1 Piyèr ni Yuhanna ye yèen bak da nit ây, a nit daprum ây, ni nit ɓèl waw da nit waatum àay Fay, ni ni-Saduki ây de dàaran. 2 De ngòli daw dèy, ngam a nit ây tèe daw Yeesu gi cuk aw kàlnjirre da nit ây, aw sak dawrre yèk gûysum Yeesu a wurra, kà gàarra a nit ây gû gaw gûysi ɗa. 3 De mòon daw, de leknin daw a kultuma ngam mbona ciiye, ha ni ndamji gaw ii daw kiita. 4 Koo hû go a nit ây dèy rake gi aw goosige, mûsa nihun ây kpèrre ujinè kèrèw. 5 Ni ndamji a nit ɓèl ta waw da ni-Yude ây, ni toonji ây, ni nit còycum ây ɗa aw kimjige a Yerusalem. 6 Aw tâa a farra ɗa ni Hannas nit ɓèl daprum, ni Kayafas, ni Yuhanna, ni Aleksanda, ni yòot nit ɓèl ta waw da nit daprum ây pî. 7 De 'maaran Piyèr ni Yuhanna, de gòynin daw a tîim. De gunin daw: Ni mbinum hâ koo ni nîir wun mbitnu jàk yey ya? 8 Piyèr mûuye ni Jungci Delliya a tinîir wàa, de gàa daw: Un nit ɓèl ây, ni toonji ây, 9 un gunnarre niyey ngam tèem mbâri tèena di nit àyci, kày mbire ha ndòoye. 10 Ndika un pî, ni ni-Yude ây un cèngni, nit àyci yey dii a ɗàm kpees wun gi, ndòoye ni mbinum a nîir Yeesu Kristu ni-Nasaret, nit yey gbalnu un a minjum kpiiri, Fay gûysuge. 11 Ey tâa kà gòok yey un nit jâarra àay 'màktifa un ngam un yiɗu ba, gòok maan irge gòok tigòyni àay. 12 Saarra kana cen, sey a gin Yeesu gbè. Nîir kana ɗa cen a deesi Fay hîiw di nirri, ha ot kpàa saanum ni erra ba. 13 De tâa daw 'nang da nit ɓèl raknjum ây, a ye rabin Piyèr ni Yuhanna aw yèerre tolnji cen. Aw cèngnige, a nit ây gi cuk aw mbin kèta ɗerrewol ba, aw cèngni jày ɗa dèy ba. Aw cèngsi dawge, a nit tâanjum ni Yeesu ɗi. 14 A ye rabin nit àyci nà ndòoye, gòynjirre ni nit ây tèe daw Yeesu cuk gi a farra, aw kpàa ɓoorra koo jâ ba. 15 De gàan daw aw yuu a gbaa. De yèenjin a tîim waw, 16 de gàan: Kà got mbit daw da nit ây gi ya? Ngam a ni-Yerusalem ây pî aw cèngni mbâra, kayeefi ɓèl mbire ni kàn nit ây gi. Orro got kpàaw hàanjum a jàk yey ba. 17 Amma ngam ta yèk yey e iisirra yeskum a tîim nit ây, sey ot njang daw, ta aw yèe di nirri ni nîir Yeesu ba. 18 De 'naasin daw aw isa. De njanggin daw de gàan: Ta un haasirra yèerra koo kàlnjum a nîir nit maan ba sam! 19 Amma Piyèr ni Yuhanna de goosin daw de gàan: Dànin un ni hak wun, to gesi go ot raknu tuy e hòm rakta di Fay. 20 Orro got kpàa tâarra baak baak a jàk yey rapna ni jàk yey rakna gi ba. 21 A nit ɓèl raknjum ây de iisirran daw kpânda, de woon da nit ây cuk aw tayi. Aw kpàa orri kày gaw hiiti daw ba, ngam a nit ây pî aw 'misi nîir Fay a jàk yey mbirin gi. 22 Nit yey kpàage ndòosum ni kayeefi, yer wàa hòme yeri ra naan. 23 Ye woon di Piyèr ni Yuhanna gi, de koyran a gin nit ta waw. De sagin daw jày pî gàan a nit ɓèl ta waw da nit daprum ây, ni toonji ây. 24 A nit goosum ây ye ragin kà yey, de 'mèmsin tinîiri kpolo, de waan Fay de gàan: Tooy Ɓèl, mu wûun ɗi a jày pî, muy mbangse faktiturum ni deesi, ni càng sòo, ni jày tâage a farra pî. 25 Muy mu yèe ni Jungci wey a gin wosom worro Dawda, nit tèem wey, de gàa: Ngam jâ a nit ây èege yèk Fay aw ande hàngàngàng ya? Ngam jâ mûsa nit ây aw yiɗi mbita jây ɓa hû go ya? 26 A wûun ây a deesi aw ane, a nit tiɗàm kpees ây ɗa aw kimji kpolo ngam haarra gbàaci a gin Tooy Ɓèl ni Kristu wàa. 27 Takundi, a riiy yey koo Herode, ni Pontu Pilatu, ni nit ây èege yèk Fay, ni yòot ni-Israyel ây pî aw kimja gbàaci a gin Yeesu, lor wey delliya catmu gi. 28 Hû go aw gbèesi jàk yey mbangsum mgban ni mbinum, ni dànda wey gi. 29 Yow, Tooy Ɓèl, gop kpânda waw, hîi da sàay rra wey aw yèe yèk wey tolnji cen! 30 Pat kàn wey ngam ndòosum àyci, ni kàlnum jàk ây ni kayeefi ây aw mbiri ni nîir Yeesu, lor wey delliya gi! 31 Ye gbèen waarra Fay kà yey, a gin tâam waw de yûuye. Tinîir waw pî mûu ni Jungci Delliya. Aw yèerre yèk Fay tolnji cen. 32 Mûsa nit ây goosu di Fay aw raknjirre, aw dii ni tinîiri kpolo, ni jungci kpolo. Jày tâagi daw gi, nirri kpolo ti gàa woy wàa ɗi gbè ba. Amma aw 'mèmsi bèeb waw pî. 33 A nit ây aw lòni seedamku ni kpèw kpèw dèy, a yèk gûysum Yeesu Nitcoorra. Fay mbârsi daw dèy koo di wuna. 34 Nit kana cen ni èca jày a tîim waw ba. A nit ây tâage ni hèmna koo àay aw sàani pî. Aw 'maara seede maan kpàan gi, 35 aw ii a ɗàm kpees nit ây tèe daw Yeesu. Aw mîinji seede gi a tîim waw pî, koo wuna a gayam wàa. 36 Nirri kpolo a yòot Lewi, kpàawan a dees Kipru nîir wàa Yosef, dii a tîim waw. A nit ây tèe daw Yeesu aw înurre ɗa Barnaba, kà gàarra nit kpèwsum tinîir nirri. 37 Ey ngaa sàani hèmna wàa, 'maara seede yey kpàa gi, ii a ɗàm kpees nit ây tèe daw Yeesu gi.
