Tumri Nittèerra ây 6

1Mgbàr maan a ye iisirran mûurra a nit futa ta Yeesu, hûungum ane a tîim nit ây yèege yèk Girèk, a hak nit dees Yude ây. Aw gàaye, aw kpòofa dawge da kin wurra ây a hîirra tiriici unji pî. 2A nit ây tèe daw Yeesu ra sàm cuk de 'naasin da nit futa ta Yeesu pî aw kimja. De gàan daw: Ti del ot woofa yèerra yèk Fay ngam tèerra tèem tiriici ba. 3Hû go un kor ta mum, carrin nit ây jòròs a tîim wun, a nit ây tâage ni yèk mbâra a hak waw, mûuge ni Jungci Delliya, ni còycum ɗa, ha ot ii daw a tèem yey. 4Amma orro fu got fut a waarra Fay ni tèem sakta yèy. 5Yèk yey del daw da nit kimjum ây pî. De carrin Estefanu nit yey tinîir wàa mûu ni goosum, ni Jungci Delliya. De carrin ɗa Filip, ni Porokorus, ni Nikanor, ni Timon, ni Pamenas, ni Nikola ni-Antakiya, 'mèmsi nà mgban ni ni-Yude ây. 6De gòynin daw a ɗàm kpees nit ây tèe daw Yeesu, de iin daw kàn a hay, de waan Fay ngam waw. 7Yèk Fay dikɗe ɗàm kpeesi. A nit futa ta Yeesu aw iisirra mûurra dèy a Yerusalem. Mûsa nit daprum ây ɗa aw rage tuy aw goosige. 8Mbâri ni mbinum Fay mûu a gin Estefanu. E tèeye kayeefi ɓèl ây, ni lònum jày a tîim nit ây. 9A nit ây a àay kimjum yuuge a sàay, de anin ni ni-Kirene ây, ni ni-Aleksandariya ây, ni ni-Kilikiya ây, ni ni-Asiya ây ɗa. Aw pî aw ane hàanjum yèy ni Estefanu. 10Amma aw get gòyrra a ɗàm kpees yèk wàa ba, a còycum Jungci Delliya hîigu gi. 11De yèen da nit ây kana ni fûucu ha aw gàa: Ot rage nit yey yèerre yèk maasum a gin Muusa ni gin Fay. 12De cuynin da nit ây, ni toonji ây, ni nit còycum ây. De dàaran a gin Estefanu, de mòowan de 'maawan a gin nit ɓèl raknjum ây. 13De gòynin nit ây gaw seedi yèk rèeng, aw gàa: Nit yey ti woo yèerra yèk maasum a della àay Fay, ni a yèk mgbèngda Muusa ba. 14Ot ragu gàaye, nge Yeesu ni-Nasaret aa ge aasifa àay Fay, i ge ini hàar yey hîina Muusa gi. 15A nit ɓèl raknjum ây pî a ye gobuwan di Estefanu teng teng, de rabin tiigi wàa rèenji ni tiigi malayka.

will be added

X\