Tumri Nittèerra ây 25

1Tâa unji taan a dat ye kpèrra Festu a dees maan. De ana a Kaysariya e dik a Yerusalem. 2A farra a nit ɓèl ta waw da nit daprum ây, ni toonji ni-Yude ây de 'maaran yèk Pawlu a gin wàa. De waawan, 3de gàan: Mbitna jàk mbâri, tèera dot Pawlu ay a Yerusalem. Ngam a nit ây maan aw yiɗi aw wobu di Pawlu a orri, ha aw ɓàruwa. 4Amma Festu de gàa, aw faaw a kultuma a Kaysariya, ey ngaa kèle koycu a farra. 5De gàa bak: Hû go sey a nit ɓèl ây a tîim wun aw diknji ni miy. To yèk makta tâa go a hak nit yey, sey un 'maara yèk maan. 6Festu de tâa a tîim waw unji nan nan koo unji ra gbè, de koye a Kaysariya. Ni ndamji de ɗaa iirra kiita. De gàa aw 'maawra di Pawlu. 7Ye kpèrra a ɗàm kpees gbaat kiita, a ni-Yude ây dàaga a Yerusalem de mgbaawan, de 'maaran yèk ndèktiya a hak wàa, koo ye tâa aw kpàa gòynum takundi a yèk waw ba. 8Amma Pawlu de goosi yèk hak wàa de gàa: Mi mbir jàk maarra a yèk mgbèngda ni-Yude ây, koo a àay Fay, koo a gin Kaysara ba. 9Amma Festu yiɗi e mbir jàk mbâra a nis ni-Yude ây, de gunu di Pawlu: Mu yiɗi dikta a Yerusalem, mi hiitum a farra a yèk yey yi? 10Pawlu de goosi de gàa: Mi gòye ay a ɗàm kpees kiita Kaysara. Mi yiɗi ey hiitimi. Mi mbir maarra koo jâ da ni-Yude ây ba, kà yey cèngnum muy ni hak wey. 11To mi yew go a yèk mgbèngda, koo mi mbir go jàk maarra kana getke aw ɓàrimi, mi hàw wuta ba. Amma to yèk yey 'maaran a hak mum ti tâa go takundi ba, koo wuna ge kpàam hîirra a kàn waw ba. Mi yiɗi Kaysara e hiitimi. 12Festu ye yèe ni nit raknjum ta wàa, de goosi de gàa: Mu gàa kiita wey e tâa a gin Kaysara. Hû go di gum dik a gin wàa. 13A dat unji càa Agaripa wûun ni-Yude ây, ni Bernike de dàaran a Kaysariya ngam aw kèbu di Festu. 14Ye tâan a farra unji càa, Festu de sagu yèk Pawlu di wûun ni-Yude ây, de gàa: Nit kana dii ay gi, Feliku woowfa a kultuma. 15A ye tâama a Yerusalem gi, a nit ɓèl ta waw da nit daprum ây ni toonji ni-Yude ây, aw 'maara yèy a hak nit yey, aw waam mi yaanu a kiita. 16De gàami daw: Ti tâa hàar ni-Roma ây ba, aw iiw kiita di nirri, sonaa ɗà aw 'mèmsu ni nit ây 'maaga yèy a hak wàa nisi nisi, ha e kpàa goosum ni hak wàa a yèk yey 'maaran gi. 17Hû go ye dàanja orro pî ay gi, mi tòo a yèk yey ba. Ni ndamji de tâami mi ii kiita. De gàami aw 'maawra di nit maan. 18A nit ây 'maaga yèy a hak wàa ye gòyin a ɗàm kpees mum, aw 'maara yèk makta kà yey dànmi gi ba. 19Aw hàanjirre yèy gbè ni ey a hàar waw, ni yèk nit kana nîir wàa Yeesu, wurre. Pawlu de gàa, nit maan gûyrre bak. 20Dim ngaa yèk yey tâami dàpràràp. De gunmi di Pawlu, to yiɗi go dikta a Yerusalem ngam aw hiitu a farra a yèk yey. 21Amma Pawlu de gàa aw faaw ay gi, ha Kaysara e gbèesi yèk wàa. De gàami aw woow a kultuma ha mi tèew a gin Kaysara. 22Agaripa de gàaw di Festu: Miy ngaa mi yiɗi mi ragu di nit yey. Festu de gàaw: Ni ndamji ra gum raguwa. 23Ndamji maan Agaripa de dàaran ni Bernike a 'mita waw, de legin a àay ɓèl ni wûun sooje ây, ni nit tiɗàm kpees ây a riiy maan. Festu de gàa aw 'maawra di Pawlu. 24De gàa: Wûun Agaripa, ni un nit ây tâage ay gi, un rabu di nit yey a ni-Yude ây pî aw loosim ni yèk hak wàa gi, a Yerusalem ni ay gi ɗa, aw bime aw gàa, ti gesi e gûy ba. 25Miy mi kpàawe, ti mbir jày getke aw ɓàru ba. Ey ni hak wàa yiɗi aw hiitu a gin Kaysara. De dànmi, mi tèewfa a gin wàa. 26Amma mi cèngni mbâra jày gim kèrufa a yèk hak nit yey di Kaysara nit coorra mum ba. Hû go de 'maama dey a ɗàm kpees wun, hayye a gin wey Agaripa wûun ni-Yude ây, ngam a dat ye got gunu gi, mi kpàa jày gim kèri. 27Ngam mi dàne, tèerra nirri 'mèmdiya cen kàlnum yèk hak wàa gi, ge dik mbâra ba.

will be added

X\