Tumri Nittèerra ây 5

1Nit kana nîir wàa Ananiya, ni kin wàa Safira aw ɗa aw sàani hèmna waw. 2Ey raknji ni kin wàa, ha e woorra a seede yey kpàa gi ngam hak wàa. De 'maara woy ngirra, e ii a ɗàm kpees nit ây tèe daw Yeesu. 3Amma Piyèr de gàaw: Ananiya, ngam jâ Seyɗan mûu a tinîir wey, ha rèenggum rèeng di Jungci Delliya, ha fûunum ngirra seede hèmna wey ya? 4A ye tâa ɗà mu sàani ba, ni a ye sàanum gi ɗa, ti tâa woy wey, mu mbini tèerra jày yiɗum ni erra ba yi? Kà kà dànum a tinîir wey, ha mu mbir kà yey ya? Di Fay rèenggum, mu rèeng da nit ây ba! 5Ananiya ye rage yèk yey, de yaa kpum, de wurre. Tolnji ɓèl mòo daw da nit rakta jàk yey pî. 6A lor ây a farra de anin, de forguwan, de 'maawan aw siptuwa. 7Njamdi taan ye hòme, kin wàa ngaa dàarage, de lekfa. Ti cèngni jày mbirge nà ba. 8Piyèr de gunuwa: Seede kà yey sàanunu hèmna wun gi yi? De goose: Eeye, hû go ɗi. 9Piyèr de gàaw: Kà kà raknjunu ha un haaw rûfta di Jungci Nitcoorra ya? Aw rri yey a nit ây sipti maa wey, gaarra a nin, 'maa gaw 'maam dum ɗa! 10Kòsòng de yaa kpum a ɗàm kpees Piyèr, de wurre. A lor ây de lekfan, de kpàawan wurre. De 'maawan aw siptu a cewci maa wàa. 11Tolnji ɓèl mòo dawge da nit kimjum ây lang, ni nit ây pî rake yèk yey. 12A nit ây tèe daw Yeesu aw lònirre jàk ây dèy ni kayeefi a tîim nit ây. A nit goosum ây pî aw 'mèmsige ni tinîiri kpolo, aw kimjirre a minjum àay Fay înuwan àay Salomu. 13A nit ây kana aw haa gàarra gaw 'mèmsi ni aw ba. Amma aw pî aw coo dawrre. 14A nit ây goosu di Nitcoorra aw iisirrarre dèy, a nihun ây ni nikin ây. 15Aw yuuna nit àyci ây, aw tokra daw ni aari ni jingi a orri, ngam a ye ge hòm Piyèr, bingi wàa butɗa go koo mâa go di nit kana a tîim waw. 16A mûsa ni-riiy ây tâage a cewci Yerusalem ɗa aw tokrarre nit àyci ây, aw 'maara nit ây riisi daw tindòom 'màari. Koo wuna kpàa ndòosum. 17Nit ɓèl daprum de anin ni nit tâanjum ta wàa pî. Aw futɗe a kàlnjum yèk ni-Saduki ây. Aw tâarre ni ngèeri. 18De mòon da nit ây tèe daw Yeesu gi, de leknin daw a kultuma ɓèl. 19Amma ni tuma malayka Nitcoorra de dàara, de faare tifanji ây a kultuma, de yuuni daw de gàa: 20Digin un gòy a àay Fay, un yèe da nit ây yèk jungci fûuya! 21Aw rage. Ndamji ye kayge de legin a àay Fay, de kàlnjin yèy. Amma nit ɓèl daprum ni nit tâanjum ta wàa aw kimji nit ɓèl raknjum ây a tîim ni-Israyel ây pî. De tèen da lor ây a kultuma, aw 'maara daw da nit ây tèe daw Yeesu gi. 22A lor ây ye kpèrrin a kultuma, aw kpàarra daw a farra ba. De irin, de sagin yèk maan. 23De gàan: Ot kpàaye kultuma fantumya kpèp. A nit waatum ây aw dii a nin. Amma ye faarina, ot kpàarra koo nirri u mîisi ba. 24Nit ɓèl waw da nit waatum àay fay, ni nit ɓèl ta waw da nit daprum ây ye ragin yèk yey, lawsam mòo dawge, aw cèngni ji ge mbir a yèk yey ba. 25Nirri de kpèrra de gàa daw: Aw rri yey a nit ây leknunu a kultuma nà, aw gòyrre a àay Fay, aw kàlnjirre da nit ây. 26Nit ɓèl waw da nit waatum àay Fay de taynji ni nit ta wàa a farra. De 'maaran nit ây tèe daw Yeesu gi ni hakkilo, ngam aw tole da nit ây ta aw còo daw ni gòoy ba. 27De 'maaran de gòynin daw a ɗàm kpees nit ɓèl raknjum ây. Nit ɓèl daprum de gàa daw: 28Ot njang dunge dèy diga mgban, ta un kàlnju di nirri a nîir Yeesu nit maan gi ba. Amma un mûuni riiy Yerusalem ni kàlnjum wun. Un gàarre, un 'maara dot njîim nit maan a hak worro. 29Piyèr ni nit tèerra kana de goosin de gàan: Ndika rakta di Fay hòme rakta di nirri. 30Fak wosom ta worro gûysuge di Yeesu, nit yey ɓàtnu un ni gbalcu a kpiiri gi. 31Dey Fay aanjuge a riina wàa, e tâa wûun ni Nitsaanum, ngam ha e hîi da ni-Israyel ây aw kpàa ot inum tinîiri, ni yaafum jàk maarra waw. 32Orro ot nit seedum ây ɗi a jàk ây gi. Hû go ɗa yèk seedum dii a gin Jungci Delliya, yey hîi Fay da nit ây coogu gi. 33Ye ragin yèk yey, de ngòl daw. Aw yiɗi aw ɓàt daw da nit ây tèe daw Yeesu gi. 34Amma nirri kpolo a tîim nit ɓèl raknjum ây, ni-Farisa nîir wàa Gamaliyel de ane. Ey nit kàlnjum yèk mgbèngda Muusa ɗi, a nit ây pî aw 'misurre. De gàa aw yuuni da nit ây tèe daw Yeesu gi a gbaa càa. 35De yèe de gàa daw: Un ni-Israyel ây, faasin hak wun a jàk yey gàanu un mbit daw da nit ây gi! 36Ngam ti tâa mgban ba, Tehudas ane, de kàlni hak wàa de gàa ey nit ɓèl ɗi. A nit ây kpèrre temèrre naan aw 'mèmsi ni ey. Amma aw ɓàruge. Nit futa ta wàa aw yeski pî kpolo kpolo, aw gbeeye. 37A dat nit yey, Yuda ni-Galile de ane mgbàr kèta nîir nit ây, de arre a nit ây aw furruwa. Dey ɗa aw gbeesuge. A nit ta wàa ngaa pî aw yeskige. 38Hû go mi gàanurre: Woon daw da nit ây gi aw tayi. To dànda waw ni tèem yey ana go a gin nirri, lòo ge lòo. 39Amma to ana go a gin Fay, gun kpàa lòosum ba. Ta e tâa un haarre gbàaci ni Fay ba! A nit ɓèl raknjum ây de ngorin yèk Gamaliyel nà. 40De 'naasisin da nit ây tèe daw Yeesu, de lutkin daw. De njanggin daw, ta aw yèesirra ni nîir Yeesu ba. De woon daw. 41De yuun a gin nit ɓèl raknjum ây ni tinîir kâwrriya, ngam aw gerre a ɗàm kpees Fay riirra 'màari yèk nîir Yeesu. 42Unji pî aw futɗe kàlnjum a àay Fay ni a àay nit ây, aw sakɗe yèk Yeesu Kristu.

will be added

X\