Ni-Efesu ây 5

1Tâan nit futa ta Fay, un mbir kà yey mbire ey, un hàm ây yiɗi dun gi. 2Digin dikri wun ni yiide, kà yey yiɗunu Kristu, hîige hak wàa ngam worro kà hîir jàk gurfum delgu di Fay gi. 3Amma yèk njeenu, ni tèem 'miskumya, ni gayrum jàk ây ta un yèe a tîim wun ba sam. Ngam kà yey gesi daw da nit della ta wàa di Fay. 4Ti gesi ɗa yèk njengji, ni yèk ray, ni yèk 'miskumya e tâa a tîim wun ba, amma ndika gàarra mbew di Fay. 5Sey un cèngni, koo wun tâage nit iirra njeenu, koo nit tèem 'miskumya, koo nit gayrum jàk ây, koo nit coorra mâri, ge lek a wûun yey wûuni Kristu ni Fay ba sam. 6Ta nirri e rûfnu ni yèk ɓa hû go ba! Ngam maan ngòlnji Fay dàararre da nit ây tâa aw ragu tuy ba. 7Ta un 'mèmsi ni nit ây gi ba! 8Ngam mgban un dii nà a kulpi, amma kòsòng un tâarre a kayang Nitcoorra. Hû go digin kà nit ây tâage a kayang! 9Ngam kayang repɗe a jày pî tâage mbâra, ni ɗèm, ni takundi. 10Getnjuwan jây pî to delu go di Nitcoorra. 11Ta un 'mèmsi a tèem kulpi èege jàk repta gi ba, amma ndika lònum tèem ây gi a kayang. 12Ngam jày tèen a nit ây ni fûucu gi jàk lawsam ɗi, koo a yèerra gi ɗa. 13Amma kayang lònirre jày pî, ngam jàk ây pî tâage lònumya gi kayang ɗi. 14Ngam maan gàarriya ɗi: Mu nit kûurra gi, mûyi mu an a tîim nit ây wutke gi, Kristu e kayngumda! 15Faasin hak wun mbâra a dikri wun diknu gi. Ta un tâa kà rak ây ba, amma kà nit ây tâage còycumya. 16Ta un woo unji mbâra e hòm ɓa hû go ba, ngam tâarra yey gi maktiya ɗi. 17Ngam maan ta un tâa kà nit ây èege cèngnum jày ba, amma cèngnin jày yiɗi Nitcoorra gi! 18Ta un tâa nit râmda mbàl ba, yey ge mboysu tâam wàa di nirri gi, amma tâan mûunumya ni Jungci Delliya. 19Hû go un yèenji a tîim wun ni ndûu ây, ni ndûu 'misunum Fay, ni ndûu Jungci Delliya, un kâa un 'misini nîir Nitcoorra a tinîir wun. 20Hû go ɗa un gàa mbew di Fay Tooy Bèl koo ningàa ngam jày pî, a nîir Yeesu Kristu Nitcoorra worro, 21un coonji a tîim wun a tolnji Kristu. 22Un nikin ây, ragin daw tuy da maa rra wun kà yey raknu di Nitcoorra gi. 23Ngam nihun tâage hak nikin kà yey tâa Kristu hak nit kimjum ây, tâage is wàa gi. Ey tâage nit saanum waw. 24Hû go a nikin ây sey aw ragi daw tuy da maa rra waw a jày pî, kà yey raguwan nit kimjum ây di Kristu. 25Un nihun ây, yiɗin kin ta wun, kà yey yiɗe Kristu nit kimjum ây gi. Hîige hak wàa ngam waw, 26ngam ha e ɓetkini daw, a ye kòl daw ni sòo. ni yèk wàa gi ɗa, 27ha e gòyni daw a ɗàm kpees wàa aw tâa ni 'mita, cen jàk 'miskum koo fetki jày koo jàk kana ba, aw tâa nit della ây cen jàk maarra. 28Hû go gesi a nihun ây aw yiɗi kin ta waw kà yey yiɗin is waw. Nit yey yiɗe kin wàa gi, hak wàa yiɗe. 29Ngam cen nirri haagirra yiirra is wàa ba, amma riisurre, faawrre ni hakkilo, kà yey mbire Kristu da nit kimjum ây tâage is wàa gi. 30Ngam orro ot jàk ây ɗi a is wàa. 31Defterre Fay gàa: Kà yey nihun woo ge woofa too wàa ni nuu wàa, e 'mèmsi ni kin wàa, aw ɗa cuk i gaw ir isi kpolo. 32Yèk yey yèk fûurriya ɗi. Mi yèerre yèk maan a gin Kristu ni nit kimjum ây. 33Amma un ɗa, gesi koo wuna a tîim wun e yiɗi kin wàa kà yey yiɗi hak wàa. Nikin ngaa sey e coow di maa wàa.

will be added

X\