Ni-Efesu ây 2

1Mgban un dii nà wutiya, ngam un ragu tuy di Fay ba, ngam un mbire jàk maarra. 2Mgbàr maan un dikɗe nà kà yey digin a nit kparri ây gi, un rakɗe nà tuy di wûun jàk mbinum ây u fay, di tindòom yey tèege kòsòng a tîim nit ây tâa aw ragurre tuy di Fay ba. 3Orro pî ot dii nà kà nit ây gi, ot futɗe nà gayrum jàk is worro, ot tèerre nà jày yiɗi is worro ni jàk dànda worro. A tâam worro hû go ot hàm ây ɗi a ngòlnji Fay kà nit ây kana ɗa. 4Amma Fay a gbaarra 'maton wàa, ni yiide wàa dèy yiɗina ni erra gi, 5de gûysina dorro ni un ɗa 'mèmsa ni Kristu, ye tâa orro ot dii nà wutiya ngam jàk maarra worro. Ɓaysin, ni mbâr Fay saanu! 6A 'mèmsum ni Kristu Fay de gûysina ni ey, de iina ot wûunji ni ey a faktiturum. 7Hû go Fay yiɗi e kàlni gbaarra a 'mita mbâr wàa, a mgbàr yey ge dàara gi pî. Yiɗi e kàlni ni mgbergum wàa tâagina a gin Yeesu Kristu gi. 8Ngam a mbâr Fay saanu ni goosum. Saarra yey ti tâa ni tèem wun ba, amma hîir Fay ɗi. 9Saarra maan ti tâa ni tèerra tèem ba, ngam ta koo wuna e 'misi hak wàa ba. 10Orro ot titèem ta wàa ɗi di Fay, mbangsina a 'mèmsum ni Yeesu Kristu, ha ot tèe tèem mbâri, ye ii mgban ngam ot dik a farra gi. 11Ngam maan ɓaysin, aw kpàanu nà mgban a tîim nit ây èege yèk Fay. A nit ây gàan daw nit rrèpnum ây, rrèpnum yey tèen ni kàn a is waw gi, aw 'naasunu nit èca rrèpnum ây. 12Mgbàr maan un kpâanji nà ni Kristu, un 'mèmsi ɗa a tîim ni-Israyel ây ba, un dii nà ni-wooy ây a jàk wasta ây hîi daw Fay ni mòonjum kàn da nit ta wàa gi. Un dii nà a kparri gi jàk dànda cen, Fay cen. 13Amma kòsòng ye tâa un 'mèmsi ni Yeesu Kristu, un dii gaarra ni ey ngam wurra wàa, un nit ây tâage nà mgban kpâarriya gi. 14Ngam Kristu raknjina a tâam mbâri. Inina kpolo dot ni-Yude ây ni nit ây èege nà yèk Fay, ye tâa ni wurra wàa yaasifa njèrra yey mîinjina a tîim, iigina nà nit yiir ây gi. 15Ni wurra wàa yaasifa yèk mgbèngda tâage ni wasta yèk ây 'nang 'nang, ngam ha e 'mèmsi daw da yòot nit ây cuk gi, e mbangsi daw nit fûuya kpolo. Hû go mbangse tâam mbâri a tîim waw. 16Ni wurra wàa a minjum kpiiri raknjisina ni Fay, dot yòot nit ây irge isi kpolo tâage nà mgban cuk gi. Ey atkifa jàk yiiri a tîim. 17Ye dàara Kristu gi, saknu Yèk Kâwrra tâam mbâri dun nit ây tâage nà kpâarriya, ni ot nit ây tâagirra nà gaarra gi. 18Ngam yèk wàa ot yòot nit ây cuk gi ot kpàa lekta a gin Tooy Bèl ni Jungci kpolo. 19Hû go un nit ây èege nà yèk Fay, un censirra ni-wooy ây koo ni-riiy ây kana ba, amma un 'mèmsi a tâam nit della ta wàa di Fay, un nit àay rra wàa ɗi ɗa. 20Un dii jàk jâarra a jày tarin nit tèerra ây ni nit ây lòni yèk Fay. Yeesu Kristu ni hak wàa tâage gòok tigòyni jàk jâarra maan. 21Jàk jâarra pî 'mèmse a gin wàa, iisirrarre 'mita ha e tâa àay della di Fay. 22A gin Kristu un nit ây èege nà yèk Fay ɗa un 'mèmsi a jàk jâarra maan, ha un ɗa un ir àay gin titâam wàa di Fay, e tâarra a farra ni Jungci wàa.

will be added

X\