Ni-Efesu ây 4

1Hû go miy mi nit yey leknimin a kultuma ngam Nitcoorra mi waanurre, digin kà yey gese a jày yiɗi Fay ye 'naasunu gi, 2un ûuni hay, un tâa ni fetkum tinîiri, un èfnji tinîiri a tîim wun ni yiide. 3Hârin un mòo a 'mèmsum yey hîinu Jungci Delliya gi, un 'mèmsi ni ti 'mèmni tâam mbâri. 4Ngam isi dii kpolo, Jungci Delliya ngaa dii kpolo. Hû go ɗa jàk dànda dii kpolo a gin 'naasunu Fay gi. 5Nitcoorra dii kpolo, goosum dii kpolo, baptisma ngaa dii kpolo. 6Fay dii kpolo Tooy nit ây pî, wûunge da nit ây pî, tèeni ni nit ây pî, tâage a gin nit ây pî. 7Amma koo wuna a tîim worro kpàa hîir wàa a mbâr Fay, a tigeni hîir Kristu. 8Ngam gàarre a defterre Fay: Ye naa u fay gi, de 'maani ni nit ây 'mèmdiya, de hîira hîir ây da nit ây. 9Ji yiɗi gàarra yèk naarra wàa ya? Ti gàa ɗà ɗàara cita ha a yengji deesi gi ba yi? 10Nit yey cirga gi, ey tâage ɗa nit yey naase gi a hak faktiturum ây pî, ngam ha e mûuni jày pî a tâam wàa. 11Ey hîigi daw da nit ây kana aw tâa nit tèerra ây, da nit ây kana aw tâa nit ây gaw lòni yèk wàa, da nit ây kana aw tâa nit ây gaw sak Yèk Kàwrra, da nit ây kana aw tâa hàm faat waw da nit kimjum ây, da nit ây kana ngaa aw tâa nit kàlnjum ây. 12Hîi daw da nit ây kà yey, ngam mbangsum da nit della ta wàa di Fay aw get a tèerra tèem mgbaanjum, ngam 'misunum nit ây tâage is Kristu gi, 13ha orro pî ot kpèt a goosum kpolo, ni cèngnum di Hàm Fay, ha ot ir @ni-toonji ây, ot kpèt a geta yer worro a mûurra mbâr Kristu. 14Hû go got tâasirra hàm ây ba, yûusi daw kèlmum sòo ni hiski a kàlnjum 'nang 'nang anga a gâra nit ây, ni rèeng rûfrum waw gi ba, 15amma ot yèerre yèk takundi ni yiide, ha ot 'mit a jày pî a gin Kristu tâage hay gi. 16A gin wàa 'mèmse isi pî, gòyrre ni tulnji ây ni jàk ây pî, ye tâa koo jàk hâ tèerre tèem wàa kà yey gesu gi. Hû go isi pî iisirrarre 'mita ni yiide. 17Ngam maan mi gàanurre ni nîir Nitcoorra, ta un diksirra bak kà nit ây èege yèk Fay ba, dike a dànda waw raya tâage ɓa hû go gi. 18Dànda waw dii yiriya. Aw kpâanji ni jungci Fay, ngam èca cèngnum waw anga a tinîir waw ndèktiya gi. 19Ye tâa lawsam waw lòoyige, aw lekni hak waw a haanum tuy, ha aw tèe jàk 'miskum pî ni gayrum jàk ây. 20Amma un un èngni kà yey a yèk Yeesu Kristu gi ba. 21To un rak go yèk wàa ni yèk kàlnjum wàa, getnji ni takundi a gin wàa gi, 22kà yey un cèngnige, sey un woofa dikri wun màrra, un botfa nit mgbanti a hak wun leke a gbeerra ni rûfrum gayam is wàa gi, 23un insi dànda tinîir wun fûuya, 24un mgbabi nit fûuya yey mbangsu Fay a rèenjum ni ey gi, tâage ni gòyrra ɗèm, ni tâam delliya a takundi. 25Ngam maan woofan yèk rèeng, koo wuna e yèe yèk takundi ni nit tâanjum wàa, ngam orro ot jàk ây ɗi a is kpolo. 26To un an go ni ngòlnji, faasin hak wun ta un yaa a jàk maarra ba. Ta un tâa ni ngòlnji maan ha unji e lek ba. 27Ta un hîiw orri di Seyɗan ba. 28Nit oorgum jày ta e haasirra oorra ba, amma ndika e tèe tèem mbâra ni kàn wàa, ha e kpàa jày ge hîi da nit èca ây gi ɗa. 29Ta yèk makta e yuu a mgbelyèk wun ba, amma yèen yèk mbâra kày gesi e mgbaanji daw da nit ây, ha e hîi daw mbâri da nit rakta ây. 30Ta un aanju ngòlnji di Jungci Fay Jungci Delliya gi ba, a gin yey kpàanu ticèngsunum ge gòynunu a unji saarra wun gi. 31Woofan tinîir ɗalliya, ni anda yèy, ni ngòlnji, ni bimrum yèk ây, ni maasum yèy, 'mèmsa ni tèem ây pî tâage maktiya gi. 32Irin nit ây tâage ni mgbergum yèy, ni 'nàpkum tinîiri a tîim wun, un yaafinji kà yey yaafunu Fay a gin Kristu.

will be added

X\