Tumri Nittèerra ây 28

1Ye saana kà yey gi, de kàlnan nîir deesi a tîim sòo maan Malta înuwan. 2A nit ây tâage a farra aw mbitna mbâri dèy. De yeen ebi, de gàanan ot awi, ngam buun yaarre, ngisim suurre. 3Pawlu ye kimja tiyen e ii a ebi, jòoy de yuura ye mâaw ebi, de numu di Pawlu a kàn. 4A nit ây a dees maan, ye rabin jòoy numuge a kàn, de yèenjin a tîim waw de gàan: Nit yey tiɓàrgum nirri ɗi. Koo ye tâa saa a sòo, Fay ti woow e gûy ba. 5Amma Pawlu de gbòsfa jòoy nà a ebi, ti mbiru koo jâ ba. 6A nit ây de dànin fu ge furruwa, koo e yaa yaale e wurri. Amma ye waan dèy, de rabin jày ti mbiru ba. De inin dànda waw de gàan, ey mâri ɗi. 7Nit ɓèl dii a dees maan, ni hèmna ni jày dèy, nîir wàa Publiyu. Nit yey ngotna mbâra a àay wàa. De tâana a farra unji taan. 8Ye tâa too wàa di Publiyu kûurre àyci mâarra isi, ni tinjèr himni ɗa, Pawlu de lekfa a gin wàa de waa Fay. De banggurra ni kàn, de ndòosuwa. 9Ye mbire kà yey, a nit àyci ây kana de dàaran a gin Pawlu. De ndòosi daw. 10Aw ngaa aw 'misinage, aw tèe jày 'nang 'nang ngam worro. Ye anna a farra, de hîinan jày ge getna pî. 11Ye tâana a farra corri taan, de anna ot tay ni koombowal kana anga a Aleksandariya, înuwan mâr tifeebi. Koombowal yey tâa nà ni iiy a dees maan a tîim sòo. 12Ye kpètna a Siraku, de tâana a farra unji taan. 13De anna, de dòlna ot dik a Regiyu. A dat unji kpolo hiski fombina wâaye. Hû go a unji cukti de kpètna a Potiyoli. 14Ot kpàa kor goosum ây a farra. De waawan ot tâanji ni aw unji jòròs. A dat maan de dikna a Roma. 15A kor goosum ây tâage a Roma ye ragin yèk worro, de dàaran ot kpàanji a luumu Appiyu, a àay ây taan gin cita ni-wooy ây. Pawlu ye rabi daw gi, de kpèwsu tinîiri de gàa mbew di Fay. 16Ye kpètna a Roma, de hîiwan orri di Pawlu e tâa ey kpolo wàa, ni sooje yey faagu gi gbè. 17A dat unji taan, Pawlu de 'naase da nit ɓèl ni-Yude ây tâage a farra, aw dàara a gin wàa. Ye kimjan gi, de gàa daw: Un kor ta mum, mi mbir makta koo jâ da nit ta worro, ni a hàar wosom ta worro ba. Koo hû go aw 'mèmim a Yerusalem, aw hîimi a kàn ni-Roma ây. 18Aw ye gunimin yèk hak mum, aw yiɗi aw woomi, ngam aw kpàa jàk makta a hak mum ha aw ɓàrim ba. 19Amma a ni-Yude ây ye hàanjin yèk maan gi, de kàmmi kiita a gin Kaysara. Koo kà yey mi yiɗi mi 'maara yèk kiita a hak nit ta mum ba. 20Yòo jày de 'naasim dun, ha mi rapnu mi yèenji ni un. Ngam a jàk dànda ni-Israyel ây de tâami 'mèmdiya ni titefki yey gi. 21De gàawan: Ot haa kpàarra ɗerrewol a gin ni-Yude ây yèk hak wey ba. Koo nirri kpolo a tîim kor ây ti dàara ay, e sakna yèk makta a hak wey ba. 22Amma ot yiɗi mu kàlna yèk dànda wey, ot ragi. Ngam ot cèngnige, yèk ot maan aw hàanjige koo u hâ. 23De raknjin ni Pawlu, aw dàara unji kana. A nit ây dèy de kimjan a gin wàa. Diga ndamji ha mbona ey saki dawrre yèk wûun Fay, cèngnini dawrre yèk Yeesu ni kàlla a yèk mgbèngda Muusa, ni yèk nit lònum ây. 24A nit ây kana aw goosige a yèk yey yèe daw gi. A nit ây kana de hàwin. 25Ye tâa aw raknji a tîim waw ba, de tayin a dat yèk yey yèe daw Pawlu, ye gàa daw: Takundi kàle Jungci Delliya a gin too rra wun ni yèk Isaya nit lònum, 26gàaw nà kà yey: Dik a gin nit ây gi, mu gàa daw: A rakta ra gun ragi, amma gun cèngni yèk yey ba. A gopta go gun gobi, amma gun kpàa jày ba. 27Ngam tinîir nit ây gi ndège, tuk waw ngaa gbukrige. Aw burre nis waw ngam ta aw rap ba, ta aw rak ni tuk waw ba, ta aw cèngsi ni tinîir waw ba, ha aw ira a gin mum mi ndòosi daw ba. 28Pawlu de gàa bak: Cèngnin, yèk saarra yey anga a gin Fay! Ey tèefa da nit ây èege yèk wàa. Aw gaw ragi! ( 29Ye gbèe yèerra kà yey, a ni-Yude ây de tayin. Aw hàanjirre dèy a tîim waw.) 30Pawlu tâa yeri cuk a àay yey cire, jingge ni seede gi. Ey ngotɗe nit ây pî dàaga a gin wàa. 31Kàli dawrre yèk wûun Fay, kàlnji dawrre yèk Yeesu Kristu Nitcoorra tolnji cen, njangda cen.

will be added

X\