Tumri Nittèerra ây 3

1Unji mbona Piyèr ni Yuhanna aw naarre waarra a àay Fay saa'i maan. 2Nit wuta nay diga himni nuu wàa tâa a nin àay Fay, înuwan nin delliya. Aw 'maawrarre aw iiw a farra unji pî, ngam ha e waargi seede da nit ây leke a àay Fay. 3Ye rabe Piyèr ni Yuhanna aw lekɗe a farra, de waa daw seede. 4De gobuwan teng teng. Piyèr de gàaw: Gopna! 5Nit yey de gop daw ni hakkilo, ey dànde kpàa ge kpàa jày a kàn waw. 6Ɗo Piyèr de gàaw: Seede cenim ba. Amma jàk yey tâagim gi, hîi gim hîimu. Mi gàamde: Ni nîir Yeesu Kristu ni-Nasaret, an mu digi! 7De mòow a kàn riina de gòynuwa. Kòsòng nak nirri nà ni kòpti ta wàa ire kpèw. 8De ane kat de gòye. De ɗaa dikta. De leknjin ni aw a àay Fay. Dikɗe, ɓutɗe, 'misirre nîir Fay. 9Mûsa nit ây pî aw rabu dikɗe, 'misirre nîir Fay. 10De cèngsuwan ey tâarre nà a nin delliya, e waargi jày. De tâa daw 'nang, de kpul daw jungci isi a jàk yey mbirgu gi. 11Nit wuta nay nà aw mòonji pèn ni Piyèr, ni Yuhanna. Ngam tâa daw 'nang da nit ây, aw 'nòorarre a gin waw a minjum àay Fay înin àay Salomu. 12Piyèr ye rabe jàk yey, de ɗaa yèerra yèy da mûsa nit ây de gàa: Un ni-Israyel ây, kà tâanu 'nang a jàk yey ya? Ngam jâ un gopnarre, kà gàarra orro ni kpèw kpèw worro, koo ni coorra Fay mbirgu ot di nit yey ha e digi ya? 13Fak Abraham ni Isak ni Yakob, Fak wosom ta worro 'misuge di hàm wàa Yeesu. Un un 'maawe a kiita un hàwuge a ɗàm kpees Pilatu, koo ye tâa ey yiɗi ngin e woowa. 14Un hàwe nit della, nit mbâri. Amma un waawe di Pilatu e yuununu nit ɓàrgum nirri. 15Un ɓàre wûun jungci. Ey Fay gûysuge a wurra. Orro ot nit seedum ây ɗi a jàk yey. 16Ye tâa e goosu a nîir Yeesu, nîir maan hîigu kpèw kpèw di nit yey rapnu, cèngnu un gi. Ni goosum yey a nîir Yeesu, hîigu ndòosum pî a ɗàm kpees wun. 17Un kor ta mum, mi cèngni ray mbirgunu kà nit ɓèl ta wun, ha de mbitnu jàk maan. 18Amma koo hu go Fay gbèesige yèk nit lònum ây pî yèen nà mgban, nge Kristu wàa rii ge rii 'màari dèy. 19Mi gàanurre: Inin tinîir wun, bunjin jungci wun, ngam ha Fay e yaafunu jàk maarra! 20Hû go Tooy Ɓèl hîi ge hîinu mgbàr wèmji. Tèe ge tèera dun Kristu iiw nà diga mgban gi, Yeesu ɗi. 21Dey gese e tâa a faktiturum, kòsòng ha mgbàr mbangsusum jày pî, kà yey gàa nà Fay ni yèk nit ta wàa, lòni yèk wàa diga ɗaarra jày pî gi. 22Muusa gàa nà: Fay Tooy Ɓèl gò ge gòyni nit lònum yèy kà woy mum a tîim nit ta wun. Raguwan jày ge yèenu pî! 23Koo wun tâa ti ragu di nit lònum yèk yey gi ba, sey aw gbeesu a tîim nit ta mum. 24A nit ây pî lòni nà yèk Fay, diga Samuyel ni nit futa ây a dat wàa, aw yèe yèk mgbàr yey ɗa. 25Un nit kpolo ɗi ni nit lònum ây, un 'mèmsi ni wosom ta wun a yèk yey wasi daw Fay gi. Gàaw nà di Abraham: A yòot wey a nit dees ây pî kpàa gaw kpàa mbâri. 26Hû go Fay gòyni dun màrra lor wàa, tèewra ngam ha e hîinu mbâri, a ita koo wuna a ot kperrem wàa.

will be added

X\