Tumri Nittèerra ây 26

1Agaripa de gàaw di Pawlu: Mu kpàa orri mu yèe yèk hak wey. Pawlu de parre kàn wàa, de goose yèk hak wàa de gàa: 2Agaripa wûun, tinîir mum kâwrimde, ngam niyey mi kpàa orri a ɗàm kpees wey, mi goosi a jàk yey 'maaran ni-Yude ây a hak mum gi. 3Ngam muy mu cèngni hàar ni-Yude ây mbâra, ni jày pî hàanjin a tîim waw gi. Hû go mi waamde, raksi mbâra, ta mu loo ba. 4A ni-Yude ây pî aw cèngni dikri mum diga lori, ye tâami a tîim nit ta mum a Yerusalem gi. 5A nit cèngnum ta mum diga mgban see gaw seedi a hak mum, kày furrimi a ot hàar worro woy hòmge mbèerum, kày 'mèmsim ni ni-Farisa ây. 6Ni-yey aw hiitimde ngam jàk dànda a yèk mòonjum kàn, yey yèe Fay ni wosom ta worro. 7A yòot nit ta worro ra sàm cuk aw dànde kpèta a gbèeni a yèk mòonjum kàn maan, ni futa a daprum di Fay tuma ni unji. Wûun, ngam jàk dànda a yèk yey a ni-Yude ây de 'maaman a kiita. 8Ngam jâ kpâanu goosum, nge Fay ge gûysi da nit ây wutke gi ya? 9Miy mi dàni nà, sey mi yii nîir Yeesu ni-Nasaret ni mbita jày 'nang 'nang dèy. 10Hû go mbirmi a Yerusalem. Ye kpàami orri a gin nit ɓèl ta waw da nit daprum ây, mi fanti daw da nit goosum ây dèy a kultuma. Ye iin daw kiita wurra, mi raknji ni nit hiitum ây. 11Mi ndagi daw ni riisum 'màari nak mûsi jày a àay gin kimjum ây pî, ha aw yèe yèk maarriya a ot Yeesu. Ngòlòm mòomi dèy, mi ɗàa daw ɗàari ha riiy ây kana ɗa. 12Kà yey de dikmi a Damasku, ye kpàami orri ni mbinum ɗa a gin nit ɓèl ta waw da nit daprum ây. 13Wûun, unji a tîim hay a ye dikna a orri, de rapmi kayang ana a faktiturum, hòme kayngum di unji, mgbaanage ni nit ây diknji nà ni miy. 14De yaana pî a deesi, de rakmi gûn yèemarre ni yèk Hebra, gàamde: Sawlu Sawlu, ngam jâ ɗàam dim ɗàari ya? Tâamde àyrriya kà naay gòyge a ɗàm kpees pètki suu nit wàa, ye hàwim dim gi. 15De goosim de gunmi: Mu wun ɗi ya, Nitcoorra? Nitcoorra de gàam: Mi Yeesu ɗi, di nit yey ɗàamu ɗàari gi. 16Amma an mu gòy! Mi lòrrimda kà yey, ngam mi iim nit tèerra tèem mum ni nit seedum mum a jàk yey rapmu gi, ni jàk yey gim kàlnum gi. 17Saa gim saanum a kàn ni-Yude ây, koo a kàn ni-riiy ây kana gim tèem gi ɗa. 18Mi tèemde ngam mu ɓelsi daw nisi, ha mu yuuni daw a kulpi, mu 'maa daw a kayang, mu njeli daw a kàn Seyɗan, mu insa daw a gin Fay, ha aw kpàa yaafum jàk maarra waw, ni jàk koyrra a tîim nit ây goose a nîir mum, irge nit ta Fay gi. 19Kà yey Agaripa wûun, mi hàw goosum a jàk yey lòtkima a faktiturum ba. 20Amma mi kàl daw da nit ây yèk inum tinîiri, màrra a Damasku ni Yerusalem, a dat maan da ni-dees Yude ây ni nit ây èege yèk Fay ɗa. Mi gàa daw aw ir a gin Fay, aw lòni tèem yey ge getnji ni inum tinîir waw gi. 21Ngam yèk yey a ni-Yude ây de mòomin a àay Fay, aw kèlim ɓàcu. 22Amma Fay mgbaanjimge, mi gòyrre ha unji yey, mi seedirre yèk maan da hàm ây ni nit ɓèl ây, gim gàa jàk kana ba, sey yèk yey yèen nà nit lònum ây ni Muusa e gbèe, 23ye gàan, gesi Kristu e rii 'màari, e tâa nit màrra a tîim nit gûysum ây a wurra, e sak yèk kayang yèk saanum da ni-Yude ây, ni nit ây èege yèk wàa. 24Pawlu ye goosi yèk hak wàa kà yey, Festu de bime de gàa: Pawlu, mu gerre mu doogi, cèngnum wey dèy inumge kà tidoogum! 25Pawlu de gàaw: Mi doogi ba, Festu nit ɓèl, amma mi yèerre yèk takundi mbâra ni hakkilo. 26Ngam wûun ɓèl cèngni yèk maan, de yèemi nà tolnji cen a gin wàa. Mi cèngni mbâra, cen jày fûugu a yèk ây gi ba, ngam jàk ây gi pî ti mbir ni fûucu ba. 27Agaripa, mu goosi yèk nit lònum ây yi? Mi cèngni mu goosirre. 28Agaripa de gàaw di Pawlu: Ngase càa, ha mu ndòorim mu inim nit Kristu! 29Pawlu de gàaw: Mi waarre Fay, nge koo ngase càa koo dèy, naa muy kpolo wey gbè amma koo wun rakim unji yey gi, ey ngaa e tâa kà mum, sey ti 'mèmni yey gbè ta aw 'mèmu ba. 30Wûun de anin ni ngomna, ni Bernike, ni nit tâanjum ta waw, 31de yuun aw yèenji a tîim waw de gàan: Nit yey ti mbir koo jày getke aw ɓàruwa, koo aw leknu a kultuma ba. 32Agaripa de gàaw di Festu: Nit yey woowo ge tâaw ngin, to ti yiɗi go ngin aw hiitu a gin Kaysara gi ba.

will be added

X\