Ni-Efesu ây 1

1Miy mi Pawlu, mi nit yey tèem Yeesu Kristu kà yey yiɗi Fay, mi kèpfa dunde dun nit della ta wàa di Fay tâage a Efesu, un nit ây goosu di Yeesu Kristu gi. 2Nge Fay Too worro ni Yeesu Kristu Nitcoorra, aw hîinu mbâr waw ni tâam mbâri! 3'Mita e tâaw di Fay, Too wàa di Yeesu Kristu Nitcoorra worro, mbârsina ni mbâr Jungci Delliya pî a faktiturum ni Yeesu Kristu gi! 4Ngam Fay catkina mgban a gin Kristu, ɗoko mbangse kparri, ha ot tâa nit della ta wàa cen jàk maarra a ɗàm kpees wàa. 5A yiide wàa gbèesi mgban dànda wàa, ha ot ir hàm ta wàa yèk Yeesu Kristu. Ey yiɗe kà yey ngam deluge, 6ha ot 'misi 'mita mbâr wàa. Hîigina mbâr maan ɓa hû go ni Kristu Hàm wàa yiɗu gi. 7Ngam wurra Yeesu Kristu kpàana sàasum ni njîim wàa, yaafum jàk maarra worro. Kà yey Fay lònina gbaarra mbâr wàa, 8gbaasina dèy ni ɓèlla ni còycum pî, ni hakkilo pî. 9Ey cèngnina jày tâage nà fûurriya a yiɗum wàa. Ngam a yiɗum wàa carre mgban e mbir ni Yeesu Kristu kày delu gi. 10Yiɗige e tèe jàk maan a kpèta mgbàr ây, ngam ha e 'mèmsi jàk ây pî tâage a faktiturum ni deesi a gin Kristu, e tâa hak waw. 11A gin wàa kpàana ɗa jàk koyrra, ot nit ây tâage mgban catiya a gin Fay a dànda wàa gi. Ey tèerre jày pî kà yey dàni a yiɗum wàa. 12Yiɗige e kpàa a gin worro 'misum a 'mita wàa, ot nit ây ɗàage iirra jàk dànda worro a gin Kristu gi. 13Un ɗa ye raknu Yèk Kâwrra saanum wun yèk takundi, goosunu di Kristu, Fay de iirra dun ticèngsunum, de hîinu Jungci Delliya a yèk mòonjum kàn. 14Jungci Delliya gi tâagina jàk màrra a kpàarra jàk koyrra worro, ot nit ta Fay got saa gi, ha ot 'misi 'mita wàa. 15Ngam maan miy ɗa, ye rakmi yèk goosum wun di Yeesu Nitcoorra, ni yèk yiide wun tâagunu a gin nit della ta wàa di Fay pî, 16mi loorre a gàarra mbew di Fay ngam wun ba. Mi ɓaysunurre a waar mum. 17Mi waarre ngam Fak Yeesu Kristu Nitcoorra worro, Tooy 'mita, e hîinu còycum, e lònunu kày gun cèngnu gi, 18e kayngunu a mîis tinîir wun, ha un cèngni jày tâagunu a jàk dànda yey 'naasunu gi, ni jày tâage gbaarra a 'mita jàk koyrra yey ge hîi daw da nit della ta wàa, 19ni jày tâage 'mita mbinum wàa a gin worro, dot nit ây goosu gi. Mbinum maan ɗa tèe ni kpèw kpèw dèy, 20ye gûysu Fay di Kristu a wurra gi, de iiw a riina wàa a faktiturum. 21A farra Kristu tâage hak waw da tiɗàm kpees ây, ni mbinum ây, ni kpèw kpèw ây, ni jàk ɓèl ây, ni koo nîir hâ 'naasin pî naa tâarra yey gi gbè, amma a mgbàr yey ge dàara gi ɗa. 22Fay kûuni jàk ây pî a nak Kristu. Ye tâa ey tâage a jày pî, Fay de iiw e tâa hak waw da nit kimjum ây pî. 23Aw tâage is wàa di Kristu. Ey dii mûunumya a gin waw, mûunirre koo jâ pî a jày pî.

will be added

X\