jàk ây gi pî ni waarra Fay, un gun mgbaanjum wàa koo ningàa ni Jungci Delliya. Waatin un rîi kpèw a waar maan ngam nit della ta wàa di Fay pî. 19Waan Fay ngam mum ɗa, ha e hîim yèk yey gesi mi yèe gi, mi cèngnini daw tolnji cen yèk fûurriya a Yèk Kâwrra. 20Mi nit gòynum ɗi a yèk maan, koo ye tâam a kultuma gi. Hû go waan Fay, ngam ha mi kpàa yèerra Yèk Kâwrra kày gese gi tolnji cen. 21Ticiku kor worro yiɗumya, mòoge mbâra a tèerra tèem mgbaanjum a gin Nitcoorra, kà ge kàlnu jày pî, ngam ha un cèngni ɗa yèk mum kày tâami gi. 22Mi tèewfarre a gin wun yèk maan, ngam ha un cèngni yèk worro kày tâana gi, ha e suusunu tinîir wun ɗa. 23Fay Tooy Ɓèl ni Yeesu Kristu Nitcoorra worro, aw hîi daw da kor goosum ây pî tâam mbâri, ni yiide, ni goosum! 24Mbâr Fay e tâa ni nit ây pî yiɗi Yeesu Kristu Nitcoorra worro ni yiide tâam timgbàri gi!

will be added

X\